Böyük Azərbaycan Ocaqları (BAO) birliyi bu günlərdə “Yaxın Şərq hadisələri və Güney Azərbaycan məsələsi” mövzusunda konfrans keçirib.
Əsas çıxışçı Sədrəddin Soltan hazırda Yaxın Şərqdə baş verən hadisələri dünyanın böyük güclərinin maraqlarının toqquşmasının nəticəsi adlandırıb. Bu hadisələr Qərbin neçə illərdir dövriyyəyə buraxdığı “Yaxın Şərq layihəsi”nin tərkib hissəsi adlandırılır. Layihə gerşəkləşdiyi halda Yaxın Şərq ölkələri dövlətlərinin sərhədlərinin belə dəyişəcəyi nəzərə çatdırılıb.
İndiki halda əsas maraqlı tərəflər kimi bir-birinə qarşı vuruşan “İraq Şam İslam Dövləti” (İŞİD) terror qruplaşması ilə kürd yaraqlıları göstərilsə də əslində bunun arxasında böyük güclərin maraqları olduğu iddia edilib. Bölgədə kürdlərin maraqlarının qorunması eyni zamanda dünyanın aparıcı güclərinin maraqlarının qorunmasına adekvat sayılıb.
Bu halda dövlət olaraq Türkiyəyə, Güney Azərbaycan türklərinin ərazilərinə təhlükənin yarandığı iddia edilib. Kürdlərin Güney Azərbaycanın qərb ərazilərinə iddialarına rəsmi Tehranın reaksiya verməməsi Azərbaycan torpaqlarını qurban verməklə özünü gələcək kürd ərazi iddialarından qorumaq cəhdi sayılıb. Hazırda İraqda türkmənlərin yaşadıqları ərazilərə İraqın şimalındakı kürd muxtariyyətinin iddia etməsi əsassız adlandırılıb.
Döyüşlərin Türkiyə sərhədlərinə yaxın yerdə getməsinə baxmayaraq, rəsmi Ankaranın dünyanın dəstəklədiyi kürdlərə dəstək verməməsi təqdir edilib. Habelə, Türkiyənin kürdlərə hərbi yardım göstərməkdən imtina etməsi də bəyan edilib. Kürdlərin bölgədə güclənməsinin gələcəkdə Türkiyəyə ərazi iddialarına səbəb olacağı vurğulanıb. Həm də dünya gücləri gələcəkdə kürdlər tərəfindən Türkiyəyə belə iddiaların olmayacağına zəmanət vermirlər.
Belə durumdan irəli gələrək Güney Azərbaycan türklərinin Urmiya şəhərində terrorçu PKK, onun qanadları olan YPD və PJAK əleyhinə keçirdikləri aksiyalar bəyənilib. Rəsmi Tehranın bu aksiyalara müdaxiləsi, aksiya fəallarını həbsə alması pislənilib. Həmin aksiyalar zamanı saxlanılan milli fəalların azadlığa buraxılmaları tələb edilib. Güney Azərbaycan türklərinə öz ərazilərini kürd birləşmələrinin ehtimal edilən silahlı hücumlarından qorumaq üçün indidən tədbirlər görmələrinin vacibliyi barədə çağırış edilib.
