"Düz 3 il əvvəl Prezidentimizin sərəncamı ilə Azərbaycanda cəzaçəkmə yerlərini idarə edən dövlət qurumunun və Penitensiar Xidmətin (PX) rəhbərliyində dəyişikliklər edildi. Ədliyyə general-mayoru Ceyhun Həsənov Ədliyyə Nazirinin müavini, eyni zamanda Penitensiar Xidmətin rəisi vəzifəsindən azad edildi və əvvəllər həmin idarənin Əməliyyat Rejiminin rəisi vəzifəsində çalışmış Mirsaleh Seyidov Penitensiar Xidmətin rəisi vəzifəsinə təyin edildi. İlk günlərdən hər kəs... xüsusən də dustaqlar və yaxınlarından narahat olan dustaq ailələri... bu yeniliyə sevindi... Amma..." "DİA-AZ" xəbər verir ki, bu barədə iddialar redaksiyamıza göndərilən məqalədə yer alıb.
Məqalədə daha sonra deyilir: "Məlumat üçün bildirək ki, Ədliyyə polkovniki Mirsaleh Seyidov 2016-cı ildən penitensiar sistemdə Əməliyyat-rejim işinə rəhbərlik edib. İndi isə görünəni odur ki, neçə illərdir, həbsxanalar, xüsusən də - 10 saylı Cəzaçəkmə Müəssisəsi kimlərinsə şəxsi biznesinə çevrilib.
Bəli, burada hava udmaq pulla, ailə üzvləri ilə telefon danışığı pulla,.. Bütün hər şey pulla. Baxın, Penitensiar Xidmətin 10 saylı Cəzaçəkmə Müəssisəsində təxminən 2000-ə yaxın cəza çəkən şəxslər var. Və nəhayətdə bu məhbusların taleyi Mirsaleh Seyidovu maraqlandırmalıdır. Çünki bu gün türmələrdəki BAZARA və BARDAĞA görə cavabdeh məhz odur...
Hörmətli oxucular, biz indi həmin Cəzaçəkmə Müəssisəsində cəza çəkən şəxslərin yaşayışı üçün bölünmüş ərazilərlə və onların qiymətləri ilə sizi tanış edəcəyik.
1. Kod-Barak pulla (hər bir adam üçün giriş 3000-5000 arası, aylıq da hər adam üçün 200 manat, 42 nəfər, aylıq bir barakdan 8400 manat + 5000 manat + 210 000 manat giriş + 350 manat hər ay kondisioner pulu)
2. Sport-Barak pulla (hər bir adam üçün giriş 5000-6000 arası, aylıq da hər adam üçün 200 manat, 28 nəfər, 5600 manat + 6000 manat + 168 000 manat giriş + 350 manat kondisioner pulu)
3. Məktəb-Barak pulla (hər bir adam üçün girişi 7000-8000 arası, aylıq da 300 manat, 12 nəfər Məktəb-Barakda qalır, 3600 manat + 8000 manat + 3 otaq hər bir otaq üçün 200 manat kondisioner pulu + 200 manat televizor pulu + 96 000 manat giriş )
4. “Sançast” pulla (10000 manat giriş, aylıq 1000 manat, 2 ədəd tək otaqlı, 2 ədəd də 3 nəfərlik, 4 ədəd 2 nəfərlik, 1 ədəd 7 nəfərlik guya xəstələr üçün, onlardan da hər birindən 400 manat alınır, o birilər isə 1000 manatdır, ),
5. Klubun qabağında açılan Təzə-Barak, Kod-Barakla Kitabxananın arası (giriş 3500 manat, aylıq 200 manat, 26 nəfər yaşayır, 5200 manat + 3500 manat + 91 000 manat giriş )
6. Kent-Barak pulla (aylıq kondisionerin qiyməti 350 manat, giriş 2000 manat, aylıq yoxdur )
7. 4-cü dəstənin olduğu Barak pulla ( giriş 1500 manat, aylıq yoxdur )
10 saylı Cəzaçəkmə Müəssisəsində kafe, restoran fəaliyyət göstərir, bir çaynik çay 3 manatdır. Burada kababdan tutmuş quş südündən olan torta qədər, yəni hər şey tapmaq olar. Dustaqlara dövlət xətti ilə verilən bütün ərzaq və geyim əşyaları ( ikralar, kompotlar, alt-üst geyimləri, sabunlar, siqaretlər, üzqırxanlar, kremlər və s ) hamısı "laryok" (türmədə köşkə laryok deyirlər) deyilən yerdə satılır. Burada hər şey tapmaq olar, ancaq qızıl qiymətinə. "Prom" deyilən yeri dustaqlar "Tarqovı" adlandırırlar. Orada ancaq icra başçıları və imkanlı şəxslər böyük pullar hesabına yaşayır. "Prom" da 6 yaşayış otağı mövcuddur. Buradakı yaşayış mənzillərinə giriş 20 000 manat, hər ay 3000-3500 manat, 5000 manat verəndə olur. "Promda yaşayanların hər birinin telefonu vardır, o telefonlar gecə-gündüz otaqlarındadır. Səhər-səhər sıra baxışında kim danışırsa və ya axşam "Braqa" içibsə, narkotik istifadə edibsə "o tərəf"ə keçirilirlər və haqq-hesab olunduqdan sonra "Zona" buraxılır. Saç saxladınsa hər ay 10-20 manat verməlisən. Geyim, əgər "Vorabskoy" geyinmək istəyirsənsə, ayda 500 manat verməlisən. Döşəklər, döşək ağları pulla satılır. Dava-dalaş oldusa kütləvi şəkildə o tərəfə keçirdirlər, karsa salırlar, pul aldıqdan sonra "Zona" buraxırlar. Məhkəməyə çıxmaq pulladır, özüdə komissiya yaradılır, həmin komissiya müsbət rəy vermək üçün külli miqdarda pul alır. 10 saylı Cəzaçəkmə Müəssisəsində "TAXTA BARAK" deyilən bir Barak da mövcuddur. Bu Barak isə pulsuzlar üçündür... Bu Barakda yaşayanların bir qismi yeməkxanada yemək yeyirlər. Təsəvvür edin ki, 10 saylı Cəzaçəkmə Müəssisəsinin 2000 nəfərə yaxın dustağı olsa da, 2000 nəfərə yaxın cəza çəkən şəxslərə ərzaq, yemək ayrılsa da, yeməkxanada 70 nəfərə yaxın cəza çəkən yemək yeyir. Ərzaq bazasından ayrılan ərzağın hesabatı aparılsa və bir aylıq həbsxanalarda yeməkxanaların yoxlamaları aparılsa, böyük yeyinti halları ortalığa çıxacaq. Və elə yeri gəlmişkən, əsgəri ilə yemək yeyən Mirsaleh Seyidovu bir gün də dustaqla yemək yeməyə dəvət edirik. Onda duruma - TAMAHI səbəbindən yaratdığı duruma tam şahidlik etmiş olar.
Bir faktı da qeyd edək ki, bu gün 10 saylı Cəzaçəkmə müəssisəsini təsadüfi olaraq seçmədik. Sözümüzün canı odur ki, hörmətli Mirsaleh müəllim 2011-ci ilin avqust ayından 2016-cı ilin fevral ayınadək buraların rəisi vəzifəsində işləyib. Yəni yeyintinin təməli o vaxtlar daha da püxtələnib. Təkcə bir fakta diqqət yetirin: Burda 1 gündə ancaq telefondan 28 000 manat pul yığılır...."

MƏQALƏNİN DAVAMI OLACAQ...