Radioloqlar üsyanda: “Məzuniyyətə çıxmaq bizim üçün maddi cəzaya çevrilib!” — Anar müəllim, bu suallara kim cavab verəcək?
TƏBİB-də rəhbərlik dəyişdi.
Kabinetlər dəyişdi.
Vəzifələr dəyişdi.
Rəhbər şəxslər dəyişdi.
Bəs həkimin problemi dəyişdimi?
Görünən budur ki, yox!
Əksinə, TƏBİB-in tabeliyindəki tibb müəssisələrində çalışan həkimlərin redaksiyamıza müraciətləri göstərir ki, illərdir müzakirə olunan bir sıra problemlər hələ də öz həllini tapmayıb.
İndi isə növbəti narazılıq şüa diaqnostikası sahəsində çalışan həkimlərdən gəlir.
Həkimlərin iddiasına görə, məzuniyyətə çıxdıqları zaman onların aylıq gəlirlərində ciddi azalma yaranır. Səbəb kimi isə bonusların məzuniyyət ödənişində nəzərə alınmaması göstərilir.
Bizə müraciət edən həkim konkret nümunə gətirir:
“01.08-də məzuniyyətə çıxan həkim 2700 manat alır, 10.08-də çıxan isə 1600 manat. Sentyabrdan da 9 günlük maaş kəsiləcək.”
Bir daha oxuyaq:
2700 manat → 1600 manat!
Fərq – 1100 manat!
Bu, artıq sadəcə “məzuniyyət hesablaması” deyil.
Bu, həkimin ailə büdcəsinə, gəlirinə və əmək motivasiyasına birbaşa təsir edən məsələdir.
BƏS BU FƏRQ NƏYİN HESABINA YARANIR?
Əgər həkimin aldığı bonus onun gördüyü işin, xəstə sayının, xidmət həcminin və peşə fəaliyyətinin nəticəsidirsə, niyə həmin gəlir məzuniyyət zamanı birdən-birə yoxa çıxır?
Əgər bonus əməkhaqqının tərkib hissəsi hesab edilmir, onda:
Bu pul həkimə nə üçün və hansı meyarla verilir?
Bonusların hesablanması hansı sənədlə tənzimlənir?
Bu meyarlar həkimlərə açıq şəkildə izah edilibmi?*
Niyə həkim məzuniyyətə çıxanda gəlirinin azalacağını əvvəlcədən bilməli olur?
Daha bir ciddi məqam:
Həkimlərin sözlərinə görə, ultrasəs mütəxəssisləri ən aşağı bonus alanlar arasındadır. Digər ixtisaslarda – cərrah, ginekoloq, kardioloq və s. – bonusların daha yüksək olduğu bildirilir.
O zaman sual daha da böyüyür:
TƏBİB-də həkimin əməyinin qiyməti hansı meyarla müəyyənləşdirilir?
Eyni xəstəxana.
Eyni sistem.
Eyni rəhbərlik.
Amma fərqli bonuslar.
Meyar nədir?
Şəffafdırmı?
Hamı bilir?
Yoxsa həkim yalnız maaş kartına pul köçəndə nəticəni görür?
TƏBİB-DƏ RƏHBƏRLİK DƏYİŞİR, BƏS SİSTEM NİYƏ DƏYİŞMİR?
TƏBİB-in rəhbərliyində dəyişikliklər cəmiyyətdə yeni səhifə açılacağı gözləntisi yaradıb.
Amma səhiyyə sistemində dəyişiklik yalnız vəzifə və yer dəyişiklikləri ilə ölçülə bilməz.
Həkim yenə narazıdırsa,
tibb işçisi yenə maaşının hesablanmasını anlaya bilmirsə,
xəstə yenə növbədə gözləyirsə,
sistemdə illərdir mövcud olan problemlər yenə yerində qalırsa,
onda ortaya çox sadə sual çıxır:
NƏ DƏYİŞDİ?
Kabinetlər?
Rəhbərlər?
Adlar?
Yoxsa həqiqətən sistem?
Çünki cəmiyyət artıq “islahat görüntüsü” deyil, real nəticə görmək istəyir.
TƏBİB-in İcraçı direktoru Anar Bayramovun qarşısında cavab gözləyən kifayət qədər ciddi suallar var.
Niyə həkim məzuniyyətə çıxanda yüzlərlə manat itirməli olur?
Bonusların məzuniyyət hesablamasına daxil edilməməsinin hüquqi əsası nədir?
01 avqustla 10 avqust arasında məzuniyyətə çıxan həkim arasında 1100 manatlıq fərq hansı mexanizmdən yaranır?
Həkimlərin bu narazılığı araşdırılıbmı?
TƏBİB rəhbərliyi həkimlərlə görüşüb bu məsələyə aydınlıq gətirəcəkmi?
Bonus sistemi niyə açıq və şəffaf şəkildə ictimaiyyətə təqdim edilmir?
Və ən vacib sual:
Həkim məzuniyyətə çıxmaqdan niyə qorxmalıdır?
Məzuniyyət insanın qanuni haqqıdır.
Əgər həkim məzuniyyətə çıxarkən “görəsən bu ay nə qədər pul itirəcəyəm?” deyə düşünürsə, burada artıq təkcə maliyyə məsələsi yox, idarəetmə problemi də var.
HƏKİMİ DİNLƏMƏDƏN XƏSTƏNİ MƏMNUN ETMƏK OLARMI?
Səhiyyə sisteminin əsas dayağı nə bina, nə cihaz, nə də kabinetdir.
Əsas dayaqlardan biri həkimdir.
Həkimin əməyinə münasibət necədirsə, sabah xəstəyə göstərilən xidmətin keyfiyyətinə münasibət də bundan təsirlənəcək.
Bu gün radioloq soruşur:
“Mənim bonusum niyə kəsilir?”
Sabah başqa ixtisasın həkimi soruşacaq:
“Mənim əməkhaqqım niyə belə hesablanır?”
Bir müddət sonra isə cəmiyyət soruşacaq:
“TƏBİB-də bu qədər dəyişiklikdən sonra nə dəyişdi?”
JURNALİST OLARAQ SUALLARIMIZIN CAVABINI GÖZLƏYİRİK.
Bu yazı həkimlərin iddialarının araşdırılması və TƏBİB rəhbərliyinin mövqeyinin öyrənilməsi məqsədi daşıyır.
TƏBİB rəhbərliyi cavab verəcəkmi?
Yoxsa yenə bir neçə vəzifəli şəxs dəyişəcək, bir neçə kabinetin qapısı başqa adla açılacaq və “köhnə hamam, köhnə tas”davam edəcək?
Çünki səhiyyə sistemində dəyişiklik rəhbərin kreslosunun dəyişməsi deyil.
Dəyişiklik həkimin haqqının qorunması, xəstənin probleminin həlli və sistemə olan etimadın bərpa edilməsidir.
Anar Bayramov, indi söz sizindir.
HƏKİMLƏR CAVAB GÖZLƏYİR.
Şəfəq Ağacan
