Bu gün Şəmkir Rayon Məhkəməsində 7 il erməni əsirliyində qalmış keçmiş əsir Dilqəm Əsgərovla oğlu Kürdoğlu Əsgərov arasında məhkəmə çəkişməsi üzrə ilk iclas keçirilib.
Bu barədə Musavat.com-a açıqlamasında Kürdoğlu Əsgərov məlumat verib.
Onun sözlərinə görə, məhkəmə zamanı hakimlər tərəflərə müvafiq protokolları təqdim edib, onları dinləyib və növbəti iclasın vaxtını müəyyənləşdiriblər.
“Bu gün məhkəmədə ilk iclasımız oldu. Atam məhkəməyə mənim əleyhimə danışan bir jurnalistlə gəlmişdi. Sənədlərə baxıldı, bizə protokollar təqdim edildi və növbəti məhkəmə günü təyin olundu. Növbəti iclas sentyabrın 9-da keçiriləcək”, – deyə Kürdoğlu Əsgərov bildirib.
Qeyd edək ki, Kürdoğlu Əsgərov bundan əvvəl atası ilə aralarında yaranmış mübahisə zamanı Dilqəm Əsgərovun ona dəmir boru ilə hücum edərək xəsarət yetirdiyini iddia edib. Onun sözlərinə görə, hadisədən sonra atası 102 xidmətinə və Daxili İşlər Nazirliyinə onun barəsində şikayət edib.
Kürdoğlu Əsgərov bildirib ki, hadisədən sonra əvvəlcə xəstəxanada müayinə olunub, daha sonra polisə müraciət edib:
“Xəstəxanada müayinə olunduqdan sonra polis idarəsinə getdim. Mənə dedilər ki, barəmdə 102 xidmətinə və Daxili İşlər Nazirliyinə şikayət olunub. Guya narkomanam və onu öldürməklə hədələyirəm. Polislərə bildirdim ki, o insan mənə şər-böhtan atan biridir. Üzümdə, qolumda, burnumda olan xəsarətləri göstərdim. Polislər baxıb həqiqətən xəsarət aldığımı gördülər”.
Onun sözlərinə görə, Şəmkir Rayon Polis Şöbəsinin əməkdaşları tərəfindən narkoloji müayinədən keçirilməsi üçün Gəncə şəhərindəki Narkologiya Mərkəzinə aparılıb.
“Şəmkir polislərinə təşəkkür edirəm, məsələni ciddi araşdırdılar. Məni Gəncə şəhərindəki Narkologiya Mərkəzinə apardılar, müayinədən keçirdilər. Məlum oldu ki, mən narkotik istifadəçisi deyiləm. Onun dediklərinin böhtan olduğunu bildirdim”, – deyə Kürdoğlu Əsgərov qeyd edib.
Kürdoğlu Əsgərov həmçinin bildirib ki, hadisə ilə bağlı ərazidəki təhlükəsizlik kameralarının görüntüləri araşdırılıb. Onun iddiasına görə, görüntülər əsasında ona qarşı fiziki zor tətbiq edildiyi müəyyənləşdirilib və nəticədə Dilqəm Əsgərov barəsində cinayət işi başlanıb.
“Polis əməkdaşları həmin ərazinin videomüşahidə görüntülərini əldə etdilər. Kamera görüntülərindən aydın oldu ki, mənə şər atılır və məni özü boru ilə vurur. Nəticədə onun barəsində cinayət işi qaldırıldı”, – deyə o bildirib.
Kürdoğlu Əsgərov Daxili İşlər Nazirliyinin məsələni nəzarətə götürdüyünü də deyib:
“Əgər mən cinayətkar və ya narkoman olsaydım, barəmdə cinayət işi açılardı. Dövlətimizə və polis orqanlarımıza təşəkkür edirəm. Daxili İşlər Nazirliyi məsələni nəzarətə götürdü və araşdırma aparıldığını açıqladı. Araşdırmanın nəticəsində həmin şəxs barəsində cinayət işi açıldı”.
