Bakı Ağır Cinayətlər Məhkəməsində qəsdən adam öldürməkdə və xuliqanlıqda təqsirləndirilən Rasif Xəlilovun cinayət işi üzrə məhkəmə ifadəsi məlum olub.
Pravda.az-ın əldə etdiyi məlumata görə, hakim Babək Pənahovun sədrliyi ilə keçirilən prosesdə ittiham aktı elan edilib.
İttihama görə, hadisə 2025-ci il oktyabrın 11-i saat 16 radələrində Əmircan qəsəbəsi İ.Şükürov küçəsində qeydə alınıb.
Belə ki, 2009-cu il təvəllüdlü Rasif Xəlilov şəxs münasibətlər zəminində 1982-ci il təvəllüdlü Ayxan Mustafayevi qətlə yetirib.
Məhkəmə istintaqı zamanı Rasif Xəlilov ona elan olunmuş ittiham üzrə özünü təqsirli bilib və hadisənin başvermə səbəbləri ilə bağlı ətraflı ifadə verib.
O deyib ki, valideynləri 2019-cu ildə rəsmi qaydada boşanıblar. Atası, babası və digər yaxın qohumları rayonda yaşayıb. Təqsirləndirilən şəxs isə həbs olunanadək Bakı şəhəri, Suraxanı rayonu, Əmircan qəsəbəsində anası və azyaşlı bacısı ilə birlikdə yaşayıb.
İfadəsində qeyd edib ki, natamam orta təhsil alıb, lakin ailənin maddi vəziyyətinin ağır olması və təhsilə marağının azalması səbəbindən təhsilini davam etdirə bilməyib. Son illər ailələrinin ağır sosial vəziyyətdə yaşadığını deyən Rasif anasının ailəni dolandırmaq üçün müxtəlif işlərdə çalışdığını, özünün isə əsasən evdə olduğunu və bəzən gündəlik ehtiyacların qarşılanmasına kömək etdiyini bildirib.
Təqsirləndirilən şəxs qətlə yetirilən zərərçəkmiş Ayxan Mustafayevi təxminən 2019-cu ildən tanıdığını deyib. Onun sözlərinə görə, həmin dövrdə zərərçəkmiş şəxs qonşuluqda kirayədə yaşayırmış və ilk vaxtlar onu sakit, ciddi xarakterli biri kimi tanıyıb. Aralarında xüsusi münasibət olmayıb.
Daha sonra Rasif anasının Suraxanı rayonu, Əmircan qəsəbəsində zərərçəkmiş şəxsə məxsus marketdə satıcı işləməyə başlayıb. Təqsirləndirilən şəxs də tez-tez həmin marketə gedərək anasına kömək etdiyini söyləyib. Məhz bu dövrdən sonra anası ilə Ayxan arasında münasibətlərin dəyişdiyini hiss etməyə başlayıb.
Təqsirləndirilən şəxs bildirib ki, anasının davranışlarında dəyişikliklər müşahidə edib, onun tez-tez telefonla yazışdığını, gülümsədiyini və fikirli olduğunu görüb. Bu səbəbdən münasibətlərin yalnız iş əlaqəsi olmadığını düşünüb.
O qeyd edib ki, hər dəfə Ayxanı görəndə anasının ona münasibəti onda xoşagəlməz hisslər yaradıb. Təqsirləndirilən şəxs anasını çox sevdiyini, yaranmış vəziyyətin isə ailəsinə ləkə gətirdiyini düşündüyünü deyib.
İfadəsinə görə, 2025-ci ildə anasının telefonundan istifadə etdiyi zaman təsadüfən “WhatsApp” yazışmalarını görüb. O bildirib ki, yazışmalarda əvvəlcə anasına qarşı təhqiramiz ifadələrin, daha sonra isə intim xarakterli məzmunların olduğunu müşahidə edib.
Təqsirləndirilən şəxs deyib ki, gördükləri ona ağır psixoloji təsir göstərib, özünü alçaldılmış və təhqir olunmuş hiss edib. Rasif bunu ailəsinin adına ləkə kimi qiymətləndirib və həmin vaxtdan daxilində nifrət və qisas hissinin formalaşdığını bildirib.
Onun sözlərinə görə, hadisədən əvvəlki dövrdə də Ayxan borc məsələsinə görə həm onu, həm də anasını təhqir edib, nalayiq ifadələr işlədib. Bu hallar onda uzun müddətdir yığılan qəzəbi daha da artırıb.
Təqsirləndirilən şəxs ifadəsində deyib ki, hadisə günü səhər saatlarından gərgin və əsəbi vəziyyətdə olub. Günorta saatlarında otaqda tək oturaraq uzun müddət düşündüyünü, gördüklərinin beynindən çıxmadığını və artıq bu vəziyyətə son qoymaq qərarına gəldiyini deyib.
Rasif bildirib ki, evdən çıxmazdan əvvəl mətbəxdən bıçaq götürüb və piyada şəkildə Ayxanın yaşadığı küçəyə yollanıb. Küçəyə daxil olarkən zərərçəkmiş şəxsin iki nəfərlə birlikdə dayandığını görüb.
Təqsirləndirilən şəxsin sözlərinə görə, onu görən kimi özünü saxlaya bilməyib, cibindən çıxardığı bıçaqla Ayxana bir neçə dəfə zərbə endirib. Zərərçəkmiş şəxs yerə yıxıldıqdan sonra isə hadisə yerindən qaçaraq xalasının evinə gedib.
O bildirib ki, baş verənləri xalası oğluna danışıb. Xalası oğlu onu sakitləşdirməyə çalışıb və polisə təslim olmasını məsləhət görüb. Bir qədər sonra xalası, xalası qızı və anası da evə gəliblər. Ardınca polis əməkdaşları həmin ünvana gələrək onu saxlayıblar.
Məhkəmənin hökmü o, 9 il 6 ay müddətinə azadlıqdan məhrum edilib.
