Bakı Sağlamlıq Mərkəzinin növəti ilin iyun ayına qədər laboratoriya tibbi sərf mallarının satınalınması ilə bağlı elan etdiyi tenderin qalibi növbəti dəfə “Azəri Med” Qapalı Səhmdar Cəmiyyəti olub.

Teleqraf xəbər verir ki, bunun üçün “Azəri Med”-ə 1 milyon 190 min 727 manat ödənib.

Qeyd edək ki, ötən ilin sentyabrında imzalanan müqaviləyə əsasən Bakı Sağlamlıq Mərkəzi hazırda da tibbi sərf mallarını “Azəri Med”dən alır. Bu müqavilənin dəyəri isə 8 milyon 600 min 332 manatdır. 2022-ci ildə eyni məqsədli müqavilə 9 milyon 791 min 230 manat təşkil edib.

Araşdırmalarımız göstərir ki, "Azəri Med" ilin əvvəlindən ayrı-ayrı dövlət müəssisələri ilə 22 satınalma müqaviləsi bağlayıb.

Belə ki, Milli Onkologiya Məkəzi 2025-ci il üzrə tibbi sərf mallarını “Azəri Med”dən alacaq. Mərkəz bunun üçün "Azəri Med”-ə 2 milyon 96 min 929 manat ödəyib. Xatırladaq ki, ötən il sözügedən müəssisələr arasında iki tender üzrə ümumi maliyyə dəyəri 7 milyon 119 min 243 manatlıq müqavilə bağlanmışdı.

“Naxçıvan Muxtar Respublikasının Tibb Müəssisələrinin İdarəetmə Birliyi” bu ilin mayında “Azəri Med” ilə imzaladığı müqaviləyə əsasən, 2026-cı ilin eyni dövrünə qədət “Naxçıvan Muxtar Respublika Xəstəxanası” PHŞ üçün dərman və sarğı ləvazimatları satın alacaq. Bunun üçün “Azəri Med”ə 1 milyon 127 min 419 manat ödənilib.

Daha bir müqavilə Azərbaycan Tibb Universiteti Tədris Cərrahiyyə Klinikası ilə bağlanılıb. Klinika 2025-ci ilin mayından növbəti ilin müvafiq dövrünə qədər "Azəri Med" dən dərman preparatları alacaq. Bu müqavilənin də dəyəri 1 milyon 189 min 814 manatdır.

“Naxçıvan Muxtar Respublikası Təcili Tibbi Yardım Xidməti” publik hüquqi şəxs regionlarda yerləşən 32 ədəd təcili tibbi yardım geolokasiyalarının təchizatının gücləndirilməsinə dair malların alınması üçün "Azəri Med" ilə 1 miylon 760 min 350 manat dəyərində müqavilə bağlayıb.Xidmətin QSC ilə daha bir müqaviləsi isə köhnə təcili tibbi yardım avtomobillərinin təchizatının yenilənməsinə dair tibbi cihaz və avadanlılqların alinması ilə bağlıdır. Bu müqavilənin dəyəri 980 min manatdır.

İqtisadiyyat Nazirliyi yanında Dövlət Vergi Xidmətinin reyestr məlumatlarında göstərilir ki, “Azəri Med” QSC 2 iyul 2004-cü ildə qeydiyyata alınıb. Şirkətin qanuni təmsilçisi Rəhimli Famil Vəli oğludur.

“Azəri Med”ə qarşı müxtəlif illərdə vergi öhdəlikləri üzrə vergi hesabatını və ya onu əvəz edən arayışı vaxtında təqdim etmədiyinə görə, maliyyə sanksiyaları tətbiq edilib.

Onu da əlavə edək ki, “Azəri Med” QSC 10 manatlıq nizamnamə kapitalı ilə MMC kimi yaradılıb. 2020-ci ilə qədər 10 manat nizamnamə kapitalı ilə fəaliyyət göstərib. Həmin il QSC-nin nizamnamə kapitalı 1020 manata, bir iki ay sonra isə 10 min manata yüksəlib. Yeri gəlmişkən, bu tarixdən başlayaraq, “Azəri Med” milyonluq dövlət tenderlərinin qalibi statusuna yüksəlib.

“Azəri Med” ölkə ərazisində 250-yə yaxın aptekə sahibdir. Şirkətin açıqlamasına görə, "Roche Diagnostics", "Pfizer Export B.V", "Novartis Pharma Services AG", 2Medtronic Trading NL B.V", "Sanofi-Aventis SPA", "Nature’s Bounty" və başqa dünyada tanınan istehsalçılar ilə əməkdaşlıq edir.

Maraqlıdır ki, bu qədər böyük dövriyyəyə sahib, eləcə də milyonluq tenderlərin qalibi olan şirkətin maliyyə, audit hesabatları yoxdur. QSC-nin rəsmi internet səhfəsində sadəcə şirkətin nə işlə məşğul olduğu, "uğur videoları" yer alıb.