ABŞ Dövlət Departamenti Azərbaycanla bağlı “Azadlığa Dəstək Aktı”nın 907-ci düzəlişində nəzərdə tutulan məhdudiyyətlərin tətbiqindən azad etmə müddətinin daha bir il uzadılması barədə Konqresə bildiriş göndərib.

Xatırladaq ki, ötən il, avqustun 8-də Ağ Evdə keçirilən sülh sammiti çərçivəsində ABŞ Prezidenti Donald Tramp "907-ci düzəliş"in Azərbaycanla bağlı tətbiqinin dayandırılması barədə sənəd imzalayıb. Prezident İlham Əliyev həmin imzalanma mərasimində iştirak edib. Bu il iyunun 1-də isə Prezident İlham Əliyev "907-ci düzəliş"in tətbiqinin dayandırılması müddətinin uzadılması ilə bağlı sənədin imzalanmasına görə ABŞ Prezidenti Donald Trampa təşəkkürünü bildirib.

Azərbaycanla ABŞ arasında münasibətlər son illərdə çox böyük sürətlə inkişaf edir və iki ölkə arasında strateji əməkdaşlıq genişlənir. Buna baxmayaraq, Azərbaycan keçmiş Sovet respublikaları arasında ABŞ Konqresinin 1992-ci ildə qəbul etdiyi "907-ci düzəliş"lə bağlı məhdudiyyətlə üzləşən ölkə olaraq qalır.

Hazırda Azərbaycanla ABŞ arasında münasibətlərin yeni mərhələyə qədəm qoyduğu bir vaxtda "907-ci düzəliş"in hələ də tam ləğv edilməməsi sual doğurur.

“Cebheinfo.az”-a açıqlamasında Azad Vətən Partiyasının sədri Akif Nağı bildirib ki, bu məsələ illərdir gündəmdədir:

O qeyd edib ki, "907-ci düzəliş"in qəbulunun hüquqi və siyasi əsası yox idi:

“"907-ci düzəliş"lə bağlı Azərbaycan və ABŞ arasında illərdir müzakirələr aparılır. Demək olar ki, hər yeni prezident hakimiyyətə gəldikdən sonra iki ölkə arasında münasibətlərin yaxşılaşdırılması çərçivəsində bu məsələ yenidən gündəmə gətirilir. Lakin indiyədək onun tam ləğvi ilə bağlı nəticə əldə olunmayıb.

Donald Trampın prezidentliyi dövründə Azərbaycan və ABŞ arasında strateji tərəfdaşlıq istiqamətində mühüm təşəbbüslər irəli sürülmüşdü. Tramp Prezident İlham Əliyevə simpatiyasını dəfələrlə açıq şəkildə ifadə edir, onu regionun aparıcı liderlərindən biri kimi qiymətləndirir, əsas məsələləri onunla müzakirə edir. O, həmçinin "907-ci düzəliş"in aradan qaldırılmasının vacibliyini də bəyan etmişdi.

Buna baxmayaraq, "907-ci düzəliş" sanki qapalı bir çevrəyə düşüb. Hər kəs bilir ki, o dövrdə bu sənəd yanlış olaraq qəbul edilmişdi. Bu sənəd qəbul edilərkən irəli sürülən əsaslandırma məntiqsiz idi. 1992-ci ildə Azərbaycanın torpaqları Ermənistan tərəfindən işğal olunmuş, Dağlıq Qarabağ faktiki olaraq Ermənistanın nəzarətinə keçmiş, Şuşa və Laçın işğal edilmişdi. Belə bir şəraitdə Azərbaycanın guya Ermənistanı blokadada saxlaması iddiası əsasında bu düzəlişin qəbul edilməsi ciddi ziddiyyət təşkil edirdi. Bu sadəcə olaraq, Azərbaycana təzyiq forması idi. Ondan sonra 2001-ci ildən onu hər il ləvğ etməyə başladılar. Amma nə üçünsə heç bir prezident özündə cəsarət tapmırdı ki, tam ləğvi ilə bağlı məsələni qoysun”.

Akif Nağı vurğulayıb ki, bu sənəd Azərbaycana qarşı siyasi təzyiq vasitəsi idi:

“Donald Tramp da "907-ci düzəliş"lə bağlı mövqeyini açıqlayıb. Lakin hələlik heç bir real nəticə yoxdur. Məsələ əsasən Konqresin üzərinə yönəldilir və bildirilir ki, düzəlişin tam ləğvi üçün Konqresin razılığı vacibdir. Təbii ki, əgər istəsələr Konqresdə lazımi səs çoxluğunu təmin etməklə bu qərarın qəbuluna nail olmaq mümkündür. Görünür Tramp özü də "907-ci düzəliş"i tam ləğv etməkdə çox maraqlı deyil. Müşahidələrimiz göstərir ki, onu Azərbaycan üzərində siyasi təzyiq aləti kimi saxlamağa çalışırlar”.

Partiya sədri əlavə edib ki, bu mövzu ətrafında ermənipərəst konqresmen və senatorlar, eləcə də erməni təşkilatları ciddi təzyiq göstərərək prosesə mane olurlar:

“Hazırda Donald Tramp da bu məsələnin üzərinə qətiyyətlə getmir. Əgər ciddi şəkildə bu məsələnin üstünə getsə, Konqresi inandıracaq arqumentlər tapa və məhdudiyyətin aradan qaldırılmasına nail ola bilər. Görünür, hələlik bu məhdudiyyətin qalması onlara sərf edir. Azərbaycan isə səylərini dayandırmamalı, "907-ci düzəliş"in tam ləğvi istiqamətində fəaliyyətini davam etdirməlidir. Bu məhdudiyyətin praktik baxımdan ölkəmiz üçün ciddi əhəmiyyəti yoxdur və demək olar ki, mənasız bir sənədə çevrilib. Ancaq onun Azərbaycan üçün psixoloji və mənəvi təsiri hələ də qalmaqdadır. Azərbaycan üçün bu məhdudiyyət niyə olsun ki?

Prezident Tramp dövründə dünyanın bir çox ölkələrinə qarşı sanksiyalar tətbiq olunsa da, sanksiyalardan kənarda qalan azsaylı ölkələrdən biri Azərbaycan olub. Bu da ABŞ rəhbərliyinin Azərbaycana xüsusi münasibətinin göstəricisidir. Hesab edirəm ki, müəyyən müddətdən sonra Azərbaycan bu məsələnin də həllinə nail olacaq”.