Gürcüstanda baş verən hadisələri “Qeyrət” Xalq Hərəkatının lideri Əlibala Əsgərovla müzakirə edirik:
- Əlibala müəllim, Qardabanidə nələr baş verir?
- İqtidar “Gürcü arzusu” koalisiyasında ötən əsrin 90-cı illərinin ab-havası tüğyan edir. Qardabaniyə hələ bir neçə il bundan öncə Savanetiya bölgəsindən svanlar köçürülmüşdü. Hazırkı iqtidar partiyası da onların böyük əksəriyyətini qarşıdan gələn seçkilərdə namizəd kimi irəli sürüb. Azərbaycanlıların əksəriyyəti isə Saakaşvilinin rəhbəri olduğu Milli Hərəkat Partiyasından namizəd göstəriliblər. O, qeyd etdiyimiz svanlar da gözəl anlayır ki, azərbaycanlılar onlara səs verməyəcək. Başlayıblar təxribatlara əl atmağa, indidən aqressivləşməyə. Əminəm ki, onların arxasında iqtidardan olan gözəgörünməz əllər var. Svanların onların dəstəyi ilə seçkilərə qədər müəyyən təxribatlar törədəcəyi qaçılmazdır. Borçalılar da indi ayıqdır, 1992-ci illər deyil. İstənilən təxribatlara anında reaksiya veriləcək. Çox şükür ki, etnik münaqişəyə çevrilmədi. Amma bu təhlükə hər an qalmaqdadır.
- Sizə elə gəlmirmi ki, bu, olduqca təhlükəli kartdır? 90-cı illərdə azərbaycanlıların nələr çəkdiyi məlumdur...
- Razıyam, bəli, həddindən artıq təhlükəli gedişlərdir.
- Orada azərbaycanlılar sıxışdırılır, bir erməni təəssübkeşliyi var...
- Ermənilərin kompakt yaşadığı Samsxe Cavaxetiyanın iki rayonunda erməni namizədin irəli sürülməsi, elə həmin bölgədə qondarma erməni soyqırımı abidəsinin ucaldılması, Tiflisdə ermənilərə Şuşa bayramının keçirilməsinə icazənin verilməsi nələrisə demirmi? Bəli, hazırkı iqtidarın bir erməni sevgisi var. Təmtəraqla Gürcüstan Baş nazirinin bölgəmizə gələcəyi deyilsə də, bu səfəri özünə rəva bilmədi, Borçalıdan uzaq düşdü.
- Yeni siyasi qüvvələr gələndə onların Rusiyaya bağlılığı olduğu deyilirdi. Siz hansı qənaətdəsiniz, deyilənlər həyatda düz çıxırmı?
- Yəni bu iqtidar regionumuz üçün o biri hakimiyyətlər kimi, ancaq iqtidarın xeyrinə səs balansı kimi baxır. Amma mənə elə gəlir ki, səhv edirlər, artıq borçalıların da öz sözünü demək zamanıdır. Marneulidə Saakaşvilinin Milli Hərəkat Partiyası azərbaycanlı gənc namizədi irəli sürüb və hal-hazırda xalqdan böyük dəstək gördüyü açıq görünür.
- Əlibala müəllim, bir az konkretləşdirək - iqtidara təsirdə rusun barmağı var, ya yox?
- Bəli, bu hadisələr Rusiyanın çıxarlarına tam uyğundur. Məncə, bu kimi hadisələri Rusiya dəyərləndirməyə bilməz, ona görə bütün borçalıları təmkinli olmağa çağırıram və mümkün qədər sözlərini küçələrdə deyil, seçki qutularının başında desinlər.
- Axı seçkidə necə desin ki, çayxanada oturduğu yerdə gürcü gəlib ona nalayiq ifadələr işlədir?
- Hər halda qarşıdurma və toqquşmalar çözüm deyil.
- Qarşıdurma istəyən kimlərdir ki?
- Başda söylədim, artıq gürcülər də anlamalıdır ki, 1990-cı illər arxada qaldı, indi o zaman deyil. Hal-hazırda Allah göstərməsin o ssenarilər əgər yenidən həyata keçirilsə, hər iki tərəfdən çox canlar yanacaq.
- Bu hadisələrlə əlaqədar Qardabaniyə yüksək çinli məmur gəlmişdimi?
- Qubernator.
- Söyüş söyən svanlar cəzalandırılacaq?
- İki gündür hadisə davam edir, hələ saxlanılan yoxdur.
- Bu o demək deyilmi ki, elə iqtidar həmin insanlarla əlbirdir?
- Hətta o hadisələr dünən gecə patrul xidmətinin gözü qarşısında baş verib. Dedim axı, gözəgörünməz dəstəkçiləri var.
- Deməli, iqtidar özü dəstəkləyir bu təxribatları, qarşıdurmaları?
- Dəstək görünməzdir, amma var.
- Azərbaycan səfiri Gürcüstanın daxili işinə qarışa bilməz, sadəcə, tövsiyyə və müəyyən qaydaların qorunmasını tələb edə bilər. Soruşuram - onda hanı bəh-bəhlə təqdim olunan Savalan Mirzəyev (Gürcüstan Baş nazirinin azərbaycanlı gənc müşaviri), deputat Mahir Dərziyev? Niyə onlar məsələyə reaksiya vermirlər?
- Bəli, çox təəssüf, bu günə kimi nə millət vəkillərimizdən, nə də bizi susdurmaq üçün vəzifəyə gətirilən 2-3 dövlət məmurundan heç bir açıqlama görməmişik.
- Onda gəlin, məsələni adı ilə deyək də. Nə vaxt lazım gələcəklər onlar?
- Onsuz da millət onlardan heç nə gözləmir.
- Niyə demirsiniz ki, bunlar iş görən azərbaycanlı deyil, ad naminə irəli çəkilən azərbaycanlı məmurlardır?
- Çox dedik, amma faydası yoxdur.
- Bəs diaspor təşkilatının rəhbəri Əli Babayev nə işlə məşğuldur, hazırkı iqtidarı tərifləyirdi, nə oldu?
- Yanvarda xəbəri olmadan “Gürcü arzusu” partiyasının siyasi bürosundan azad ediblər. Hazırda heç bir qüvvəyə malik deyil.
- Deməli, bu qədər azərbaycanlının taleyi Allahın ümidinə qalıb?
- Bəli, azərbaycanlılar acı taleyin hökmünə buraxılıblar.
- Bəs deputat Mahir Dərziyev? Məsələni parlamentdə niyə qaldırmır? Axı ona parlamentdə kim mane olur?
- Mane olan yoxdur, sadəcə istəmirlər. Vəssalam!
- Sabiq Baş nazir İvanişvili azərbaycanlıların yüksək posta gətirələcəyini deyirdi...
- Boş vədlər idi...
- Qardabanidəki hadisələrin video yazısına baxmışam. Orada svanlar tərəfindən azərbaycanlılara “tatarlar”, “sizə burada yer yoxdur” kimi ifadələr işlədilib. Məlumdur ki, prezident Saakaşvilinin “tatar” ifadəsini işlədənlərə qarşı cəzanı nəzərdə tutan qərarı vardı. İndi bu hüquq prezidentə şamil olunacaqmı, həmin şəxslər cəzalandırılacaqlarmı?
- Məncə, heç bir cəzalanma-filan olmayacaq.
- Demək olarmı ki, Saakaşvili azərbaycanlıların kisəsindən getdi?
- Onun da səhvləri vardı. Amma atalar sözü var: yağışdan çıxdıq, yağmura düşdük.
- 10 ballıq şkalada azərbayacanlılar üçün etdiyinə görə Saakaşviliyə və hazırkı iqtidara necə qiymət verərdiniz?
- Saakaşvilinin komandasına 7 verərdim.
- Bəs hazırkı iqtidara?
- Acizəm nəsə deməkdə... Hələ region üçün bir layihə vədləri yoxdur, nə qiymət verim ki?
- Deməli heç 1 də deyil?
- Bəli...
- Azərbaycan hökumətindən xahişiniz nədir? Kömək istəyirsinizmi?
- Təəssüf ki, Azərbaycan Gürcüstana neft borularının üstündən girdi, bu qədər!..
\\ axar.az \\
