“Nikol Paşinyan tənqid olunacağı halda günahı başqasının üzərinə atmaq üçün Rusiyanı Ermənistandan Azərbaycan və Türkiyə sərhədlərinə qədər olan və daha sonra “Tramp marşrutu” ilə birləşəcək dəmir yolu hissələrinin bərpasına cəlb etmək istəyir".

“Cebheinfo.az”-ın məlumatına görə, Rusiya Dövlət Dumasının MDB Ölkələri Komitəsinin sədr müavini Konstantin Zatulin belə deyib.

Zatulin Paşinyanın Ermənistandan Azərbaycan və Türkiyə sərhədlərinə qədər dəmir yolu hissələrinin bərpası ilə bağlı Rusiyaya müraciət etməsini belə şərh edib.

Qeyd edək ki, bu barədə yanvarın 15-də açıqlama verən Nikol Paşinyan sözügedən məsələni Rusiya Prezidenti Vladimir Putinlə, eləcə də hökumət səviyyəsində müzakirə etdiyini deyib.

Zatulinin sözlərinə görə, ABŞ və Ermənistan arasında qismən açıqlanan müqavilələr göstərir ki, bu dəhlizdən tranzitdən qazanc əldə edəcək şirkətlərin 76 faizi ABŞ-yə, faizi isə Ermənistana məxsus olacaq.

“Başqa heç kim bu işdə iştirak edə bilməz. Rusiya bəzi funksiyalarda iştirak etsə də, bu şirkətin təsisçiləri və səhmdarları arasında ola bilməz. Bundan sonra Paşinyan Rusiyanın maraqlarını görməzdən gəlməsi ilə bağlı tənqidləri yayındırmaq üçün bir növ jest etməkdən narahat olmağa başladı”, - deyə rusiyalı depuatat vurğulayıb.

“Ermənistan günahı Rusiyanın üzərinə atmaq istəyir. Moskvanın maraqları onu maraqlandırmır. Söhbət Azərbaycan və Türkiyəyə bitişik ərazilərdən gedir. Paşinyan üçün Rusiyanı bu layihələrə cəlb etmək vacibdir ki, o, hər yerdə Rusiyanın iştirak etdiyini iddia edə bilsin. Kobud desək, günahı Rusiyanın üzərinə yıxsın. Bu, əvvəlcə Qarabağa dəvət edilən, sonra isə faktiki olaraq nəzərə alınmayan sülhməramlı kontingentimizlə baş verənlərlə təxminən eynidir. Sadəcə başa düşməliyik ki, Paşinyan bizim maraqlarımıza uyğun hərəkət etmir. O, Qərblə müttəfiqliyə və dostluğa maya qoyur. Onun təklifləri dəfələrlə təhlil olunmalıdır ki, heç bir problem olmasın”,-deyə Zatulin əlavə edib.

Göründüyü kimi, avantürist açıqlamaları ilə tanınan Konstantin Zatulinin növbəti təxribatçı fikirlər səsləndirməklə dolayısı ilə Rusiyanın Cənubi Qafqazdakı imperiya maraqlarını dilə gətirib. Əvvəla, Zatulinin Ermənistanın Baş naziri haqqında belə tənqidi danışmasının səbəbi var. Paşinyan şovinist açıqlamalarına görə Zatulinin Ermənistana girişinə qadağa qoyub. Zatulinin Ermənistan ərazisindəki dəmir yollarının təmiri ilə bağlı dediklərinə gəlincə, bu, Rusiya tərəfinin Paşinyanın təklifini qəbul etmədiyini göstərir. Yəni Zatulin regionda nəqliyyat dəhlizlərinin açılmasında Moskvanın maraqlarının nəzərə alınmasını və Rusiyanın “Tramp marşrutu”nda əsas səhmdarlardan biri olmasını şərt kimi irəli sürür.

Deputat yalnız bu halda Rusiyanın Cənubi Qafqaz Dəmir Yollarının təmiri ilə bağlı Paşinyanın təkliflərini məqbul hesab edir. Bununla da Zatulin Zəngəzur dəhlizinə nəzarətin Rusiyaya verilməsinin vacibliyinə işarə edir. Halbuki, Ermənistanla 2008-ci ildə imzalanmaış müqaviləyə görə Rusiya tərəfi Cənubi Qafqaz Dəmir Yollarının təmirinə və modernləşdirilməsinə dair öhdəlik götürüb. Sənəddə qeyd edilir ki, Rusiya öz öhdəliklərini yerinə yetirmədikdə Ermənistana 57 milyon dollar vəsait ödəməlidir. Rusiya isə bu razılaşmaya nəinki əməl etmir, üstəlik Zəngəzur dəhlizinin əsas təsisçilərindən biri olmasını istəyir. ABŞ-nin isə buna razı olacağı inandırıcı görünmür.

Zatulinin 44 günlük müharibədən sonra Qarabağda yerləşdirilmiş Rusiya sülhməramlılarını xatırlatmaqla əslində, Ermənistana deyil, həm də Azərbaycana qarşı avantürist mövqe nümayiş etdirir. Onun iddialarına görə, sanki Rusiya sülhməramlı qüvvələri bölgəni tərk etməməli, Azərbaycan ərazisində qalmalı imiş. Əvvəla, Qarabağdakı erməni əhalisi könüllü olaraq bölgəni tərk etdiyinə və separatçı rejim ləğv edildiyinə görə Rusiya sülühməramlı qüvvələrinin Azərbaycan ərazisində qalmasına ehtiyac yox idi. İkincisi, sülhməramlıların çıxarılması qərarını Rusiya rəhbərliyi özü qəbul edib. Üçüncüsü, 2020-ci il 10 noyabr Bəyanatında sülhməramlı qüvvələrin qalma müddəti 5 ildən artıq nəzərdə tutulmamışdı. Üç il sonra onlar öz missiyasını başa vurduğundan, Azərbaycan ərazisini tərk etməli oldu. Sadəcə olaraq, Zatulinin bu cür açıqlama verməklə başqa ölkələrə qarşı imperiya maraqlarından çıxış edir.

Müşfiq Abdulla
“Cebheinfo.az”