İsrailin iri daşınmaz əmlak şirkətlərindən olan Hagag Group Azərbaycan bazarına daxil olmağa hazırlaşır. Şirkət Bakıda Sea Breeze Resort ərazisində iki böyük yaşayış layihəsinin həyata keçirilməsi ilə bağlı anlaşma memorandumları imzalayıb.
Hagag Group-un Tel-Əviv Fond Birjasına verdiyi məlumat əsasında İsrail mediasının yaydığı xəbərə görə, iki layihə ümumilikdə təxminən 3 500 mənzilin və 358 min kvadratmetr tikinti sahəsinin yaradılmasını nəzərdə tutur.
Layihələrdən daha böyüyündə təxminən 2 475, digərində isə 1 000-ə yaxın mənzilin tikilməsi planlaşdırılır.
Lakin sövdələşmə hələ yekunlaşmayıb. Hazırda imzalanmış sənədlər məcburi xarakter daşımayan anlaşma memorandumlarıdır. Şirkət qarşıdakı dövrdə layihələr üzrə due diligence – hüquqi, maliyyə və digər geniş yoxlamalar aparacaq. Yalnız bundan sonra tərəflər arasında yekun və məcburi müqavilələrin imzalanması nəzərdə tutulur.
Açıqlanan ilkin struktura əsasən, Hagag Group layihələrdə təxminən 80% paya sahib olacaq, qalan 20%-ə yaxın iştirak payı isə adı açıqlanmayan yerli tərəfdaşa məxsus olacaq.
Torpaq üçün $93 milyona qədər ödəniş
İki layihə üzrə torpaq sahələrinin əldə edilməsi üçün satıcıya ödəniləcək maksimal məbləğin 93 milyon ABŞ dolları təşkil edə biləcəyi bildirilir.
Layihənin maliyyələşdirmə modeli də diqqət çəkir. “Israel Hayom”un məlumatına görə, Hagag Group və yerli tərəfdaş ilkin mərhələdə təxminən 17 milyon dollar ödəməyi planlaşdırır. Torpaq üçün ödənişin qalan hissəsinin isə sonradan mənzillərin satışından əldə ediləcək vəsaitlər hesabına ödənilməsi nəzərdə tutulur.
Bu model şirkətə ilkin mərhələdə daha az kapital yatırmaqla böyük həcmli layihəyə daxil olmağa imkan verir. Eyni zamanda layihənin maliyyə modelində mənzillərin satış tempi əsas amillərdən birinə çevrilir.
Hagag Group-un açıqlamasına istinad edən İsrail mediası layihələrin Xəzər dənizinin birinci sahil xəttində yerləşəcəyini bildirir. “Israel Hayom” həmçinin Sea Breeze ərazisində mənzil qiymətlərinin Bakı bazarındakı təkliflərə əsasən təxminən 150 min dollardan başladığını yazır.
İsrail şirkətlərinin Sea Breeze ilə əməkdaşlığı genişlənir
Hagag Group Sea Breeze ilə əməkdaşlıq edən ilk İsrail şirkəti deyil.
2026-cı ilin martında Sea Breeze və İsrailin Mediterranean Towers Assisted Living şirkəti ərazidə yaşlı insanlar üçün xüsusi rezidensiyanın yaradılması barədə saziş imzalayıb.
Saziş MIPIM 2026 beynəlxalq daşınmaz əmlak sərgisi çərçivəsində Kann şəhərində Sea Breeze-in təsisçisi Emin Ağalarov, Sea Breeze Health Valley-nin baş icraçı direktoru Konstantin Grinfeld və Mediterranean Towers Assisted Living-in vitse-prezidenti və həmtəsisçisi Boris Levin tərəfindən imzalanıb. Layihə yaşayış, tibbi müşayiət və rekreasiya xidmətlərini bir kompleksdə birləşdirməyi nəzərdə tutur.
Sea Breeze İsrail idman bazarında da görünməyə başlayıb. 17 avqust 2025-ci ildə İsrailin “Makkabi Netanya” futbol klubu Sea Breeze Resort & Residences-in klubun yeni əsas sponsoru olduğunu açıqlayıb.
İsrailin ONE nəşrinin məlumatına görə, sponsorluq müqaviləsi çərçivəsində Sea Breeze kluba hər il 2,5 milyon şekel (redaktor: təxminən 1,430,061 AZN) ödəyir. Nəşr bu məbləğin klubun son illərdə əldə etdiyi orta sponsorluq gəlirindən təxminən iki dəfə yüksək olduğunu bildirib.
