Parlamentin Qaya Məmmədov adlı üzvü var. O, diplomatiyadan Milli Məclisə transfer olub. Lakin indiyə qədər qanunverici orqanın iclaslarında çıxışını görən olmayıb. Elə deputatı olduğu Suraxanı rayon seçiciləri də bunu deyirlər - Qaya Məmmədovu millət vəkili kimi öz aralarında görməyiblər. Əgər millət vəkilidirsə, ya parlamentdə çıxışları ilə seçicilərinin yanında olmalı, ya da onlarla görüşərək şikayət və təkliflərini dinləməlidir.
Anxeber.az-a məlumat verən bir qrup Suraxanı rayon sakini isə bildirib ki, bu ikisindən heç biri yoxdur. Yəni daşdan-qayadan səs çıxır, deputat Qaya Məmmədovun "tükü də tərpənmir". Bu da onun laqeydliyindən irəli gəlir. Çünki çətini mandat alana qədər idi. Ovaxtadək seçicilərlə görüşür, özünü canıyanan təqdim edir, vədlər verir, elə ki, parlament kürsüsündə əyləşir, hamı yaddan çıxır. Ona görə də Suraxanı sakinləri saytımıza müraciətdə şikayətlənirlər ki, Qaya Məmmədovu "axtarışa" veriblər, görən olsa xəbər etsin. Deputat indiyə qədər nə camaatın problemini dinləyib, nə seçicilərlə görüş keçirib. Onlar da narazılıq edir ki, belə deputat bizə lazım deyil. Sakinlərin sözlərinə görə, Qaya Məmmədovu suraxanılılar seçsəydi, xalqla təmas qurardı, deməli, onu təyin ediblər. Ümumiyyətlə, ölkədə sorğu keçirilsə, Qaya Məmmədov adlı deputatı heç 1 faiz insan tanımaz. Səbəb sadədir - parlamentdə, mətbuatda çıxışlarını görən olmayıb ki, tanınsın. Məsələn, Zahid Oruc, Fazil Mustafa, Razi Nurullayev, Qüdrət Həsənquliyev, Siyavuş Novruzov, həmçinin bir sıra deputat var ki, aktivdirlər, parlament iclaslarında çıxışlar edirlər, problemləri, təklifləri dilə gətirirlər, seçicilərin müraciəti olanda reaksiya verirlər. Amma Milli Məclisdə debüt edən Qaya Məmmədov Suraxanı rayonundan xəbəri yoxdur. Xəbəri yoxdur ki, rayon iki aydır susuz qalıb. Xəbəri yoxdur ki, əhali su problemi ilə bağlı şikayət etmədiyi ünvan qalmayıb. Xəbəri yoxdur ki, Yeni Günəşli, Qaraçuxur və digər ərazilərdə hansı problemlər mövcuddur. Əgər seçicilərlə bir görüşü olsaydı, onların nədən narazı olduğunu eşidərdi. Ümumiyyətlə, rayonun tədbirlərində, hansısa yığıncaqlarda belə Qaya Məmmədovu görmək olmur. Ona görə sakinlər ona dərdini harada demək mümkün olduğunu bilmirlər. Görünür ki, Qaya Məmmədovun deputat təyinatında rolu olmuş yaxın dostu onu arxayın edib. O da əsas dəstəyi seçicidən yox, dostundan aldığını fikirləşərək sakinlərin problemləri ilə maraqlanmır. Deputat ən azından bircə dəfə su problemi haqda danışa bilərdi. Di gəl, "ağzına su alıb oturub" və Yeni Günəşlidən tutmuş digər ərazilərə qədər gələn şikayətlərə, paylaşılan videolara etinasız yanaşır. Sanki sosial mediadan da bixəbərdir.
Bəs Qaya Məmmədov hansı aləmdə yaşayır? Sual ritorikdir...
Yeri gəlmişkən, obyektivlik naminə Qaya Məmmədovun son işləri barədə məlumat almaq üçün internet resurslarında axtarış etdik. Təsəvvür edin, seçicilərin dediyi kimidir: onun sakinlərlə görüşləri haqda xəbərlər yalnız ötən ilin avqustuna aiddir. Bu da aydındır, sentyabrın 1-də seçkilər keçiriləcəkdi və namizəd kimi fəal olmağa çalışırdı. Düz bir il ötür və ötən ilin bu ayından fərqli olaraq, Qaya Məmmədov dünən də, indi də seçicilərlə görüşmür. Axı nəyinə lazımdır? Ona elə mandata qədər vacib idi. Bu da seçicilərin nəticə çıxarmasına əsas yaradıb. Amma sakinlərin səsləndirdiyi bu tənqidlərlə bağlı deputatın mövqeyini dinləməyə hazırıq.