SOCAR-AQŞ-nin işçiləri çalışdıqları müəssisədə əmək hüquqlarının pozulması ilə əlaqədar Prezidentə Müraciət ediblər. "DİA-AZ" xəbər verir ki, bunu işçilərin müraciətini ictimailəşdirən Neftçilərin Hüquqlarının Müdafiəsi Təşkilatının (NHMT) sədri, tanınmış hüquq müdafiəçisi Mirvari Qəhrəmanlı qeyd edib. "DİA-AZ" həmin müraciəti NHMT sədrinə istinadla təqdim edir:

"Hörmətli cənab Prezident

Bu məktub yüzlərlə SOCAR-AQS əməkdaşının səsini, narahatlığını və haqlı narazılığını əks etdirir. Biz neftçiyik, həyatımızı, sağlamlığımızı riskə ataraq, ailəmizdən uzaqda, dənizdə ağır və məsuliyyətli şəraitdə çalışan insanlarıq. Uzun illərdir bu sahədə xidmət göstəririk, lakin son vaxtlar üzləşdiyimiz vəziyyət bizi dərin narahat edir. Çox ciddi problemlərimiz var. Ən əxsus Bulla 6 platformasında işləyən işçilərin 27.07.2025 tarixində növbə dəyişilməsi planlaşdırılırdı. Lakin 5 gündür danışırıq, gəmi tapmağa çalışırıq ifadələrindən başqa rəhbərlikdən heçnə görmürük. Nəhayət ki, 30.07.2025 tarixində gecə yarısı platformanın növbə dəyişməsini gerçəkləşdirmək üçün bizi Səngəçal limanına 4-5 saat qalmış xəbər edib çağırmışlar. Iş yoldaşlarımızın əksəriyyəti bölgələrdə yaşayır. Bölgələrdə qalanlarla birlikdə digər yoldaşlar da tələm tələsik limana çatmışlar. Bu an bizə dedilər ki, növbə dəyişməsi olmayacaq geri qayıdın. Bu hərəkətlər bizim şəxsiyyətimizə hörmətsizlikdir, biz mənəvi sarsıntı keçiririk. Kimə sual veririk heç kim cavab vermir rəhbərlikdən. Bu münasibət bizə qarşı hörmətsizlikdir və mənəvi zərbə kimi dəyərləndiririk. Bundan əvvəl YAGUAR gəmisi ilə növbə dəyişməsi edirdik. Bu gəmi isə sərnişin daşıma gəmisi deyil. Yayın istisində gəmidə kondisioner işləmir, içəridə oturmaq mümkün deyil. Çöl tərəfində isə ayaq üstə dyanıb gedirik. Ən əsas məqsəd yük daşıma üçün nəzərdə tutulub. Təlimat qaydalarında qeyd olunurki, vaxta dəyişən zaman gəmiyə yük qoyulması, yük qaldırılma və endirilmə əməliyyatları qadağan olunur. Amma nə fayda. Əksər hallarda yük də qoyulur, yük qaldırıb endirmə əməliyyatları icra olunur. Artıq 3 aydır əmək haqqı almırıq.

Bilmirik işdən necə çıxaq ki, həm də pulumuzu alaq. Platformada yerləşən yeməkxananın kodisioneri belə işləmir. Yay bitir, iki aydır yeməkxana kondisionerlə təmin oluna bilmir, istidən içəridə oturmaq mümkün deyil. Əgər SOCAR-AQS şirkəti 2 aydır 500 manatlıq kondisioner ala bilmirsə, işçilərə verilən dəyər sual altındadır. Son ay 40 nəfərdən çox iş yoldaşımız artıq bu şirkətdən ayrılmışdır.

Ekologiya və təbii sərvətlər nazirliyi və fövqəladə hallar naziriliyindən platformalara mütəmadi yoxlamalar gəlib buruğa baş çəkib gedirlər. Platformada monitorinq aparmaq üçün 1 saat görünüş naminədir. Əgər 1 həftə monitorinq aparılsa görərlər ki, bütün drenaj və çirkab suları birbaşa Xəzər dənizinə tökülərək çirkləndirilir. Kimyəvi maddələr dənizə atılır. Canlı təbiət zərərə məruz qalır.

Ulu Öndər Heydər Əliyev demişdir: Neft Azərbaycanın milli sərvətidir və bu sərvətin arxasında duran ən böyük dəyər neftçidir.

Hörmətli cənab prezident, sizdən xahiş edirik ki, bu müraciətimizi nəzarətə götürəsiniz. Əmək haqlarımızın ödənilməsi, əmək şəraitimizin yaxşılaşdırılması, bizə insan kimi münasibət göstərilməsi üçün aidiyyəti qurumlara göstəriş verəcəyinizə ümid edirik.

31.07.2025