Binəqədi Rayon Məhkəməsində oğurluqda təqsirləndirilən Elnur Quliyevin (adı, soyadı şərtidir) cinayət işi üzrə məhkəmə iclası başa çatıb.

Pravda.az-ın əldə etdiyi məlumata görə, hakim Elçin Ağayevin sədrliyi ilə keçirilən prosesdə hökm oxunub.

Məhkəmənin hökmü ilə o, 1 il 11 ay 27 gün müddətinə azadlıqdan məhrum edilib və təqsirləndirilən şəxs dərhal məhkəmə iclas zalında həbs olunub.

İttihama görə, hadisə 2025-ci ildə Bakı şəhərinin Binəqədi rayonu, Biləcəri qəsəbəsi ərazisində yerləşən fərdi yaşayış evində baş verib.

Belə ki, Elnur Quliyevin həyat yoldaşı əvvəllər zərərçəkmiş Şəhriyar Əsədovun (adı, soyadı şərtidir) uşaqlarının dayəsi olub. Təqsirləndirilən şəxs ev sahibinin evdə olmadığı vaxtdan istifadə etmək qərarına gəlib.

Hadisə günü o, zərərçəkmiş şəxsə məxsus yaşayış evinin yaxınlığına gələrək əvvəlcədən bildiyi yerdə saxlanılan açarı əldə edib. Yaşayış evinin ehtiyat açarı evin çöl hissəsində, elektrik sayğacının üzərində saxlanılıb.

Elnur həmin açarı götürərək evin qapısını açıb və qanunsuz şəkildə yaşayış sahəsinə daxil olub. O, evə daxil olduqdan sonra otaqları yoxlamağa başlayıb və yataq otağında yerləşən dolaba yaxınlaşıb. Dolabın içərisində saxlanılan müxtəlif qızıl-zinət əşyaları təqsirləndirilən şəxsin diqqətini cəlb edib.

Elnur ilk olaraq çəkisi 25 qram olan, 585 əyarlı və ümumi dəyəri 5 min manat təşkil edən “Pandora” markalı qızıl dəsti götürüb.Həmin dəstin tərkibinə bir cüt sırğa, bir ədəd üzük və bir ədəd qolbaq daxil olub.

Bundan başqa, təqsirləndirilən şəxs çəkisi 5 qram olan, 585 əyarlı və 500 manat dəyərində buta formalı qızıl sırğanı da mənimsəyib.

Daha sonra Elnur çəkisi 6,5 qram olan, 585 əyarlı və 700 manat dəyərində “Tifani” markalı boyunbağını götürüb.

Cinayət işi materiallarında göstərilir ki, oğurlanan əşyalar arasında kişi üzüyü də olub.

Belə ki, təqsirləndirilən şəxs çəkisi 2 qram olan, 585 əyarlı və 600 manat dəyərində “Versace” markalı kişi üzüyünü də gizli şəkildə götürüb.

Araşdırmalar zamanı müəyyən edilib ki, o, bununla kifayətlənməyərək çəkisi 8 qram olan, 750 əyarlı və 1200 manat dəyərində İtaliya istehsalı qadın üzüyünü də oğurlayıb.

İstintaq materiallarına əsasən, oğurlanan sonuncu əşya isə çəkisi 5 qram olan, 585 əyarlı və 500 manat dəyərində “Pandora” markalı qadın üzüyü olub.

Beləliklə, Elnur yaşayış evindən ümumi dəyəri 8 500 manat təşkil edən qızıl-zinət əşyalarını gizli şəkildə aparıb.

Hadisədən sonra ev sahibi yaşayış evinə qayıdarkən qızıl əşyalarının yerində olmadığını görüb.

Bundan sonra hüquq-mühafizə orqanlarına müraciət olunub və hadisə ilə bağlı araşdırmalara başlanılıb.

Toplanmış sübutlar, zərərçəkmiş şəxsin ifadəsi, istintaq zamanı əldə olunmuş digər materiallar və ekspertiza rəyləri əsasında təqsirləndirilən şəxsin yaşayış sahəsinə qanunsuz daxil olmaqla özgənin əmlakını gizli talaması müəyyən edilib.