Ermənistanın baş naziri Nikol Paşinyan Qarabağın heç vaxt erməni torpağı olmadığını bildirib.

“Deyirlər ki, biz torpaq itirdik. O torpaq necə bizim ola bilərdi? Necə bizim ola bilərdi? Zəhmət olmasa izah edin, o necə bizim ola bilərdi?”, – Ermənistan hökumətinin başçısı iyunun 7-də keçiriləcək parlament seçkiləri öncəsi təşviqat kampaniyası çərçivəsində Sünik vilayətində seçicilərlə görüşdə bildirib.

“Mən ölənlərin arxasınca danışmaq istəmirəm, amma fərz edək ki, həmin ərazi bir neçə generalın nəzarəti altında idi və onlar orada, məsələn, buğda əkirdilər – buna görə o torpaq bizim idi? O necə bizim idi? Necə? İzah edin, necə?”, – Nikol Paşinyan davam edib.

O, Ermənistanın Qarabağın həyatında hər hansı iştirakını da inkar edib: “Biz orada məktəb tikmişdik, uşaq bağçası tikmişdik, zavod tikmişdik, orada yaşamışdıq, orada məskunlaşma olmuşdu?.. O necə bizim idi? O bizim deyildi. O bizim deyildi”.

Məlum olduğu kimi, Nikol Paşinyan artıq uzun müddətdir, 1988-ci ildə başlamış Qarabağın Ermənistana birləşdirilməsi hərəkatını “faciəvi səhv” hesab etdiyini bildirir.

Maraqlıdır, Paşinyanın bu mövqeyi Ermənistan seçicilərinin əksəriyyəti tərəfindən necə qəbul oluna bilər? Axı o, ciddi şəkildə qələbəyə köklənib. Avropa İttifaqında və Ermənistanı əhatə edən ölkələrdə, ən azı Türkiyə və Azərbaycanda da eyni gözlənti mövcuddur. Əsas səbəb isə odur ki, hazırda Ermənistanda hakimiyyət uğrunda mübarizə aparan qüvvələr arasında yalnız Paşinyan Azərbaycanla sülh müqaviləsinin imzalanmasını və Türkiyə ilə diplomatik münasibətlərin bərpasını vacib sayır. Yəni, yalnız o və onun partiyası Cənubi Qafqazda davamlı sabitliyin əldə olunmasına çalışır.

Paşinyan Qarabağ kimi son dərəcə həssas mövzuda erməni seçicisinin onun mövqeyini dəstəkləyəcəyinə tam əmindirmi?

Pressklub.az-ın suallarını müstəqil analitik Rəşad Rzaquliyev cavablandırıb.

“Etiraf etmək lazımdır ki, Nikol Paşinyan kifayət qədər bacarıqlı siyasi illüzionist və fokusçudur. Biz, əlbəttə, yaxşı anlayırıq ki, Azərbaycan ərazisindəki erməni separatizminin maliyyələşdirilməsi Ermənistan Respublikasının əvvəllər işğal altında olmuş ərazilərə birbaşa dövlət investisiyaları vasitəsilə deyil, hər il yüz milyonlarla dollar həcmində “dövlətlərarası kreditləşmə” yolu ilə həyata keçirilirdi. Həmçinin bu pulların, eləcə də erməni diasporunun vəsaitlərinin hara yönəldiyini də çox yaxşı bilirik. Amma bu hazırda o qədər də vacib deyil.

Vacib olan başqa məsələdir: Azərbaycan Silahlı Qüvvələrinin fəaliyyəti və Nikol Vovayeviçin siyasi bacarıqları sayəsində bu gün bütün Cənubi Qafqaz üçün təhlükə yaradan radikal erməni millətçiliyinin bel sütunu qırılır. Nikol Paşinyan və onun administrasiyası öz ölkələrinin gələcəyi ilə bağlı seçimlərini ediblər. İndi yalnız iyunun 7-ni – Ermənistanda keçiriləcək parlament seçkiləri gününü gözləmək qalır ki, bu seçimin ölkə seçicilərinin əksəriyyəti tərəfindən təsdiqlənib-təsdiqlənməyəcəyi məlum olsun.

1988-ci il “Qarabağ hərəkatı”nın iflası ideyasının açıq şəkildə nümayiş etdirilməsi, Erməni Apostol Kilsəsinin tərəfdarları və dünya erməni diasporunun liderləri ilə mübarizə yeni erməni dövlətçiliyinin əsaslarını formalaşdırır. Bu dövlətçilik artıq qlobal geosiyasi oyunçuların maraqlarına xidmət üzərində deyil, öz milli-dövlət ideoloji platforması üzərində qurulur. İlk növbədə isə ifrat həddə qədər riskli siyasət yürüdən Rusiya Federasiyasının təsirindən uzaqlaşır. Ermənistan tarixində Qarabağ klanının və onun “arzularının” dövrü bağlanır, onun yerini isə Paşinyanın 2018-ci il inqilabının nəticələrinin konstitusion və ideoloji şəkildə rəsmiləşdirilməsi tutur”, – ekspert bildirib.

Ekspert qeyd edir ki, bu, məsələnin bir tərəfidir. “Digər tərəf isə bunun Ermənistanın hazırkı hakimiyyətinə növbəti geosiyasi hegemona (istər ABŞ, istərsə də Avropa İttifaqı olsun) tərəf irəliləmək imkanı verir. İrəvanda keçirilən Avropa Siyasi Birliyinin 8-ci sammiti və onun Nikol Paşinyanla “Vətəndaş Müqaviləsi” Partiyasının seçkiqabağı benefisinə çevrilməsi bunun parlaq təsdiqidir. Bundan bir qədər əvvəl isə Ermənistan lideri ABŞ prezidenti Donald Trampın özündən Azərbaycan-Ermənistan sülh memorandumu formasında təhlükəsizlik təminatlarına “xeyir-dua” və ABŞ-ın TRIPP adlı logistika layihəsi çərçivəsində dəstək almışdı.

Bütün bunlar, eləcə də onun partiyasının ölkənin inzibati və maliyyə resurslarına tam nəzarət etməsi ilə birlikdə bu seçki siyasi dövründə apardığı fəal hücum xarakterli kampaniya, Paşinyana seçkilərdə qələbə qazanmaq üçün ciddi üstünlüklər verir. Əlbəttə, dünya siyasətinin tarixində “qara qu quşları”nı heç kim ləğv etməyib. Amma gəlin, Cənubi Qafqazın taleyi üçün ən yaxşısına ümid edək”, – Rzaquliyev bildirib.