Ən əclaf işlərlə məşğul ol, pozğun ol, min hoqqadan çıx, amma səhərsi bir şəhid ailəsinə yardım elə, yaxud da yardımda rolun olsun, baş tacına çevriləcəksən.
Yəni bu qədərmi acizləşdik?
Adamın içini yeyir bu mənzərə. Oğlun, nər balan, igid balan, kişi balan Qarabağ uğrunda canını fəda etsin, sən də hansısa üzdənirağa sənə yardım etdiyi üçün dönə-dönə təşəkkür elə, qarşısında aciz qal.
Bəs ideologiya? Axı o kişilər əsl kişilər idi!? Onların balaları, anaları niyə özünü tanımayan adamların qarşısında bu vəziyyəti yaşamalıdır?
Başa düşürəm, çətindir, dolanışıq, məişət problemləri adamı sıxır, amma çörəyi kimin verdiyi, çörəyin haradan gəldiyi önəmli deyil? Belə çıxır ki, biz həm də öz övladlarımızı nə yolla olur-olsun pul qazanmağa təşviq edirik? Yaxud da nümunə oluruq?
Ümumiyyətlə, niyə belə edirsiniz? Hər yerindən duran, çirkab içində batan, əxlaqsızı, mənəviyyatsızı, pozğunu niyə şəhid, qazi, Vətən adı ilə özünü təmizə çıxarmalıdır? Niyə buna şərait yaradılır?
Kimə baxırsan, xalqı özəlləşdirir. "Mənim gözəl xalqım". Birincisi, xalq haradan sənin oldu? İkincisi, xalq nədir, kimdir, anlayırsanmı?
Bilirəm, burada yazanlar olacaq ki, bəs sən özün nə etmisən? Mənim kiməsə maddi köməyə gücün çatmasa da, bir qazimizin probleminin həllində rolum olub. Dostlar pul göndərib, geyimini, yemək-içməyini, cib xərcliyini təmin etmişik. Müvəqqəti də olsa.
Dəfələrlə özünü yandıran qazilərlə bağlı çıxış etmişəm. Şəhidlərimizin həyatını işıqlandırmışam. Yazılar yazmışam. Şuşadan yazdığım reportajla qalib olmuşam və həmin yazını oxuyanlar yaxşı bilir, orada nələrdən və kimlərdən yazmışam. Şeirlərimin yarısı müharibə mövzusundadır.
Xülasə, mən bu Vətən uğrunda silahla döyüşməsəm də, bacardığım şeylərlə həmişə onların yanında olmuşam. Və heç vaxt da bunları nə dilə gətirmiş, nə də bundan xal yığmaq üçün istifadə etmişəm.
İndi bu yazını yazmaqda da məqsədim budur ki, məni yandıran o boyda oğulların analarının, ailələrinin ayaqlarının tozu belə olmayacaq adamlardan mədət ummağıdır.
Allah şahiddir ki, çox pis oluram...
Eminquey AKİF - "DİA-AZ"
