Ali Məhkəmədə qəsdən sağlamlığa ağır zərər vurmada təqsirləndirilən Rüfət Pərvanəyevin barəsindəki qərardan verilən kassasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim İlkin Abdullayevin sədrliyi ilə keçirilən prosesdə qərar elan olunub.

Qərara əsasən, kassasiya şikayəti təmin edilməyib, qərar dəyişdirilmədən saxlanılıb.

İttihama görə, hadisə 2024-cü ildə gecə saat 02:30 radələrində Abşeron rayonunun Saray qəsəbəsində baş verib.

Belə ki, Rüfət Pərvanəyev zərərçəkmiş D.D.-nin (adı, soyadı şərtidir) evində usta işləyən Səxi adlı tanışından ona olan pul borcunu almaq üçün həmin ünvana gəlib. Zərərçəkmiş şəxs Səxini soruşduqda gecə vaxtı evinə gəldiyinə görə aralarında mübahisə yaranıb.

Mübahisə qısa zamanda gərginləşərək fiziki qarşıdurmaya çevrilib.

İstintaqla müəyyən edilib ki, təqsirləndirilən şəxs üzərində gəzdirdiyi cib bıçağını çıxararaq zərərçəkmişə bir dəfə zərbə endirib.

Bıçaq zərbəsi zərərçəkmişin qarnının sağ nahiyəsinə dəyib. Məhkəmə-tibbi ekspertizasının rəyinə əsasən, nəticədə zərərçəkmiş qarın boşluğuna nüfuz edən, qaraciyəri zədələyən deşilmiş-kəsilmiş yara alıb. Həmin xəsarət həyat üçün təhlükəli olmaqla sağlamlığa qəsdən ağır zərər vurma kateqoriyasına aid edilib.

Sumqayıt Ağır Cinayətlər Məhkəməsinin hökmü ilə Rüfət Pərvanəyev Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə təqsirli bilinərək 5 il müddətinə azadlıqdan məhrumetmə cəzasına məhkum edilib. Sumqayıt Apellyasiya Məhkəməsi birinci instansiya məhkəməsinin hökmünü dəyişdirib. Apellyasiya instansiyası təqsirləndirilən şəxsə həmin maddə ilə 6 il müddətinə azadlıqdan məhrumetmə cəzası təyin edib.

Bundan əlavə, Cinayət Məcəlləsinin 67.1-ci maddəsinə əsasən, Rüfət Pərvanəyev barəsində Sumqayıt Apellyasiya Məhkəməsinin 2012-ci il tarixli qərarı ilə təyin edilmiş və icra olunmamış 2 000 manat cərimə cəzasının qalan 1 750 manatlıq hissəsi yeni təyin olunmuş cəza ilə tam birləşdirilib.

Beləliklə, məhkəmə ona qəti olaraq 6 il müddətinə azadlıqdan məhrum etmə cəzası və 1 750 manat məbləğində cərimə cəzası təyin edib.