Avqustun 31-də Bişkekdə Azərbaycan Prezidenti İlham Əliyev və Ermənistanın Baş naziri Nikol Paşinyan bir araya gəldilər. İki ölkə rəhbərinin görüşü Azərbaycan-Ermənistan münasibətləri fonunda baş tutan növbəti birbaşa təmas kimi diqqət çəkdi. Görüşün ardınca tərəflər arasında münasibətlərin hazırkı vəziyyəti və regionda sülh perspektivləri ilə bağlı müxtəlif fikirlər meydana gəldi. Bu baxımdan, liderlərin birbaşa təması iki ölkə arasında münasibətlərin gələcək inkişafı ilə bağlı müzakirələrdə diqqət çəkən məqamlardan biri kimi qiymətləndirilir.

Erməni jurnalist və siyasi ekspert Natali Aleksanyan Sherg.az-a görüşü çox müsbət qiymətləndirdiyini söyləyib:

"Ermənistan və Azərbaycan rəhbərləri arasında istənilən birbaşa təmas bu gün böyük əhəmiyyət daşıyır. Xüsusilə də münasibətlərin tədricən münaqişə məntiqindən sülh və əməkdaşlıq məntiqinə keçdiyi bir mərhələdə bu, olduqca vacibdir.

Mənim üçün xüsusilə vacib olan odur ki, hər iki tərəfdən Ermənistan-Azərbaycan münasibətlərinin hazırda normal inkişaf etdiyi barədə bəyanatlar səslənir. Bu, qarşılıqlı etimadın möhkəmləndirilməsi üçün zəruri olan mühitin tədricən formalaşdığını göstərir.

Sülh müqaviləsinə gəlincə, hesab etmirəm ki, konkret müddətləri süni şəkildə müəyyənləşdirmək lazımdır. Daha vacib olan onun dayanıqlı olması, qarşılıqlı hörmətə və uzunmüddətli sülhə əsaslanmasıdır. İnanıram ki, bu gün biz sülhə əvvəlkindən daha yaxınıq".

Analitik qryd edib ki, müqavilənin məhz harada imzalanacağı siyasi qərarlar məsələsidir:

"Əgər Amerika Birləşmiş Ştatları sülhün yekun şəkildə möhkəmləndirilməsinə töhfə verə bilsə, mən belə bir imkanı yalnız alqışlayaram. Lakin mənim üçün vacib olan sənədin hansı ölkədə imzalanması deyil, onun həqiqətən Ermənistan və Azərbaycan münasibətlərində yeni səhifənin başlanğıcına çevrilməsidir.

Biz sadə bir şeyi başa düşməliyik: ermənilər və azərbaycanlılar qonşudurlar və bir-birlərinə qarşı düşmənçilik olmadan yanaşı yaşamağı öyrənməlidirlər".

Ekspert vurğulayıb ki, sülh yalnız iki liderin imzası demək deyil:

"Sülh, həm də cəmiyyətlər arasında münasibətlərin bərpası, ticarətin inkişafı, yolların açılması, insanların sərbəst ünsiyyəti və mehriban qonşuluq münasibətlərinin formalaşdırılması deməkdir.

İnanmaq istəyirəm ki, regionumuz üçün qarşıdakı illər müharibə deyil, sülh, sabitlik və inkişaf illəri olacaq".