Azərbaycan Prezidenti İlham Əliyev yerli telekanallara müsahibəsində Qərb dövlətlərinin Ermənistana münasibətdə ikili standarta yol verməsindən danışıb.

Dövlət başçısı bildirib ki, Ermənistanın Rusiyaya qarşı beynəlxalq sanksiyaları pozması faktına göz yumulur:

“Ermənistanı güclü şəkildə dəstəkləyən və daim Ermənistan üçün geosiyasi baxımdan çətinliklərdən, guya bəzi ölkələrin onun maraqlarına zərər vurmaq istəməsindən şikayət edən bir qrup ölkənin lideri ilə görüşərkən həmişə deyirəm:

“ÜDM-ə baxın və Rusiya ilə ticarət dövriyyəsinə baxın”. Rusiya-Ukrayna müharibəsi başlayanda Ermənistanla Rusiya arasında ticarət dövriyyəsi təxminən 2 milyard ABŞ dolları idi. İki il sonra isə bu rəqəm 12 milyard dollara çatdı. Bu, artıq hər şeyi açıq şəkildə göstərir.

Bu, sanksiyalardan yayınma mexanizmidir - onların dediyi kimi, paralel idxal və ya “boz zona” idxalıdır. Lakin nə Avropa Komissiyası, nə Avropa Parlamenti, nə də Avropa Şurası Parlament Assambleyasında heç kim bu barədə bir söz belə demədi, nə Ermənistanı qınadı, nə də ümumiyyətlə, sanksiyalar mövzusuna toxundu.

Çünki onlar üçün sanksiyalardan yayınma kanalı olmaq qəbulediləndir. Bizim ÜDM-in artması isə kiməsə sanksiyalardan yayınmağa kömək etdiyimizə görə deyil, - biz bunu etmirik, - o, iqtisadi fəaliyyətimizin real nəticələri hesabına artır”.

Azərbaycan Prezidentinin qeyd etdiyi vəziyyət bu gün də davam edir və Ermənistan kimi ölkələr Rusiyanın gizli ticarət yolu ilə gəlir əldə etməsinə şərait yaradır. 2022-ci ildə Ermənistanla Rusiya arasında ticarət dövriyyəsi 2 milyard dollar təşkil etdiyi halda 2023-cü ildə bu göstərici 4 dəfədən çox artaraq 8,4 milyard dollara çatdı. 2024-cü ildə Rusiya və Ermənistan arasında ticarət dövriyyəsi 11,7 milyard dollar təşkil edib.

Əslində, bu rəsmi sənədlərdə əksini tapmış rəqəmlərdir. Rusiya Baş nazirinin müavini Aleksey Overçukun bu yaxınlarda verdiyi açıqlamaya görə, 2024-cü ildə Ermənistanla qarşılıqlı ticarətin həcmi əslində 15,4 milyard dollar olub. 2025-ci ilin 10 ayı ərzində iki ölkə arasında ticarət dövriyyəsi azalsa da, Rusiya-Ukrayna müharibəsinin başlandığı dövrlə müqayisədə 3 dəfə artım qeydə alınıb və 6 milyard dollar təşkil edib.

Bu da Rusiyanın daha çox Çin, Hindistan, eləcə də digər Asiya ölkələri ilə idxal-ixrac əməliyyatlarına üstünlük verməsi və Ermənistanın ticarət mübadisəində diversifikasiyaya nail olmaq istəyi ilə bağlıdır. Ümumilikdə isə Ermənistan Rusiya üçün sanksiyalardan yayınmaq və xarici bazarlara çıxış əldə etməkdə hələ də “gizli qapı” rolunu oynayır.

Avropa və ABŞ xüsusi xidmət orqanları bu barədə məlumatlara malik olsalar da, Ermənistana qarşı heç bir tədbir görülmür. Hətta 2023-cü ildə Ermənistanın Avropa ölkələrindən daxili tələbatdan artıq məişət avadanlığı idxal edərək Rusiyaya ötürdüyü məlum olmuşdu. Rusiyanın isə həmin texnikanın mikrociplərini Ukraynaya qarşı hərbi əməliyyatlarda atılan raketlərin istehsalında istifadə etdiyi aşkara çıxmışdı.

Lakin Qərb Rusiya ilə əməkdaşlıq edən Özbəkistan, Qazaxıstan və Belarus şirkətlərinə sanksiyalar tətbiq etdiyi halda Ermənistana qarşı hər hansı tədbir görmədi. Ermənistanın ixracatında son illər qızıl və brilliantın həcminin artması da qeyd edilən səbəblə bağlıdır.

Rusiya istehsalı olan qızıl və brilliant Ermənistan məhsulu adı ilə xarici bazarlara çıxarılır. Rusiya hakimiyyəti ilə Ermənistanın Baş naziri Nikol Paşinyan arasında siyasi səmimiyyətin yaranmasının səbəbi sözügedən səbəblə bağlıdır.

Prezident Vladimir Putin digər məsələlərdə mövcud olan bütün fikir ayrılılıqlarına baxmayaraq, bütün görüşlərdə Nikol Paşinyana ticarət dövriyyəsinin sürətlə artmasına görə təşəkkür edir.

Müşfiq Abdulla
“Cebheinfo.az”