Gəncə şəhər sakini Həsənzadə İbrahim Abduləli oğlu tərəfindən “Hürriyyət”in redaksiyasına şikayət məktubu daxil olub. Şikayətçi bildirir ki, zavoddan ona verilən torpaq sahəsinin bir hissəsini saxtakarlıqla satıblar:

“Mən, Həsənzadə İbrahim Abduləli oğlu yazaraq bildirirəm ki, 48 il Gəncə “Cihazqayırma” zavodunda tokar isləmişəm.

1996-ci ildə icra başçısının sərancamı ilə zavoda bağçılıq sahəsi ayrılmışdır. Mənə də 4 sot yarım torpaq verdilər. 2013-cü ildə orada iki otaq tikib, hasar çəkdim.

2023-cü ildə Daşınmaz Əmlaka müraciət etdim ki, mənə çıxarış versinlər. Xeyli gözlətdikdən sonra arxivin onlarda olmadığını dedilər. Bələdiyyəyə müraciət etməyimi məsləhət bildilər. Çıxarış alanda, cəmi 2 sot torpaq sənədə salınmışdı. Dedilər ki, qalanını ya məhkəmə yolu ilə, ya da polisin əli ilə almalısan.

Sonradan Məhsəti qəsəbəsində yaşayan Ələkbərov Qədir adlı maklerin torpağıma şərik çıxdığını öyrəndim. Deyir ki, mən torpağı almışam. Amma ilk sənədlərin hamısı məndə var. Bütün sənədlərim olmasına baxmayaraq, şikayətimə baxmırlar.

Məsələ ilə bağlı prokurora, Reyestr Xidmətinə, məhkəməyə müracit etmiş, tədbir görülmür.

Pensiyaçı adamam, çarəsiz vəziyyətdə qalmışam. Artıq hara, kimə müraciət edəcəyimi bilmirəm”.