“Hazırda Paşinyan ağıllansa da, Sarkisyanın və keçmiş dostu Robert Köçəryanın ağıllandığını söyləmək çətindir”.

"DİA-AZ" xəbər verir ki, bunu politoloq Elxan Şahinoğlu Ermənistanın keçmiş prezidenti Serj Sarkisyanın baş nazir Nikol Paşinyanın parlament seçkilərində müxalifətin qalib gələcəyi təqdirdə, sentyabr ayında Azərbaycanla yeni müharibə riski ilə bağlı səsləndirdiyi fikrə reaksiyasına münasibət bildirərkən deyib.Politoloq Sarkisyanın jurnalistlərə açıqlamasında Paşinyanın iddialarının əsassız olduğunu bildirdiyini qeyd edib:

“Yəni Sarkisyan demək istəyib ki, o hakimiyyətə gələrsə, Azərbaycanla müharibəyə başlamayacaq. Bu gün Azərbaycanla müharibə ehtimalını inkar edən Sarkisyan 28 il əvvəl keçmiş Dağlıq Qarabağa ətraf əraziləri boşaltmayacaqlarını qətiyyətlə söyləmişdi. O prezident olduğu illərdə bu “siyasətinə” sadiq qaldı, hətta Belarus Prezidenti Aleksandr Lukaşenkonun Kollektiv Təhükəsizlik Müqaviləsi Təşkilatının İrəvanda keçirilən sammitində “Serj, boş olan 5 rayonu Azərbaycana qaytar” təklifinə “əgər mən həmin rayonları qaytarsam, Azərbaycan yolları kəsəcək və Qarabağı “işğal” edəcək”. demişdi. Sarkisyanı baş nazir kreslosunda əvəz edən Paşinyan da eyni yolla getmək istədi. Müharibə reallıqları dəyişdi. Hazırda Paşinyan ağıllansa da, Sarkisyanın və keçmiş dostu Robert Köçəryanın ağıllandığını söyləmək çətindir. Bu ikili Qarabağ barədə açıqlama verməkdən çəkinsələr də, Azərbaycanla sülh quruculuğunu necə davam etdirəcəklərini bilmirlər”.