Azərbaycanda mis və qızıl hasilatı ilə məşğul olan “Anglo Asian Mining” PLC Kameron Pforrun dərhal qüvvəyə minmək şərti ilə İdarə Heyətinin müstəqil (icraçı olmayan) üzvü təyin etdiyini açıqlayıb.

Bu barədə şirkətdən Banker.az-a məlumat daxil olub.

Kameron Pforr İdarə Heyətinə kibertəhlükəsizlik, texnologiya və beynəlxalq korporativ maliyyə sahələrində geniş təcrübə gətirir. O, hazırda aerokosmik, müdafiə və aviasiya elektronika sənayeləri üçün yüksək performanslı komponentlərin layihələndirilməsi və istehsalı ilə məşğul olan “Mtron Industries, Inc.” şirkətinin baş icraçı direktoru (CEO) və Baş maliyyə inzibatçısı (CFO) vəzifəsində çalışır.

“Mtron Industries”ə qoşulmazdan əvvəl Pforr federal qurumlar və korporativ müştərilər üçün kibertəhlükəsizlik həlləri təqdim edən “IronNet, Inc.” və “Fidelis Cybersecurity, Inc.” şirkətlərində prezident və maliyyə direktoru vəzifələrini icra edib.

Texnologiya sahəsindəki təcrübəsi ilə yanaşı, o, “Bain & Company”, “Mustang Capital Partners” və “Deutsche Bank Alex. Brown” şirkətlərində çalışdığı dövrdə açıq kapital bazarları, investisiya və maliyyə məsləhətçiliyi sahələrində də geniş təcrübə qazanıb.

Kameron Pforr Pensilvaniya Universitetinin Wharton Biznes Məktəbində maliyyə ixtisası üzrə MBA, həmçinin Pensilvaniya Universitetində beynəlxalq tədqiqatlar üzrə magistr dərəcəsi alıb.

“Kameronu ‘Anglo Asian’ İdarə Heyətində salamlamaqdan məmnunam. Beynəlxalq bazarlarda korporativ maliyyə sahəsində zəngin təcrübəsinə görə əminəm ki, o, İdarə Heyətimizin fəaliyyətinə mühüm töhfə verəcək. Şirkət hazırda iddialı inkişaf strategiyasını həyata keçirir və inanırıq ki, Kameron böyümə hədəflərimizə çatmaq yolunda İdarə Heyətimizi daha da gücləndirəcək.”- deyə, “Anglo Asian Mining”in İdarə Heyətinin sədri Xosrov Zamani bildirib.