"Şikayətim "Kontakt Home" şirkəti ilə bağlıdır..." "DİA-AZ" xəbər verir ki, bu barədə Yasəf Məmmədov adlı sosial şəbəkə istifadəçisi özünün paylaşımında gileylənir.

Narazı vətəndaş daha sonra başına gələnləri belə nəql edir: "2025-ci ilin dekabr ayında iPhone 17 Pro Max telefonu almışdım. Telefonu 6 aylıq kreditlə götürmüşdüm. Lakin 2 ay keçməmiş krediti tam şəkildə bağladım. Mən həmin mağazanın daimi müştərisiyəm.

Bu yaxınlarda telefonun IMEI kodunu yoxlamaq istəyəndə gördüm ki, kreditin bağlanmasının üzərindən 6 aydan çox vaxt keçməsinə baxmayaraq, telefon hələ də Kontakt Home-un mülkiyyətində kimi göstərilir.

Bununla bağlı qaynar xəttlərinə zəng edib bildirdim ki, telefonun kreditini tam bağlamışam və cihazı şirkətin adına olan qeydiyyatdan çıxarsınlar. Lakin onların səhvi nəticəsində telefonun xətti tamamilə bağlanıb.

Bu hadisə elə bir vaxtda və elə bir yerdə baş verdi ki, bütün pul vəsaitlərim telefondakı bank kartlarında idi. Ətrafda Wi-Fi də yox idi. Saatlarla çıxılmaz vəziyyətdə qaldım. Daha sonra yoldan keçən bir qardaşın köməyi ilə qaynar xəttlərinə yenidən zəng edib bildirdim ki, telefon onların səhvinə görə bağlanıb və cihazın açılmasını tələb etdim.

Mənə verilən cavab isə belə oldu: “Yaxın mağazalarımızdan birinə yaxınlaşın.”

Artıq 4 gündür ki, şikayətimə baxılmır və telefon hələ də bağlı vəziyyətdədir.

Lazımi dövlət qurumlarına şikayətimi təqdim etmişəm. Bütün iş-gücümü kənara qoyaraq vəkil tutmuşam və mənə vurulmuş maddi və mənəvi ziyanın məhkəmə qaydasında ödənilməsini tələb edəcəyəm..."