Bakı Ağır Cinayətlər Məhkəməsində qətl törətməkdə təqsirləndirilən Hidayət Məstəliyevin (şərti adla) cinayət işi üzrə məhkəmə prosesi keçirilib.
Lent.az xəbər verir ki, hakim Səbuhi Hüseynovun sədrliyi ilə keçirilən məhkəmə şahid ifadələri ilə davam edib.
Şahid Ümid Mərdanov ölən Emil Rəcəblinin yaxın dostu olduğunu deyib:
"Həmin gün yeni il gecəsi idi. Dostum Emil zəng etdi ki, yeni ili sevdiyi xanımla birlikdə keçirmək istəyir, məkan danışıb. Mənə təklif etdi ki, ailəmi də götürüm, birlikdə gedək. Axşam saat 10-da görüşüb “Purple Karaoke Bar”a getdik. İçəridə seyrəklik idi. Masamızda əyləşdik, istirahət elədik. Sonra bu oğlan (təqsirləndirilən Hidayətə işarə edir) gəldi, mehribancasına görüşdük. İçəridə getdikcə adamlar çoxalmağa başlayırdı. Sonra tanımadığım bir xanım gəldi, Emillə görüşdü. Bundan sonra aləm qarışdı, səs-küy qopdu. Bir onu gördüm ki, Emili itələyib çölə çıxarmağa çalışırlar.
Mühafizədəki oğlan yanında iki adamla birlikdə onu obyektin qaranlıq tərəfinə aparır. Mübahisə, ardınca da dava başladı. Emil gedib maşınından bıçaq götürdü. Onu sakitləşdirməyə çalışdıq, dedik lazım deyil, qanqaraçılıq olmasın. Sözümüzə qulaq asdı, bıçağı aparıb təzədən maşınına qoydu. Məkanın bir əməkdaşından xahiş etdim ki, kurtkalarımızı gətirsin, çıxıb gedək. Geri dönəndə Emili əlində bıçaqla qapıya tərəf gəldiyini gördüm. Qapıda Hidayətlə qarşılaşdılar. Süpürləşmə, ara qarışıqlığı içində Emili qan içində yerdə uzanmış halda gördüm, vəziyyəti ağır idi. Tez təcili yardım çağırıb onu xəstəxanaya apardıq".
Növbəti proses 29 sentyabr saat 16:30-a təyin olunub.
Xatırladaq ki, hadisə 2026-cı il yanvarın 1-i gecə 2 radələrində Səbail rayonu, Bayıl qəsəbəsində yerləşən “Purple Karaoke Bar” gecə klubunun qarşısında qeydə alınıb. 36 yaşlı Hidayət Məstəliyev ilə 32 yaşlı Emil Rəcəbli arasında klubda mübahisə yaranıb. Sonra obyektin qarşısında Hidayət Məstəliyev E.Rəcəblini bıçaqlayıb. Ağır yaralanan Rəcəblinin həyatını xilas etmək mümkün olmayıb. O, xəstəxanaya aparılarkən yolda ölüb.
Hadisəni törətməkdə şübhəli bilinən Hidayət Məstəliyev saxlanılaraq istintaqa təhvil verilib.
Faktla bağlı Səbail Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb.
