“İsrail-İran müharibəsi davam edir və bu qarşıdurmanın regionlararası münaqişəyə çevrilmək potensialı böyükdür”.

Globalinfo.az xəbər verir ki, bu fikirləri region məsələləri üzrə erməni ekspert Armen Petrosyan deyib.

Onun sözlərinə görə, İsrail-İran genişmiqyaslı toqquşmasını qiymətləndirdikdə, ən azından qısamüddətli perspektivdə (bir neçə gün, bəlkə də həftə) belə proqnoz vermək mümkündür:

“Biz regionlararası qarşıdurmaya yönələn tükəndirici müharibənin şahidiyik.

Buna əsasən:

İsrail yalnız əvvəlcədən müəyyən edilmiş – nüvə, raket və digər hərbi obyektlərə, insan resurslarına qarşı deyil, həm də İran üçün həyati əhəmiyyət daşıyan iqtisadi, enerji və nəqliyyat infrastrukturuna qarşı hədəfli əməliyyatlarını davam etdirir. Yəhudi dövləti zəruri resurslara malikdir, bir çox vacib hədəfləri nəzarətdə saxlayır, müttəfiqlərindən çoxşaxəli dəstək alır və maksimum plana – İranda rejim dəyişikliyinə nail olmağa çalışır.

İran strateji, insan və infrastruktur baxımından ciddi itkilərə baxmayaraq, hələ də kifayət qədər resurslara (uzaqmənzilli raketlər, zənginləşdirilmiş uran, proksi dəstəyi) sahibdir ki, bu qarşıdurmanın özəlliklərinə uyğun şəkildə İsrailə cavab versin. Lakin bərabər səviyyədə zərbə endirmək imkanları məhduddur.

Hər iki ölkənin daxilində vəziyyət hələlik idarəolunan olaraq qalır, baxmayaraq ki, artıq bəzi ictimai narazılıq meylləri müşahidə olunmağa başlayıb.

Beynəlxalq ictimaiyyətin səyləri hələlik bu qarşıdurmanın genişlənməsinin qarşısını almaq üçün kifayət qədər məqsədyönlü və yetərli deyil”.

Armen Petrosyan Ermənistan üçün artıq hiss olunan və yaxın gələcəkdə proqnozlaşdırılan mümkün nəticələri belə dəyərləndirib:

“İranla iqtisadi əlaqələrin həyata keçirilməsində, İran ərazisindən yükdaşımalarla bağlı müəyyən çətinliklər yarana bilər.

İrandan Ermənistana qaz təchizatı ilə bağlı problemlər mümkündür.

Yaxın günlərdə İran ermənilərinin və iranlıların kiçik miqyaslı quru yolu ilə Ermənistana axını müşahidə oluna bilər.

Azərbaycan tərəfindən Ermənistana qarşı situativ təbliğat hücumları artıq hiss olunur (?).

Bütün bu kontekstdə, Ermənistanın əsas gündəlik məsələsi, qonşuluğunda baş verən münaqişənin mümkün təsirlərini hesablamaq və ehtimal olunan çağırışların qarşısını almağa yönəlmiş siyasəti həyata keçirmək olmalıdır. Çünki bu mərhələdə təhlükəsizlik baxımından ən ciddi proqnozlaşdırılan təhdidlər İran əleyhinə və ətrafında baş verən proseslərlə əlaqəlidir”.