Paytaxtda şəhər təsərrüfatının idarə olunması sıfır səviyyəsindədir. İdarəetmədə elə bir pərakəndəlik var ki, hansı qurumun nəyə nəzarət etdiyi, nələrə məsuliyyət daşıdığı, nəyə cavabdeh olduğunu ayırd etmək müşküldür. Hər hansı problemlə bağlı bir quruma müraciət etdikdə, başqa birisinə yönləndirir, o da bir başqasına. Beləcə, labirintə düşürsən və içindən də çıxa bilmirsən.
Bu günlərdə sosial şəbəkələrdə paytaxtın N. Nərimanov prospektində, Mərkəzi Parkı əhatə edən səkilərdən birində kanalizasiya qapağının deşildiyi, böyük bir çuxurun üzərinin açıq qaldığı görüntülər yayılıb. Mənzərəni videogörüntüyə alan vətəndaş səkidə addımlayarkən istənilən bir şəxsin ayağının içi üfunətli su ilə dolu bu çuxura düşə biləcəyi, xüsusən də uşaqlar üçün böyük təhlükə daşıdığını qeyd edir. Videoda aşkar görünür ki, kanalizasiya lyukunun qapağı sınıb - plastik qapaqdır, ona görə də kanalizasiya suyunun üzəri hər cür həşəratlarla doludur və şəhərin mərkəzində, Mərkəzi Parkın səkisində belə bir eybəcər vəziyyət hökm sürür. Di gəl ki, heç bir qurum belə bir vəziyyətin aradan qaldırılmasında maraqlı deyil.
Bələdiyyələrin Fəaliyyətinin Təbliği İctimai Birliyinin sədri Vüqar TofiqliSherg.az-a açıqlamasında bildirdi ki, belə vəziyyətin yaranmasına səbəb şəhər təsərrüfatına cavabdeh qurumların koordinasiyalı şəkildə fəaliyyət göstərməməsidir:
Şəhər təsərrüfatı nəhəng bir sahədir. Bakı Şəhər İcra Hakimiyyətinin tabeliyində olan qurumlar var. Vətəndaşlara Xidmət Tresti, Yaşıllaşdırma İdarəsi, Bulvar İdarəsi, “Bakı Şəhər İşığı” Elektrik Şəbəkə Müəssisəsi, hər inzibati rayonun özünün işıq, qaz, su idarəsi, yol təsərrüfatına cavabdeh qurum və sair çoxsaylı strukturlar fəaliyyət göstərir. Mərkəzi Park və Nəriman Nərimanov prospekti Yasamal rayonunun inzibati ərazisinə aiddir. Bu rayonun inzibati ərazisinə daxil olan infrastruktur problemlərinin həlli də birbaşa bu rayonun yerli xidmətlərinin üzərinə düşür. Səkidə deşilmiş kanalizasiya qapağı, əlbəttə, piyadalar üçün ciddi təhlükə yaradır, dərhal aidiyyəti qurumlar tərəfindən problem aradan qaldırılmalı idi. Deşilmiş və ya qırılmış kanalizasiya və ya su quyusunun qapağı həmin xəttin balansında olduğu yerli su-kanal idarəsi və ya Azərbaycan Dövlət Su Ehtiyatları Agentliyi tərəfindən təmir edilməli və ya yenilənməlidir. Əgər problem məhəllə daxilində və ya binanın həyətindədirsə, aidiyyəti yerli istismar idarəsinə məlumat verilməlidir. Belə təhlükəli hallarda ADSEA-nın 955 Çağrı Mərkəzi xidmətinə zəng edib məlumat vermək lazımdır. Məsələ ilə yerli bələdiyyə və ya mənzil-kommunal istismar sahəsi, ya da yerli icra hakimiyyəti məşğul olmalıdır. Bu qədər qurum var, amma şəhərin mərkəzində kanalizasiya quyusunun qapağı deşilib, ətrafa üfunət yayır, piyadalar üçün təhlükə yaradır.
