Nərimanov Rayon Məhkəməsində qəsdən sağlamlığa yüngül zərər vurmada təqsirləndirilən Qasım Maqsudovun (adı, soyadı şərtidir) cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Kamal Babayevin sədrliyi ilə keçirilən prosesdə hökm oxunub.

Məhkəmənin hökmü ilə ona həmin maddə ilə 1000 manat miqdarında cərimə cəzası təyin edilib.

İttihama görə, hadisə bu il gecə saat 01 radələrində paytaxtın Nərimanov rayonu ərazisində qeydə alınıb.

Qasım Maqsudov həmin vaxt həyat yoldaşı, zərərçəkmiş Zəranə Maqsudova (adı, soyadı şərtidir) aralarında yaranmış mübahisə zamanı qadını əli ilə qəsdən vurub.

Nəticədə zərərçəkmiş şəxsin sağ saidində, sağ dirsək büküşündə və sol baldırında qançırlar, sağ bud və sağ baldır nahiyələrində isə hematomalar yaranıb. Xəsarətlər sağlamlığın qısa müddətə pozulmasına səbəb olan sağlamlığa yüngül zərər kimi qiymətləndirilib.

Məhkəmədə dindirilən Qasım Maqsudov özünü qismən təqsirli bilib. O deyib ki, 2015-ci ildən paytaxt ərazisində yerləşən stomatoloji poliklinikaların birində stomatoloq işləyir.

Onun sözlərinə görə, evli olduqları müddətdə həyat yoldaşı ilə aralarında əmlak məsələləri ilə bağlı tez-tez mübahisələr yaranıb.

Belə ki, qadın yaşadıqları evin onun anasının adına olduğunu bildirərək həmin evin, eləcə də valideynlərinin adına olan digər evlərin uşaqların adına keçirilməsini tələb edib.

Qasım Maqsudov bildirib ki, 2025-ci ilin dekabr ayının sonlarında rayonda olduğu vaxt Zəranə onunla əlaqə saxlayaraq evdə 100 000 manat pul olduğunu və həmin pulun götürüldüyünü deyib.

Təqsirləndirilən şəxs sonradan arvadının onun valideynlərinin evinə də gedərək onlardan pul tələb etdiyini öyrəndiyini söyləyib: “Sonra Zəranə mənə mesaj yazaraq evə gələrkən pulu özümlə gətirməyimi istədi. Hadisə günü evə gəldiyim zaman həyat yoldaşım yenidən məndən pul tələb etməyə başladı. Bu zaman aramızda mübahisə yarandı. Mübahisə zamanı iki azyaşlı övladımın yanında Zəranə üç dəfə mənim üzümə tüpürdü və nalayiq söz dedi. Onun bu hərəkətinə əsəbiləşərək arvadımın sifət nahiyəsinə bir dəfə sillə vurdum”.

Qasım Maqsudovun sözlərinə görə, bundan sonra qadın yıxılaraq paltar dolabına dəyib. Daha sonra ayağa qalxaraq onun üzərinə gəldikdə isə onu əli ilə itələyib və “bəsdir, əl çək” deyib.

Təqsirləndirilən şəxs əlavə edib ki, həyat yoldaşı onu vurmaq istəyərkən əli dolaba dəyib, daha sonra isə özünü dolaba vuraraq onun tərəfindən döyüldüyünü bildirib.

Hadisədən sonra Zəranə Məmmədova onun valideynlərinə zəng edərək onları evə çağırıb.

Təqsirləndirilən şəxs məhkəmənin suallarını cavablandırarkən evdə 100 000 manat pul olmadığını da bildirib.