Ötən gün Xankəndi şəhərinin erməni əsilli sakini, 1967-ci il təvəllüdlü Avanesyan Karen Albertoviç yaşadığı yerdən şəhərin yaxınlığındakı meşə massivinə gedərək qabaqcadan orada gizlətdiyi “Kalaşnikov” avtomatını və ona aid patronla dolu 4 sandıqcanı, eləcə də 5 ədəd qumbaranı götürüb Xankəndi şəhərində keçirilən tədbir yerinə yaxınlaşmaq istəyərkən polis əməkdaşları tərəfindən saxlanılıb. Daxili İşlər Nazirliyindən (DİN) bildirilib ki, bu zaman K.Avanesyan 3 ədəd əl qumbarası atmaqla və avtomatdan atəş açmaqla polisə silahlı müqavimət göstərib.

Cavab atəşi nəticəsində güllə yarası almış K.Avanesyan tutulub. Əməliyyat zamanı bir polis əməkdaşı yaralanıb.

Baş Prokurorluq və Dövlət Təhlükəsizliyi Xidməti ilə birgə cinayət işi qaldırılaraq əməliyyat-istintaq tədbirləri aparılır.

Avanesyanın terror-təxribat törətmək niyyətində olması məlumdur, amma bir çox suallar var ki, ona yəqin ki, hüquq-mühafizə orqanları tərəfindən aydınlıq gətiriləcək. Sadəcə əsas sual budur: erməni niyə indi və kimin göstərişi ilə bu terrora hazırlaşırmış?

Mövzu ilə bağlı AYNA.AZ-ın suallarını cavablandıran siyasətçi, Ümid Partiyasının sədri İqbal Ağazadə deyib ki, baş verən hadisənin mahiyyətini hüquq-mühafizə orqanları daha dəqiq araşdıracaqlar və daha dəqiq məlumat verəcəklər:

- Amma ehtimallar var və bu ehtimallar üzərində ağıla gələn ilk variant bu şəxsin Xankəndidə gələcəkdə terror törətmək üçün qalmasıdır. İlkin məlumata görə, Avanesyan əvvəlcədən hazırlıqlar görüb. Bu şəxs imkansızlıq, yaxud əqli çatışmazlıq, ya da ki, Azərbaycan vətəndaşı olmağı düşünərək Xankəndidə qalmağı seçmişdisə, heç zaman silah, qumbara gizlətməzdi, saxlamazdı. Əvvəlcədən silah gizləyibsə, deməli, niyyəti varmış. Avanesyan güman ki, hansısa klanın, Ermənistandakı hansısa dairələrin öyrətdiyi, əlində açar kimi saxladığı şəxsdir. Azərbaycan hüquq-mühafizə orqanları bunu araşdıracaq və yəqin ki, Ermənistanla da bu istiqamətdə informasiya mübadiəsi aparacaq.

- Ermənistan bu hadisənin aydınlığa çıxmasında maraqlıdırmı?

- Avqustun 8-də Vaşinqtonda üçtərəfli görüşdə razılaşmalar əldə edilib, sülh sazişi paraflanıb. Bundan sonra baş verən proseslər onu göstərir ki, Ermənistan daxilində revanşist qüvvələr, xüsusilə də, hakimiyyətə Rusiya xətti ilə gəlmək istəyən, yaxud etnik-milli konfliktlər üzərindən özlərinə reytinq toplamaq istəyənlər uğursuzluğa düçar olublar. Ermənistan daxilində indi fərqli müzakirələr aparılır və ermənilərin xeyli hissəsi sülhdə maraqlı görünürlər. Belə məqamda revanşistlərin, Ermənistanda hakimiyyətə gəlmək istəyən qüvvələrin təxribat-terror cəhdləri istisna edilməməlidir. Ermənistanın hazırkı hakimiyyəti, Nikol Paşinyan hökuməti də anlamalıdır ki, bu cür hallar İrəvanın özünə ziyan vurur. Ona görə də, hesab edirəm ki, informasiya mübadiləsində maraqlı olacaqlar. Hər halda, yenə deyirəm, hüquq-mühafizə orqanları məsələni detallı araşdıracaq və cəmiyyət məlumatlandırılacaq.

- Ermənistan rəsmiləri tərəfindən son günlər sülh bəyanatları artıb. Eyni zamanda, Azərbaycanla, Türkiyə ilə sülhün əldə olunması istiqamətində addımları da görürük. Məsələn, Ermənistan hökuməti ölkəyə giriş-çıxışda pasportlara vurulan möhürdə dizayn dəyişikliyi edib, Ağrı dağının təsviri möhürlərdən götürülüb. Belə addımlar sülhə nə qədər yaxınlaşıldığını göstərir?

- Hesab edirəm ki, uzun illər davam edən Ermənistan-Azərbaycan və Ermənistan-Türkiyə arasında olan düşmənçilikdən cəmiyyəti birdən-birə psixoloji cəhətdən daşındırmaq üçün effektiv variantlar çox azdır. Məncə, belə addımlar prosesləri sülh istiqamətinə yönləndirəcək, insanları sülh istiqamətində düşünməyə vadar edəcək. Sülh istiqamətində daha böyük və kəskin addımlar atmaq bəlkə də mümkündür, amma bunun Ermənistan daxilində nəticələri nə olacaq, hər halda Paşinyan hökuməti bunu hesablayır. Həm hakimiyyəti əldən verməmək, həm də planlaşdırılan sülhün əldə olunması üçün Paşinyan hakimiyyəti xırda addımlar atır.

Ümumiyyətlə isə düşünürəm ki, Cənubi Qafqazın fərqli yerə gəlməsi istiqamətində Azərbaycan təşəbbüsü öz üzərinə götürməlidir. Sülh sazişinin paraflanmasından sonra cənab Prezidentin “Əl Ərəbiyyə” telekanalına müsahibəsinə diqqətlə nəzər salmaq lazımdır. Prezident bildirdi ki, sülh sazişinin imzalanması artıq formal xarakter daşıyacaq. Yəni ki, biz artıq razılaşdırmış kimi görünürük. Bundan sonra Azərbaycan Cənubi Qafqazın birliyi istiqamətində düşünməlidir. Avropa Birliyinin mini modeli formasında Cənubi Qafqaz Birliyi gələcək üçün böyük perspektivlər vəd edir.