Ermənistanın enerji sisteminin ilin sonuna qədər Azərbaycanın idarəçiliyinə verilə biləcəyi barədə sensasion iddia yayılıb- Rusiya onu təcili İrəvana göndərir...
Ermənistanın enerji sisteminin ilin sonuna qədər Azərbaycanın idarəçiliyinə verilə biləcəyi barədə sensasion iddia yayılıb.
Musavat.com “Svobodnaya Pressa”ya istinadən xəbər verir ki,“Insider Ermənistan” Telegram kanalı Ermənistanın enerji sisteminin Azərbaycana idarəetməyə verilə biləcəyini proqnozlaşdırıb.
Kanalın iddiasına əsasən, Ermənistan hakimiyyəti belə bir addımı Rusiya ilə münasibətlərin pisləşməsi və ölkənin enerji infrastrukturunun köhnəlməsi ilə əsaslandıra bilər.
Bununla belə, Ermənistan və Azərbaycan enerji sistemlərinin inteqrasiyası məsələsi artıq rəsmi səviyyədə gündəmə gətirilib. Ermənistanın baş naziri Nikol Paşinyan yanvar ayında iki ölkənin enerji sistemlərinin birləşdiriləcəyini və qarşılıqlı elektrik enerjisi idxalı və ixracının mümkün olacağını açıqlayıb.
Bu proses TRIPP layihəsi çərçivəsində yaradılması nəzərdə tutulan regional nəqliyyat və enerji bağlantıları ilə əlaqələndirilir.
Azərbaycan Prezidenti İlham Əliyev isə Naxçıvanda Azərbaycan televiziyasına verdiyi müsahibədə bildirib ki, TRIPP layihəsi çərçivəsində Azərbaycan mütəxəssisləri artıq Ermənistan ərazisində araşdırmalar aparıb və elektrik ötürücü xətlərin dayaqlarının yerləşdirilməsi üçün mümkün əraziləri müəyyənləşdiriblər.
Paşinyan da Azərbaycan prezidentinin bu açıqlamasını təsdiqləyərək, bununla bağlı 2025-ci il sentyabrın 5-də və 2026-cı ilin yanvarında məlumat yayıldığını bildirib.
Bu prosesin fonunda Ermənistan-Rusiya enerji əlaqələri ilə bağlı başqa bir mühüm hadisə gözlənilir. Ermənistanın baş naziri Nikol Paşinyanın sözlərinə görə, “Rosatom”un rəhbəri Aleksey Lixaçov bir neçə gündən sonra İrəvana səfər edəcək. Səfər zamanı Ermənistanda yeni atom elektrik stansiyasının tikintisi məsələsinin müzakirə olunacağı bildirilir. Paşinyan yeni AES məsələsinin Ermənistan üçün geosiyasi seçim olmadığını deyib. Baş nazirin sözlərinə görə, İrəvan üçün əsas meyar qiymət və keyfiyyət nisbətidir və ən yaxşı təklifi verən tərəflə əməkdaşlıq ediləcək. Bu açıqlama Ermənistanın enerji siyasətində ziddiyyətli istiqamətlərin paralel inkişaf etdiyini göstərir: İrəvan bir tərəfdən Rusiya ilə yeni AES layihəsini müzakirə edir, digər tərəfdən Azərbaycanla elektrik sistemlərinin inteqrasiyasını dərinləşdirir.
Erməni enerji təhlükəsizliyi üzrə ekspert, siyasi elmlər doktoru Vahe Davtyanın fikrincə, regional inteqrasiya adı altında Ermənistan üçün yeni enerji asılılığı formalaşa bilər. Davtyan hesab edir ki, Azərbaycanın Ermənistan enerji bazarına daxil olması gələcəkdə Bakının bu sahədə ciddi təsir imkanları əldə etməsinə səbəb ola bilər. Onun fikrincə, Azərbaycan hazırkı mərhələdə Ermənistanı sabit şəkildə elektrik enerjisi ilə təmin etmək üçün kifayət qədər böyük ixrac potensialına malik deyil.
Ekspertin təqdim etdiyi 2025-ci ilin ilk səkkiz ayına dair məlumatlara əsasən, Azərbaycanın elektrik enerjisi ixracı təxminən 10 faiz azalıb, ixracdan əldə olunan gəlirlər isə 8 faizdən çox aşağı düşüb. Davtyanın sözlərinə görə, Rusiyaya elektrik enerjisi ixracı təxminən 1,7 dəfə, Türkiyəyə ixrac 19,8 faiz, İrana ixrac isə 11,9 faiz azalıb. Eyni zamanda Azərbaycan xüsusilə Rusiyadan elektrik enerjisi idxalını artırıb. Ekspert Ermənistanın enerji sistemində Metsamor AES-in rolunu da xüsusi vurğulayır. Onun fikrincə, atom elektrik stansiyası ölkəyə elektrik enerjisi ixrac etmək və regional enerji layihələrində iştirak etmək imkanı verir.
Rusiya tərəfinə yaxın mövqeyi ilə tanınan politoloq, Avrasiya Analitik Klubunun rəhbəri Nikita Mendkoviç isə Ermənistan enerji sisteminin Azərbaycanın idarəçiliyinə verilməsi barədə xəbərləri daha geniş siyasi proseslərin fonunda qiymətləndirib. Mendkoviç hesab edir ki, belə bir ssenarinin gündəmə gəlməsi Ermənistanın son illərdə apardığı siyasətin məntiqi nəticəsi kimi təqdim olunur.
Politoloq Ermənistanın enerji şəbəkələrinin Azərbaycan tərəfindən idarə olunmasını mümkün hesab edilən siyasi proseslərin daha da irəli aparılması kimi qiymətləndirib. Onun fikrincə, Ermənistanın enerji sahəsində gələcək kursu Rusiya ilə münasibətlərin necə inkişaf etməsindən və İrəvanın Avropa İttifaqı ilə yaxınlaşma siyasətini hansı səviyyəyə çatdıracağından asılı olacaq.
Musavat.com
