Şərur rayonunun Muğancıq kənd məktəbində 7-ci sinif şagirdi S.A.-nın alçaldıldığı iddia olunur. Yaxınlarının sözlərinə görə, məktəb direktoru şagirdi tualet unitazına düşən açarları çıxarmağa məcbur edib.

Hadisədən sonra uşağın özünü sinif yoldaşlarının qarşısında təhqir olunmuş hiss etdiyi və bu hadisənin onun psixoloji vəziyyətinə mənfi təsir göstərdiyi bildirilir.

Yaxınları bildirir ki, şagird hadisədən sonra artıq məktəbə getmək istəmir:

“Bu, adi intizam məsələsi deyil, uşağın ləyaqətinin alçaldılmasıdır. Direktorun açarı tualetə düşüb və 7-ci sinif şagirdini onu çıxarmağa məcbur edib. Uşağa ‘sənin əlin balacadır, ora yerləşər’ deyilməsi onun üçün çox alçaldıcı olub.

Bu hadisədən sonra sinif yoldaşları ona ‘murdarsan’ deyərək yaxın buraxmır, onu kənarlaşdırırlar. Uşaq artıq məktəbə getmək istəmir.”

Bu hadisə Sinduz Cəfərova ilə bağlı əvvəlki şikayətləri də yenidən gündəmə gətirib. Cəfərovanın adı Muğancıq kənd məktəbində ilk dəfə qalmaqalda hallanmır.

Təxminən üç il əvvəl onun təhqir etdiyi şagirdlərdən birinin bu alçaldıcı münasibətə dözməyərək intihar etdiyi bildirilirdi.

Cəfərova bundan əvvəl də rüşvət və müəllimlərin maaşlarını mənimsəmək iddiaları ilə gündəmə gəlmiş, bir neçə müəllimin şikayətindən sonra barəsində cinayət işi açıldığı və vəzifədən uzaqlaşdırıldığı deyilmişdi. Buna baxmayaraq, bir neçə ay əvvəl Naxçıvan Təhsil Nazirliyi onu yenidən direktor təyin edib. Müəllim və valideynlərin kütləvi etirazı isə nəticəsiz qalıb.

Yaxınları bildirir ki, son hadisəni əks etdirən görüntülər aidiyyəti qurumlara təqdim olunsa da, şikayətə hələlik nəticə verilməyib:

“Hadisəni göstərən gprüntülər var. Şagirdlərdən biri həmin anı kənardan çəkib. Valideynlər bunu sübut kimi əvvəlcə rayon təhsil şöbəsinə aparıblar. Orada onlara bildirilib ki, Sinduz Cəfərova ilə bağlı tədbir görə bilməzlər. Daha sonra Naxçıvan Təhsil Nazirliyinə müraciət olunub. Amma ailənin sualları yenə cavabsız qalıb. Bizdə belə təəssürat yaranır ki, məsələ obyektiv araşdırılmır.”

Yaxınları aidiyyəti qurumlara müraciət edərək hadisənin ədalətli araşdırılmasını tələb edirlər.