Veysəloğlu Şirkətlər Qrupunun elan etdiyi “Qida Təhlükəsizliyi Ayı” çərçivəsində “OBA Market” MMC ilə “Keyfiyyət Assosiasiyası” İctimai Birliyi arasında qarşılıqlı əməkdaşlığı əhatə edən anlaşma memorandumu imzalanıb.
"DİA-AZ" xəbər verir ki, bu sənəd tərəflər arasında beynəlxalq keyfiyyət standartlarının tətbiqi, mövcud idarəetmə proseslərinin sistemləşdirilməsi və təkmilləşdirilməsi istiqamətində uzunmüddətli əməkdaşlıq məqsədi daşıyır.
Memorandum “OBA Market” MMC-nin İdarə Heyətinin sədri Natəvan İbrahimova və Keyfiyyət Assosiasiyasının sədri Samir Novruzlu tərəfindən imzalanıb. İmzalanma mərasimində hər iki qurumun rəhbər heyəti və əməkdaşları iştirak ediblər.
Tərəflər arasında imzalanmış bu mühüm sənəd “OBA Market” MMC-nin fəaliyyət sahələrinə uyğun olaraq beynəlxalq standartların tətbiqi istiqamətində birgə layihələrin hazırlanması və həyata keçirilməsini nəzərdə tutur. Əməkdaşlıq çərçivəsində müxtəlif mövzularda təlimlərin, seminarların və təcrübə mübadiləsi proqramlarının təşkili də planlaşdırılır.
“OBA” marketlər şəbəkəsi artıq 3 ildən çoxdur ki, diskaunt market konsepsiyasından "qonşu market" modelinə keçid edib. Bununla yanaşı, tədarük zəncirinin keyfiyyətli idarə olunması üçün mərkəzi anbar sistemindən başlayaraq istehsalçılarda keyfiyyət standartlarının tətbiqinədək bir sıra mühüm və məzmunlu layihələr həyata keçirilib. İmzalanan memorandum da məhz bu strateji hədəflərin davamıdır.
Sənəd tərəflər arasında yalnız hüquqi əməkdaşlıq çərçivəsini deyil, həm də qarşılıqlı etimad və inkişaf üçün ortaq baxışların formalaşdırılmasını təmin edir. Tərəflər bu memorandum əsasında ekspert və mütəxəssislərin mübadiləsi, birgə işçi qruplarının yaradılması, mətbuat konfranslarının və müxtəlif görüşlərin təşkili istiqamətində fəaliyyətlərini davam etdirməyi planlaşdırırlar. Bu əməkdaşlıq “OBA Market”in keyfiyyətə yönəlik inkişaf strategiyasının bir hissəsi olaraq daha şəffaf, effektiv və müasir idarəetmə modelinin qurulmasına xidmət edəcək.
“Keyfiyyət Assosiasiyası” İctimai Birliyinin nümayəndə heyəti daha sonra Veysəloğlu Şirkətlər Qrupunun mərkəzi ofisində görüş keçirib. Görüş zamanı Şirkətlər Qrupunun rəsmiləri ilə “Qida Təhlükəsizliyi Ayı” çərçivəsində bir sıra istiqamətlər üzrə əməkdaşlığın həyata keçirilməsi ilə bağlı razılıq əldə olunub.
Qeyd edək ki, 2016-cı ildən fəaliyyət göstərən “OBA Market” MMC hazırda 1600-dən çox marketi və 10 000-ə yaxın əməkdaşı ilə vətəndaşlara xidmət göstərir.
