“Ermənistanın hər üç keçmiş prezidenti hazırkı vəziyyətə görə indiki hökuməti günahlandırmağa çalışırlar, lakin hakimiyyət biz gəlməmişdən əvvəl uğursuzluğa düçar olub”.

Bunu Ermənistanın Baş naziri Nikol Paşinyan parlamentdə çıxışı zamanı deyib.

Onun sözlərinə görə, keçmiş prezidentlər Ermənistanın Baş naziri ilə teledebatlarda iştirakdan imtina edirlər. Lakin bu debatlar baş tutsa belə, Paşinyan Ter-Petrosyanı, Robert Köçəryanı və Serj Sarkisyanı divara sürtməklə hədələyib:

“2020-ci ildən biz hakimiyyətə gələndə qaçılmaz olan vəziyyətə görə bizi günahlandırmağa çalışırlar, lakin onların hər üçü teledebatlarda iştirakdan imtina edirlər. Onlar deyirlər ki, mənimlə müzakirə edəcəkləri heç nə yoxdur. Sonra övladlarını, nəvələrini, nəticələrini, qayınanalarını, gəlinlərini, baldızlarını mətbuat konfransına göndərirlər.

Mübahisə edəcək bir şeyin yoxdursa, susun. Hazırsınızsa, gəlin, danışaq. Əsəblərimizlə oynamağı dayandırın, sizi tapdalayacağam. Sizi divara sürtəcəyəm və siyasi cəsədlərinizin qalıqları oradan çıxarılacaq”.

Bununla bağlı "Cebheinfo.az"-a açıqlama verən millət vəkili Aydın Mirzəzadə bildirib ki, Ermənistanın keçmiş prezidentləri cinayətkardır, onlara dərs verən Paşinyan yox, tarixdir:

“Keçmiş üç prezidentin fəaliyyəti təkcə Azərbaycana deyil, eyni zamanda Ermənistana da ciddi problemlər yaradıb. Bu fəaliyyət Ermənistan dövlətçiliyinin inkişafını ləngidib, ölkəni regional layihələrdə iştirak imkanlarından məhrum edib və Ermənistanın türk dünyası üçün cəlbedici bir məkan olmaq potensialını aradan qaldırıb.

Bütün bunları Paşinyan dərk edir. Düzdür, onu tam səmimi bir lider hesab etmək olmaz. Çünki hakimiyyətə gələndən sonra “Qarabağ-Ermənistan” ifadəsini məhz o işlətmişdi. Əgər Azərbaycan Prezidenti, Silahlı Qüvvələrin Ali Baş Komandanı İlham Əliyev olmasaydı, bu gün də Azərbaycan torpaqları Paşinyanın rəhbərlik etdiyi Ermənistanın işğalı altında qala bilərdi".

O qeyd edib ki, bu, Paşinyanın Ermənistan üçün fərqli bir inkişaf yolu planlaşdırmasından irəli gəlir:

"Lakin bu planın nə dərəcədə uğurlu olacağını demək çətindir. Çünki Ermənistanda hakimiyyətdə kimin olmasından asılı olmayaraq, zaman-zaman mövqelər dəyişir və götürdükləri öhdəliklərə sadiq qalmaqda problemlər yaşanır. Paşinyanın son bəyanatları isə Azərbaycan-Ermənistan münasibətləri üçün heç bir əhəmiyyət daşımır. Bu, Ermənistanın daxili siyasətinə aid olan məsələlərdir və nəticəsini də orada göstərəcək".

O bildirib ki, Azərbaycan-Ermənistan münasibətlərində artıq sülh müqaviləsinin mətni üzərində razılaşma əldə olunub:

"Hazırda isə münasibətlərin tam normallaşdırılması üçün əsas tələbimiz Ermənistan Konstitusiyasında dəyişiklik edilməsi və bu dəyişikliklərin həyata keçirilməsidir.

Əgər Ermənistan hesab edirsə ki, bu məsələni uzatmaq olar, çox böyük bir yanlışlığa yol verir. Bu günlərdə Azərbaycan Respublikası Prezidentinin xüsusi tapşırıqlar üzrə nümayəndəsi Elçin Əmirbəyov da bildirib ki, Ermənistan bu reallıqdan qaçmamalıdır".