İmişli təhsil sektorunda himayədarlıq və direktor özbaşınalıqları ilə bağlı sözügedən qurumun rəhbəri Elşad Uğurluyevə müraciət ünvanlayan gənc yazar Amil Baycan olduqca ilginc faktları təqdim edib. "DİA-AZ" olaraq həmin müraciəti olduğu kimi diqqətinizə çatdırırıq:
"Bu açıq məktub Sizə İmişli rayonunda təhsil ictimaiyyətini ciddi şəkildə narahat edən bir məsələ ilə bağlı ünvanlanır.
Söhbət rəhbərlik etdiyiniz İmişli təhsil sektorunda bəzi məktəb direktorlarının yol verdiyi özbaşınalıqlardan və bu qanunsuz halların açıq şəkildə himayə olunmasından gedir.
Rayonda fəaliyyət göstərən məktəblərdən birinin direktoru tərəfindən müəllimlərə qarşı təzyiqlər, qanunsuz tələblər, rüşvətxorluq, hədə-qorxu, əmək hüquqlarının pozulması və etik davranış normalarına zidd addımlar atılması artıq sirr deyil.
Daha narahatedici məqam isə ondan ibarətdir ki, bu faktlar barədə dəfələrlə müraciətlər edilməsinə baxmayaraq, heç bir real tədbir görülmür.
Təhsil sektorunun müdiri olaraq Sizin əsas vəzifəniz qanunun aliliyini qorumaq, müəllim və digər təhsil işçilərinin hüquqlarını müdafiə etmək və təhsil müəssisələrində sağlam idarə etməni təmin etməkdir.
Lakin mövcud vəziyyət göstərir ki, şəxsi münasibətlər və dostluq əlaqələri qanunlardan üstün tutulur. Bu isə təkcə bir məktəbin deyil, bütövlükdə rayon təhsilinin nüfuzuna ciddi zərbə vurur.
Direktorun özbaşınalıqlarına göz yumulması, şikayətlərin araşdırılmaması və zərərçəkənlərin susdurulması cəhdləri sual doğurur:
-Təhsil sektoru müəllimlər üçündür, yoxsa ayrı-ayrı şəxslərin toxunulmazlığı üçün?
Bu açıq məktub vasitəsilə Sizdən aşağıdakıları tələb edirik:
1.Sizə məlum olan direktorun fəaliyyəti ilə bağlı obyektiv və şəffaf araşdırma aparılsın.
2.Müəllimlərə qarşı edilən təzyiqlərə hüquqi qiymət verilsin.
3.Şikayət edən şəxslərə qarşı mümkün təzyiqlərin qarşısı alınsın;
4.Himayədarlıq siyasətinə son qoyulsun.
Unutmaq olmaz ki, vəzifə müvəqqətidir, amma atılan addımların məsuliyyəti qalıcıdır.
Əgər bu məsələlərə biganə qalınarsa, ictimaiyyət və müvafiq qurumlar qarşısında cavab vermək qaçılmaz olacaq.
Ümid edirik ki, bu müraciət Sizə siqnal olacaq və İmişli rayonunda təhsil sahəsində ədalətin bərpa olunmasına real töhfə verəcəksiniz".
