“Son günlər Azərbaycanda torpaqların konsolidasiyası ilə bağlı müxtəlif fikirlər səsləndirilir. Bəzi hallarda məsələ elə təqdim olunur ki, guya konsolidasiya zamanı vətəndaşların torpaqları məcburi qaydada onların əlindən alınacaq. Təbii ki, bu yanaşma vətəndaşlarda narahatlıq və çoxsaylı suallar yaradır. Qeyd etmək lazımdır ki, torpaqların konsolidasiyası vətəndaşların torpaqlarının məcburi qaydada alınması demək deyil”.
Bu sözləri Pravda.az-a açıqlamasında Milli Məclisin Aqrar siyasət komitəsinin üzvü Azər Badamov deyib.
Deputat qeyd edib ki, konsolidasiya, dağınıq və bir-birindən ayrı yerləşən kənd təsərrüfatı torpaq sahələrinin daha səmərəli istifadə olunması məqsədilə yenidən təşkil edilməsidir: “Burada məqsəd torpaqların daha əlverişli şəkildə yerləşdirilməsi, kənd təsərrüfatı fəaliyyətinin səmərəliliyinin artırılması və torpaq sahələrindən daha məhsuldar istifadə üçün şərait yaradılmasıdır. Bu proses Azərbaycan Respublikasının Torpaq Məcəlləsi ilə tənzimlənir. Xüsusilə qeyd etmək lazımdır ki, Torpaq Məcəlləsinin 13-2.1-ci maddəsinə əsasən konsolidasiya torpaq mülkiyyətçilərinin razılığı və ekvivalent bazar dəyəri əsasında həyata keçirilir. Yəni vətəndaşın kənd təsərrüfatı təyinatlı torpağı konsolidasiya layihəsinə daxil edilirsə, bu, avtomatik olaraq həmin torpağın vətəndaşın əlindən alınması demək deyil. Məsələn, bir neçə torpaq sahəsi müxtəlif yerlərdə yerləşirsə və onların daha səmərəli istifadə olunması üçün yenidən təşkilinə ehtiyac yaranırsa, mülkiyyətçilərin razılığı əsasında həmin sahələrin sərhədləri, ölçüləri və yerləşməsi dəyişdirilə bilər. Burada əsas prinsip mülkiyyətçinin hüquqlarının qorunması və torpaqların ekvivalent bazar dəyərinin nəzərə alınmasıdır”.
A.Badamov vurğulayıb ki, Məcəllənin 13-2.4.2-ci maddəsində konsolidasiya layihəsində torpaq sahələrinin yeni sərhədlərinin, ölçülərinin və yerləşmə sxeminin mülkiyyətçilərlə razılaşdırılması nəzərdə tutulur: “Digər tərəfdən, 13-2.5-ci maddəyə əsasən konsolidasiya ilə bağlı qərar xüsusi yaradılmış komissiya tərəfindən qəbul edilir və bölgü sənədi təsdiq olunur. Həmin sənəd sonradan daşınmaz əmlak üzərində hüquqların dövlət qeydiyyatı üçün əsas hesab edilir. Burada mühüm məqam ondan ibarətdir ki, komissiyanın yaradılması və qərar qəbul etməsi mülkiyyətçinin razılığını avtomatik olaraq aradan qaldıran bir mexanizm kimi başa düşülməməlidir. Qanunun 13-2-ci maddəsində konsolidasiyanın həyata keçirilməsi üçün torpaq mülkiyyətçilərinin razılığı ayrıca şərt kimi müəyyən edilib. Ona görə də “konsolidasiya zamanı vətəndaşların torpaqları əllərindən alınacaq” fikri düzgün yanaşma deyil. Konsolidasiya öz mahiyyətinə görə torpaqların məcburi alınması yox, torpaq sahələrinin daha səmərəli istifadə məqsədilə yenidən təşkili mexanizmidir”.
