Bakı Ağır Cinayətlər Məhkəməsində quldurluqda təqsirləndirilən Mahal Əkbərov, Babək Hacızadə və Məğrur İmanovun (hər üçünün adı, soyadı şərtidir) cinayət işi üzrə məhkəmə istintaqı başa çatıb.

Pravda.az-ın əldə etdiyi məlumata görə, hakim Leyla Əsgərova-Məmmədovanın sədrliyi ilə keçirilən prosesdə hökm oxunub.

Məhkəmənin hökmü Məğrur İmanov 6 il, Mahal Əkbərov 8 il və Babək Hacızadə isə 8 il 3 ay müddətinə azadlıqdan məhrum edilib.

İttihama görə, gənc olan təqsirləndirilən şəxslər qabaqcadan əlbir olan bir qrup şəxs halında özgənin əmlakını ələ keçirmək məqsədi ilə zərərçəkmiş şəxsə qarşı həyatı və sağlamlığı üçün təhlükəli zor tətbiq etməklə quldurluq cinayəti törədiblər.

Belə ki, hadisə 2024-cü ilin iyul ayında gecə saat 02 radələrində Bakı şəhəri, Nəsimi rayonu, metronun “20 Yanvar” stansiyasının çıxışında baş verib.

Belə ki, Məğrur İmanov həmin ərazidə tanış olduğu Mahal Əkbərov və Babək Hacızadə ilə birlikdə zərərçəkmiş M.M.in (adı, soyadı şərtidir) pul vəsaitini ələ keçirmək barədə razılığa gəlib. İstintaqla müəyyən edilib ki, o, əvvəlcə bu barədə digər şəxslərə təklif verib və onların razılığını aldıqdan sonra birlikdə cinayət əlaqəsinə giriblər.

Bundan sonra onlar zərərçəkmiş şəxsi izləyərək 3-cü mikrorayon dairəsinin yaxınlığında yolun kənarında yerləşən səkiyə qədər təqib ediblər. Həmin ərazidə təqsirləndirilən şəxslər birlikdə M.M.-ə hücum edərək ona yumruq və təpik zərbələri endiriblər. Hücum zamanı zərərçəkmiş şəxs müxtəlif bədən xəsarətləri alıb.

Məhkəmə-tibbi ekspertizasının rəyinə görə, zərərçəkmiş şəxsdə sol göz qapaqları və gözaltı nahiyədə, gözün ağlı qişasına qansızma ilə müşayiət olunan qançırlar, sağ almacıq və sağ qalça nahiyəsində qançırlar, həmçinin burun belində sıyrıq müəyyən edilib. Həmin xəsarətlər sağlamlığın qısa müddətə pozulmasına səbəb olan sağlamlığa yüngül zərər vurmaya aid edilib.

İstintaq materiallarında göstərilib ki, zərərçəkmiş şəxsə zor tətbiq edildiyi vaxt Mahal onun şalvarının cibindən 280 manat məbləğində nağd pul vəsaitini götürüb. Bundan sonra təqsirləndirilən şəxslər hadisə yerindən uzaqlaşaraq əldə etdikləri pul vəsaitini öz aralarında bölüşdürüblər.

Beləliklə, təqsirləndirilən şəxslərin qabaqcadan əlbir olan bir qrup şəxs halında zərərçəkmiş şəxsin həyatı və sağlamlığı üçün təhlükəli zorakılıq tətbiq etməklə quldurluq etdikləri bildirilib.