Bu hadisələr Azərbaycanla sülh prosesinə nə təsirlər göstərə bilər?

Ədalət, Hüquq, Demokratiya (ƏHD) Partiyası İdarə Heyətini üzvü, siyasi şərhçi Əli Zülfüqaroğlu mövzu ilə bağlı Ajans.az-a açıqlama verib.

O bildirib ki, Rubinyan Solovyov ilə bağlı həqiqəti özündə əks etdirən ifadə işlədib: “Çünki Solovyov həmişə eyni zamanda müharibə vaxtı etnik zəmində qarşıdurmaya yönəlik təbliğat xarakterli fikirlər səsləndirirdi ki, bunun hansı məqsədə xidmət etdiyi bəllidir. Ermənistanda sülh prosesinin müsbət tendensiya ilə inkişaf etdirlməsi üçün hökumət müəyyən addımlar atır.

Azərbaycanla Ermənistan arasında sülh müqaviləsinin imzalanması, iki ölkə arasında əlaqələrin güclənməsinə şərait yaradır. Bu həm də bölgədə sabitliyin bərpasına xidmət edir. Lakin Rusiya burada maraqlı deyil. O hələ də, status-kvonun saxlanılmasını istəyir”.

Əli Zülfüqaroğlu qeyd edib ki, Azərbaycan sülhün tam təmin olunmasında və münasibətlərin müsbət yöndə inkişafında müəyyənedici aktor olaraq çıxış edir: “Ermənistan hökuməti də buna maraq göstərdiyi üçün, Rusiya Ermənistan daxilində qarışıqlıq yaratmağa çalışır. Buna görə də, kilsə və revanşistlərdən istifadə olunur.
Ermənistan kilsəsi Böyük Ermənistan ideologiyasının müəllifidir. İdeologiya sahəsində aparılan təbliğatlar erməni cəmiyyətinin “zəhərlənməsinə” və üçüncü qüvvələrin əlində alətə çevrilməsinə səbəb olub”.

Ekspertin sözlərinə görə, Ermənistan Azərbaycan torpaqlarını işğal etməklə əslində böyük zərərlərə məruz qaldı: “Bu prosesin arxasında ilk növbədə Rusiya faktoru və kilsə dayanırdı. İndi də müsbət tendensiyanın qarşısını almağa çalışırlar. Amma indi Ermənistan hökuməti də anlayır ki, ənənəvi xarici siyasət ilə Azərbaycan üzərindən iş aparmaq olmaz.
Ona görə də Ermənistan hökuməti kilsəyə qarşı fəaliyyətində prinsipiallıq nümayiş etdirir. Həmçinin, kilsənin Ermənistan siyasi səhnəsindən silinməsi və ona verilən konstitusion hüquqların aradan qaldırılması üçün praktiki addımlar atır”.

Siyasi şərhçi söyləyib ki, bu məsələlərdən belə nəticəyə gəlinir ki, Ermənistan hökuməti kilsəyə qarşı həlledici addımlar atacaq: “Çünki hökumətin əlində kifayət qədər kartlar var. Azərbaycan diplomatiyasının uğurlu addımları bölgədəki geosiyasi vəziyyətin dəyişməsinə şərait yaradıb. Türkiyə-Ermənistan, Azərbaycan-Ermənistan münasibətlərində müsbət meyllər buna nümunədir.
Müharibədən sonra Azərbaycan regionda və beynəlxalq siyasi arenada daha da güclənib. Nəticədə heç bir kənar qüvvə bölgədə əvvəlki vəziyyətin yaradılmasını reallaşdıra bilməz. Təhdidlər hər zaman var. Onu da nəzərə almalıyıq ki, Azərbaycan bölgədə müəyyənedici aktordur”.