İkinci Dünya müharibəsi öncəsində nasist Almaniyasının hərbi hava qüvvələrinin komandanı Herman Qerinq Adolf Hitleri inandırmışdı ki, müharibə aparacaqları ölkənin heç birinin hərbi təyyarələri Almaniya hava sərhədinə yaxınlaşa bilməyəcək, paytaxt Berlin və digər şəhərlərin təhlükəsizliyi yüksək səviyyədə təminat altındadır. Qerinqin vədi doğrulmadı. Böyük Britaniyanın və ABŞ-ın bombardmançı təyyarələri Almaniyanın şəhərlərinə tonlarla bomba atdılar, şəhərlər dağıldı, on minlərlə insan öldü. Nasist Almaniyasının məğlubiyyətində bu bombardmanların da rolu oldu, çünki hərbi zavodlar dağıldığından nasistlərin iki cəbhədə savaşması çətinləşdi. Böyük ehtimalla Rusiya hərbi komandanlığı da 2022-ci ilin fevral ayında Ukraynaya qarşı işğalçı müharibəyə başlamamışdan əvvəl Prezident Vladimir Putinə müharibənin ancaq Ukraynada gedəcəyini, Rusiyanın zərər görməyəcəyinə dair oxşar vədlər veriblər. Düyməyə basan Putin bu vədlərə inanıb. Halbuki, Ukrayna dronları müharibənin dördüncü ilində Rusiyanın ən ucqar şəhərlərindəki hərbi mərkəzləri, hava limanlarını bombalayır, hərbi təyyarələr yanır. Ukrayna kəşfiyyatının Rusiyanın müharibə ərazisindən uzaq Murmansk və İrkutsk şəhərlərində həyata keçirdiyi əməliyyat isə Kreml sahibinə və onun generallarına imic zərbəsidir. Ukrayna kəşfiyyatı bir il əvvəl dronları Rusiya ərazisinə keçirib və oradan onları havaya qaldıraraq bombardmançı təyyarələri hava limanındaca məhv edib. Yəqin buna cavab olaraq Kreml sahibi Ukrayna şəhərlərini yenidən Oreşnik raketləri ilə vurmağı əmr edəcək. Beləcə, bu gün İstanbulda tərəflər arasında görüşün baş tutma ehtimalı da azalıb.

Elxan Şahinoğlu - "DİA-AZ"