Avropa Şurası Azərbaycana qarşı qərəzli mövqeyini davam etdirir.

Son 25 ildə, yəni Avropa Şurasına üzv olduqdan sonra Azərbaycan fobiyası bu qurumun sanki fəaliyyət prinsipinə çevrilib. Avropa Şurası Parlament Assambleyasının 2026-cı ilin qış sessiyasında Azərbaycan əleyhinə qətnamə qəbul etməsi insan haqlarından, beynəlxalq hüquqdan dəm vuran təşkilatın köhnəlmiş narrativlərdən kənara çıxa bilmədiyini göstərir.

Müxtəlif lobbi qruplarının siyasi “oyun” meydançasına çevrilmiş Avropa Şurası bu səbəbdən Azərbaycana münasibətdə köhnə streotiplərdən xilas ola bilmir. Təbii ki, AŞ PA-nın qətnaməsi tövsiyə xarakteri daşıyır və Azərbaycan üçün hüquqi öhdəlik yaratmır.

Lakin qətnamədə yer alan bəzi çağırışlar Azərbaycanın daxili işlərinə açıq-aydın müdaxilədir. Sənədin məzmunu onun erməni lobbisinin təsiri altında yazıldığını təsdiq edir. AŞ PA Azərbaycandan Bakıda həbsdə olan 23 erməni məhbusu azadlığa buraxmağı tələb edir. Əvvəla, Azərbaycanda həbsdə olan erməni məhbusların sayının 23 nəfər olması faktı öz təsdiqini tapmayıb.

Bu, Ermənistan hüquq-mühafizə orqanlarının və erməni diasporunun bütün beynəlxalq təşkilatlara yaydığı iddiadır. ABŞ-də və Avropadakı erməni lobbisi də bu rəqəmlə maniulyasiya edərək müxtəlif şəkildə mənfəət əldə etməyə çalışırlar.

Elə məhbusların sayının 23 nəfər göstərilməsi qətnamənin mətninin erməni dairələri tərəfindən yazıldığını göstərir. Guya Azərbaycanda məhbuslara işgəncə verilməsi, beynəlxalq hüququn pozulması, insanların təqib olunması barədə qərəzli ifadələr də sözügedən qarayaxma kampaniyasının tərkib hissəsidir.

Məlum olduğu kimi, bu yaxınlarda qarşılıqlı razılaşmaya əsasən Azərbaycan tərəfi humanizm prinsiplərindən çıxış edərək 4 erməni məhbusu Ermənistana təhvil verib. Bu halda onların sayı 23 nəfər deyil, azalmalı idi. Ancaq AŞ PA-nın bunu nəzərə almaması qətnamənin məzmunca yanlış və əsassız olduğunu bir daha nümayiş etdirir.

İkincisi, erməni məhbusların azad edilib-edilməməsi Azərbaycanın daxili işidir. Qarabağda ləğv edilmiş qondarma rejimin keçmiş rəhbərləri və Azərbaycana qarşı işğalçılıq müharibəsində onlarla əlbir olan dəstə üzvlərinin məhkəmə prosesində hərbi cinayət törətdikləri sübuta yetirilib.

Onların Azərbaycan xalqına qarşı soyqırım, etnik təmizləmə, terrorçuluq, dövlətin ərazi bütövlüyünə və suverenliyinə qəsd, qanunsuz silahlı dəstələr yaratmaq kimi ağır cinayətlər törədiblər. Lakin AŞ PA nədənsə bu faktları görməzdən gəlib.

İstər işğal dövründə, istərsə də indi AŞ PA daim müharibə cinayətkarlarının “hüquqları”nı müdafiə edib. Azərbaycan torpaqları işğaldan azad edildikdən sonra hələ də həmin ərazilərdə kütləvi məzarlıqlar aşkarlanır. Amma AŞ PA-nın qətnaməsində bu faktlar yer almayıb.

Belə əməllərə yol verən canilərin azadlığa buraxılmasını tələb etmək Azərbaycan xalqına qarşı hörmətsizlikdir. Humanizm prinsiplərini, məhbusun səhhətini nəzərə alaraq onu azad edib-etməmək Azərbaycan dövlətinin məxsusi səlahiyyətilərinə aiddir.

AŞ PA dövlətin işlərinə müdaxilə edə bilməz. AŞ PA-nın erməni məhbuslar məsələsini gündəmə gətirməsi Azərbaycanla Ermənistan arasında sülh prosesinə zərbə vurmağa xidmət edir. Artıq Azərbaycanla Ermənistan sülh sazişini paraflanıb, kommunikasiyaların açılması istiqamətində işlərə başlanılıb, iki ölkə arasında tranzit qadağaları ləğv edilib və ticarət əlaqələri yaranıb.

Nəticədə, tərəflər yekun sülh müqaviləsinə xeyli yaxınlaşıb. Görünür, bu vəziyyət AŞ PA-nı Azərbaycana qarşı təzyiq aləti kimi istifadə etməyə çalışan erməni diasporu və onların lobbi qruplarının maraqlarına cavab vermir.

Ona görə də Azərbaycana qarşı bu cür təxribatlar törətməklə prosesi pozmağa, Ermənistan cəmiyyətində sülhə inamsızlıq yaratmağa çalışırlar.

Lakin postmünaqişə dövründə sülh ixrac edən ölkə kimi beynəlxalq platformalara dəvət edilən Azərbaycanı bir qətnamə ilə gözdən salmaq mənasız səylərdir.

“Cebheinfo.az”