Bakı Ağır Cinayətlər Məhkəməsində Sumqayıt şəhərində sələfilərlə xəvariclər arasında baş vermiş silahlı münaqişə ilə əlaqədar həbs olunanların məhkəmə prosesi keçirilir.
Vitrualaz.org saytının verdiyi xəbərə görə, prosesə hakim Səbuhi Hüseynov sədrlik edir.
Hadisə ötən il dekabr ayının 11-də saat 20:30 radələrində Sumqayıt şəhəri, 10-cu mikrorayon ərazisində yerləşən “Soltan” çay evində baş verib. İki qruplaşma arasında dini baxışlarında olan fikri ayrılığına görə yaranmış mübahisə sonda silahlı insidentlə nəticələnib.
Hadisə zamanı Sumqayıt şəhər sakinləri Elmar Məmmədli və Anar Rəhimov bıçaq xəsarətləri, Təzə Corat qəsəbə sakinləri Elşən Musayev və Elnur Nəzərəliyev isə qəlpə yaraları alıblar.
Polis və prokurorluq orqanları əməkdaşlarının həyata keçirdikləri istintaq hərəkətləri və əməliyyat-axtarış tədbirləri nəticəsində hadisədə təqsirli bilinən Elçin Əkbərov, Əhməd Salmanov, Anar Mirzəyev, Zaur Paşayev, Elmar Məmmədli, Murad Məhərrəmov, Anar Rəhimov, Firudin Musayev, Vüqar Abdullayev, Amil Tağıyev, Elçin Mirzəyev, Cəlal Mikayılov, Kənan Mehrəliyev, Elşən Musayev, Elnur Nəzərəliyev və Vüqar Xəlilov həbs olunublar.
Onlara qarşı Cinayət Məcəlləsinin 221 (xuliqanlıq), 228 (qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə), 29, 120.2.4 (qəsdən adam öldürməyə cəhd) və 234-cü (qanunsuz olaraq narkotik vasitələr əldə etmə, daşıma, saxlama, göndərmə və ya satma) maddələri ilə ittiham irəli sürülüb.
Həbs olunanların arasında xəvariclərin əmiri, “Mamed” ləqəbli Elçin Əkbərov və sələfilərin lideri, “Hamza” ləqəbli Elşən Musayev də var. Təqsirləndirilən şəxslər onlara elan olunmuş ittihamlarla özlərini təqsirli bilməyiblər.
Keçirilmiş baxış zamanı Əhməd Salmanovun evindən 110 qram həşiş, 5 kiloqram civəyə oxşar maddə, qanunla qadağan olunmuş 44 ədəd müxtəlif məzmunlu dini ədəbiyyat və 30 disk, Kənan Mehrəliyevin evindən isə 1 ədəd “F-1” qumbarası, 1 qumbara alışqanı, 123 ədəd avtomat patronu, qanunla qadağan olunmuş 30 ədəd müxtəlif məzmunlu dini ədəbiyyat və 30 disk aşkar edilərək götürülüb.
Xəvariclərin əmiri Elçin Əkbərov ona qarşı sürülən ittihamları qəbul etməyib. O, 2005-ci ildən ibadətlə məşğul olduğunu göstərib:“Qıldığım namaz sünni təriqətinə məxsusdur, məzhəbin rəsmi adı “əhli sünnə vəl cəmaə” adlanır. Sumqayıt şəhərində yaşayan əqidə qardaşlarımla münasibətim həmişə yaxşı olub, aramızda ayrı-seçkilik olmayıb. Onlara hər hansı bir formada rəhbərlik etməmişəm, göstərişlər verməmişəm. Dostlarım və əqidə qardaşlarım arasında hər hansı vəzifə, yəni dində nəzərdə tutulan hər hansı bir camaatın əmiri və rəhbəri olmamışam. Elşən Musayevi tanısam da düşmənçiliyim olmayıb. Elşən də mənim kimi eyni əqidənin davamçısıdır, əhli sünnə kimi namaz qılır. O, Sumqayıt şəhərində reklam işləri ilə məşğul olur. Dini ləqəbi “Hamza”dır.
11 dekabr, 2013-cü ildə günorta saatlarında ət məmulatları mağazasında olarkən dostum Elmar Məmmədli “Hamza” ləqəbli Elşən Musayevlə aralarında dini mövzu ilə bağlı söz mübahisəsinin düşdüyünü, sonradan zəng vuraraq ona hədə-qorxu gəldiyini dedi.
Elşənin hərəkəti Elmana çox pis təsir etdiyindən qəzəblənmişdi. Başa düşdüm ki, bunun axırı pis qurtaracaq, ona görə də bu məsələyə aydınlıq gətirmək və onları barışdırmaq istədim. Elmara dedim ki, sən çəkil kənara, əqidə qardaşlarımızla söhbət edib hər şeyi sülh yolu ilə həll edəcəyik. Elşənin təklifi ilə çay evinə görüş təyin etdik. Bu barədə Zaur və Elnurla da söhbət etdim. Elnur çay evində çoxlu adam olduğunu, ora getməməyi məsləhət gördü. Amma Zaur israrla gedəcəyini dedi, mənə qulaq asmadı. Bundan sonra Zaur Paşayev, Elmar Məmmədli, Maqsud, Anar Rəhimov və Elçin Mirzəyev çay evinə tərəf getdilər. Hava qaranlıq idi.
Dəstə çıxıb gedəndən bir müddət sonra mən, Əhməd Salmanov, Amil Tağıyev, Vüqar Abdullayev və Firudin Musayev piyada onların arxasinca çay evinə getdik. Ora çatarkən atəş səsləri eşitdim. Dərhal oradan uzaqlaşdıq. Atəşin kim tərəfindən açıldığını görmədim. Atəşdən sonra çay evindən çıxıb qaçan Anar Rəhimovu gördüm. Digər əqidə qardaşlarımdan heç kimi görmədim.
Nə məndə, nə də dostlarımda hər hansı bir silah olmayıb. Hadisə zamanı Elmar Məmmədli və Anar Rəhimova bıçaq xəsarətlərini kimlərin yetirdiyini bilmirəm. Axtarış zamanı yaşadığım mənzildən aşkar edilən iki ədəd qumbara mənə məxsus deyil. Ora hansı yolla düşməsi barədə heç nə deyə bilmərəm“.
İstintaq zamanı Elçin Əhmədov həmşinin göstərib ki, Sumqayıt şəhərində yaşayan din əqidə qardaşları birləşərək toplum yaradıblar və buna İslam dininə uyğun olarağ “camaat” deyilir. Camaatın təxminən 100 nəfərə yaxın üzvü var və üzvlər yığışaraq təxminən 2009-2010- cu illərdə onu rəhbər (əmir) seçiblər. Rəhbəri olduğu çamaatda təxminən 3-4 qrup var. Həmin qrupun birinə Yusif, birinə Amil, birinə Radik, birinə isə “İxlas” ləqəbli Zaur başçılıq edib. Hər qrupda da təxminən 7-10 nəfər üzv olub”.
Təqsirləndirilən şəxs qismində dindirilən Əhməd Salmanov ona elan olunan ittihamla özünü təqsirli bilməyib. O, ifadəsində camaatın əmirinin əvvəllər Azər Misirxanov olduğunu (Söhbət radikal dini təmayüllü dəstə yaradaraq beynəlxalq terrorçu şəbəkə ilə əlaqədə və digər bir sıra ağır cinayətlərdə ittiham olunan “Abdulla” ləqəbli Azər Misirxanovdan gedir. Xatırladaq ki, A.Misirxanov ABŞ hərbi birləşmələrinin Əfqanıstanda həyata keçirdiyi əməliyyat tədbirləri zamanı öldürülüb. Onun rəhbərlik etdiyi 31 nəfərlik dəstə üzvləri 2010-cu ildə Ağır Cinayətlərə Dair İşlər üzrə Məhkəmənin hökmü ilə 3 ildən 15 ilədək azadlıqdan məhrum ediliblər-İ.R.), lakin sonralar cihadda iştirak etmək üçün Əfqanıstana getdiyindən öz yerinə Elçin Əkbərovu təyin etdiyini göstərib.
Ə.Salmanovun ifadəsindən belə məlum olub ki, cammat üzvləri həmişə Elçinin yolunu saxlayıblar, onun göstərişlərinə əməl ediblər: “Elmarla “Hamza”nın aralarındakı dini fikir ayrılığına səbəb müqəddəs Qurani-Kərimin “ən-Nisa” surəsinin 60-cı ayəsi ilə bağlı olub. Sumqayıt şəhərində olan hər iki camaatın arasında bu dini fikir ayrılığının olduğunu bir neçə ay əvvəl bilirdim. Üzv olduğum camaatın dini baxışlarına müvafiq olaraq bir müsəlman digər müsəlmandan məhkəməyə şikayət etsə həmin şəsx islamdan çıxmış heab olunur. Çünki “ən-Nisa” surəsinin 60-cı ayəsinə görə, hökm yalnız Allaha məxsusdur. Elşən Musayevin camaatının üzvləri isə bu fikri qəbul etmirdilər, qeyd olunan ayəni başqa cür şərh edirdilər”.
Zərərçəkmiş şəxs qismində ifadə verən sələfilərin əmiri Elşən Musayev (Təqsirləndirilən şəxslərdən Elşən Musayev, Elnur Nəzərəliyev və Vüqar Xəlilovun cinayət işi üzrə məhkəmə prosesi Sumqayıt Şəhər Məhkəməsində keçirilir. İlkin baxış iclası oktyabrın 16-da olacaq. Prosesə hakim Nəriman Əbiyev sədrlik edir-red.) 6-7 il əvvəl Allaha iman gətirərək ibadətə başladığını, sünni təriqətinin nümayəndəsi olduğunu bildirib: “Elçinin dəstəsində olan şəxslər özlərinin dini fikirlərini qəbul etməyən bütün insanları kafir, İslam dinindən kənar hesab etdiklərindən onlar “xəvaric” adlandırılırlar.
Elçin Əkbərovun yaxın həmfikri olan Elmarı da Sumqayıt sakini kimi tanımışam. Mənə çatan məlumatlara görə, Elman mənim barəmdə şəxsiyyətimi təhqir edən ifadələr işlədib. Belə ki, dini ləqəbim “Hamza” sözünü məsxərəyə qoyaraq arvad adı kimi “Qəmzə” deyə səsləndirib. Mən də onun dostu ilə xəbər göndərdim ki, Elmarın şəxsiyyətinə bir söz demirəm, məni təhqir etməsin, əks halda mən də onun adını “Elmira” kimi səsləndirə bilərəm.
2013-cü ilin sentyabr-oktyabr aylarında Suriyada baş vermiş “xəvaric” əqidəsinin həmfikirlərinin yığıncağından sonra Elçin Əkbərovun bizə qarşı münasibəti kəskin şəkildə korlanmağa başladı. Belə ki, əhli-sünnə əqidəsində olan şəxslərlə xəvaric əqidəsi ilə dinə sitayiş edən, özlərindən başqa şəxsləri müsəlman hesab etməyən qruplaşma arasında dini fikir ayrılığı yarandı. Xəvaric cərəyanının fikrini daşıyanlar hesab edirdilər ki, özlərindən başqa dünyada müsəlman yoxdur, digər təqiqət və əqidə nümayəndələri isə kafirdirlər.
Aramızda Qurani-Kərimin “ən-Nisa” surəsinin 60-cı ayəsində göstərilən fikirlə bağlı fikir ayrılığı yaranmışdı. Həmin fikrə görə, əgər bir müsəlman hər hansı bir məsələdən ötrü özünü müdafiə etmək üçün məhkəməyə müraciət edərsə, həmin müsəlman İslamdan çıxar, kafir olar. Kim bu fikri qəbul etmirsə, həmin şəxs də kafir hesab olunur. Buna görə də mən və mənim kimi Sumqayıtda bu fikri daşımayan şəxslərlə xəvaric təriqətli insanlar arasında uzun müddət idi ki, fikir mübahisəsi gedirdi. Hələ hadisədən 15 gün öncə Zaur adlı Sumqayıt şəhər sakini ilə həmin fikrə görə mübahisəmiz yaranmışdı, amma aramızda dava baş verməmişdi”.
Zərərçəkmişin sözlərinə görə, hadisə baş verən gün şəhərdə təsadüfən Elmarla qarşılaşıb: “Elmar mənə “eşitdim məni vurmaq istəyirsən?” dedikdə ona “get işinlə məşğul ol” dedim. Az müddət sonra zəng vurub xəvariclərin Sumqayıt şəhərindəki əmiri Elçin Əkbərovla görüşüb əqidə söhbəti etməyi təklif etdi. Razılaşdım. Sumqayıt xəvariclərindən olan Zaur Paşayev də zəng vurub mənimlə görüşmək istədiyini, əks halda “özümüz səni axtarıb tapacağıq” dedi.
Zaura təkrar zəng vurub “Soltan” çay evində görüşə biləcəyimizi dedim. Bundan sonra din, əqidə yoldaşlarım, kiçik qardaşım Ruslan Musayev və dostum Razim Ağayevlə ora getdim. Əqidə yoldaşlarımdan Elnur Nəzərəliyev, “Abduləziz” ləqəbli Vüqar Xəlilov, dini ləqəbləri “Abdulrəhim” və “Abdulla” olan şəxslər də orada idilər. Onlar əksər vaxtlar həmin çayxanada olurlar. Zaur və Elmar həmin gün mənə hədə-qorxu gəldiklərindən Rövşən Mirimov adlı tanışımın atasından qalmış avtomat silahı ondan istədim. Rövşən xahişimi nəzərə alıb avtomatı iki sandıqça ilə birlikdə mənə verdi. Eyni zamanda Qarabağ döyüşlərindən qalmış uzun müddət evin zirzəmisində saxladığım “F-1” qumbarasını da hər ehtimala qarşı özümlə götürüb çay evinə gəldim. Zaur Paşayevə zəng vurub çayxanada olduğumu dedim. O isə “Qarabağ” kinoteatrının yanına gəlməyimi istədi, razılaşmadım.
Zaur “səni vuracağıq, başına kaska tax gəl” deyərək yenə hədə-qorxu gəldi. Saat təxminən 20:30 radələrində Zaur, Anar, Elmar, Murad çayxanaya daxil oldular. Zaur söhbət etmək üçün məni həyətə çağırdı. Yanımdakılar buna imkan vermədikdə Zaurla Elmar “Allahu Əkbər” deyib üstümə hücum çəkdilər. Vüqar onların qarşısına keçmək istədikdə onu yumruqla vurdular, ara qarışdı, kimin kimi vurmasını görə bilmədim. Zaurla Elmarın əlində bıçaq vardı. Onlar mənə hücum çəkəndə mən də özümdə olan bıçaqla onları qorxuzmaq üçün sağa-sola fırlatdım. Sonra isə gödəkcəmin cibindən qumbaranı çıxarıb partladacağımı dedim.
Zaurun qorxub geri çəkilmədiyini görüncə qumbaranın halqasını çəkib döyüş vəziyyətinə gətirdim. Bundan sonra qorxub qaçmağa başladılar. Onların arxasınca getdim. Hələ küçədə dayandıqlarını, qumbaradan qorxmadıqlarını görüncə kolluqda gizlətdiyim avtomat silahı götürüb döyüş vəziyyətinə gətirdim. Qumbaranı isə sağ əlimdə tutmuşdum. Onların arxasınca qaçarkən ayağım ilişdi, yıxıldım, qumbara əlimdən düşdü.
Ani olaraq şoka düşdüm, qumbaranın açılmadığını görüb ayağa qalxıb qaçmaq istədikdə partladı, zərbə dalğası qəlpələrlə birlikdə məni yerə yıxdı. Sol əlimdə silah olduğundan yerə yıxılanda barmağım tətiyə dəydi, avtomatdan bir neçə dəfə atəş açıldı. Güllələrin hara dəydiyini bilmədim. Yaralanmışdım. Başımdan, boynumdan, qolumdan xəsarət almışdım. Qardaşım Ruslanın köməyi ilə maşına əyləşib yaşadığım evə getdim. Silahı və iki ədəd darağı zirzəmidə gizlətdim. Aptekdən bint, dərman alıb yaralarımı sarıdım... Sonra isə polisə zəng vurub hadisəni danışdım. Polis əməkdaşları məni evdən götürüb xəstəxanaya apardılar. Orada ilkin tibbi yardım göstəriləndən sonra Sumqayıt Şəhər Polis Şöbəsinə gətirildim”.
Qeyd edək ki, bu cinayət işi üzrə məhkəmə baxışı sentyabrın 14-də olacaq.
