Rusiya Xarici İşlər Nazirliyinin rəsmi nümayəndəsi Mariya Zaxarova keçirdiyi brifinqdə bildirib ki, Tbilisi ölkənin suverenliyinin bərpası istiqamətində düşünülmüş və qətiyyətli seçim edib.
Zaxarovanın sözlərinə görə, Moskva Tbilisinin xarici diqtədən uzaqlaşmaq cəhdlərini anlayışla qarşılayır və Gürcüstanla münasibətlərin dərinləşdirilməsinə hazırdır.
"Biz Tbilisinin kənardan diktəni aradan qaldırmaq və xarici tərəfdaşlarla bərabərlik və qarşılıqlı hörmət prinsipləri əsasında əməkdaşlıq etmək cəhdlərini anlayışla qarşılayırıq. Biz Rusiya-Gürcüstan əlaqələrini daha da dərinləşdirməyə hazırıq ki, bu da Gürcüstanın iqtisadi yüksəlişinin əsas amillərindən biridir. Biz bunu səmimi qəlbdən və xoş niyyətlə edirik", – deyə Zaxarova bildirib.
Onun sözlərinə görə, Moskva Tbilisi ilə qarşılıqlı hörmət prinsipi əsasında qurulan əməkdaşlığın genişləndirilməsinə hazırdır.
"Tbilisi ölkə üçün suverenliyin bərpası, gürcü xalqının maraqlarının təmin olunması və mən əlavə edərdim ki, ölkənin və xalqın ləyaqətinin qorunması naminə qəti və düşünülmüş seçim edib", – deyə Rusiya Xarici İşlər Nazirliyinin sözçüsü qeyd edib.
“Cebheinfo.az”-a danışan siyasi şərhçi Aydın Tağıyev bildirib ki, Kremlin son bəyanatları fonunda Gürcüstanla bağlı ritorikasında müəyyən dəyişikliklər müşahidə olunur.
Onun sözlərinə görə, Moskvanın Gürcüstana dair yumşaq ritorikası strateji dönüşdən çox, dəyişən geosiyasi şəraitə uyğun taktiki adaptasiya təsiri bağışlayır:
"Ukrayna müharibəsi və Ermənistanın Qərbə yaxınlaşması Kremlin Cənubi Qafqazdakı mövqelərini zəiflətdiyi üçün Gürcüstanı “son təsir kanalı” kimi qorumaq vacib görünür.
Zaxarovanın açıqlamalarında Gürcüstanın “suveren seçim” etməsi vurğulanır. Bu, Moskvanın son illərdə önə çıxardığı “ənənəvi dəyərlər” və “milli ləyaqət” diskursu ilə üst-üstə düşür. Lakin Abxaziya və Cənubi Osetiya məsələsinin kənarda saxlanılması Kremlin həqiqi niyyətini sual altında qoyur".
Siyasi şərhçi əlavə edib ki, Rusiya uzun illər postsovet məkanında “məhdud suverenlik” konsepsiyasına əsaslanıb:
"Gürcüstanla bağlı yumşaq ritorika bu siyasətdən imtina deyil, sadəcə zəifləyən imkanlar fonunda taktiki manevrdir.
Fikrimcə, Gürcüstan üçün əsas təhlükəsizlik məsələsi Abxaziya və Cənubi Osetiyanın statusudur.
Rusiya bu mövzuda fundamental dəyişiklik etmədiyi müddətdə “hörmət” və “qarşılıqlı fayda” ritorikası diplomatik jestdən o tərəfə keçmir".
Aydın Tağıyev vurğulayıb ki, Kremlin yumşaq mesajları neoimperialist siyasətdən imtina demək deyil:
"Yekunda onu deyə bilərəm ki, Kremlin Gürcüstana dair yumşaq ritorikası strateji dönüş deyil, taktiki davranış modelidir. Moskva zəifləyən resurslar fonunda regiondakı təsirini qorumağa çalışır.
Əgər Rusiya həqiqətən neoimperialist yanaşmadan uzaqlaşmaq niyyətindədirsə, bunu yalnız Abxaziya və Cənubi Osetiyanın statusu ilə bağlı konkret addımlar sübut edə bilər. Hələlik isə müşahidə olunan dəyişikliklər daha çox geosiyasi adaptasiya xarakteri daşıyır".
