Bakının mərkəzində, yeni metronun qarşısında özbaşınalığın mənzərəsi görənləri dəhşətə gətirir. Sakinlərin hüquqları kiminsə cinayət əməlinə görə tapdanır. Görünən mənzərə Bakının mərkəzində “kim güclüdürsə, o da haqlıdır” prinsipinin işlədiyi görüntüsü yaranıb.

Söhbət Nəsimi rayonunun Cəlil Məmmədquluzadə küçəsi 108 ünvanında, yeni metro stansiyasının qarşısındakı hündürmərtəbəli binanın sakinlərinin üzləşdiyi vəziyyətdən gedir. Sakinlər Modern.az-a müraciət edib, baş verənlərlə bağlı fotoşəkillər təqdim ediblər.

Fotolardan və sakinlərin bildirdiklərindən belə görünür ki, binanın qarşısında əlavə qurğu və dəmir konstruksiya quraşdırılıb. Məsələnin ən diqqətçəkən tərəfi həmin konstruksiyanın sakinlərdən birinin metroya baxan pəncərəsinin qarşısını bağlamasıdır.Yəni bir vətəndaş öz mənzilində pəncərədən normal istifadə etmək imkanından məhrum edilir. Bununla da məsələ bitmir. Sakinlərin sözlərinə görə, binaya verilən qazı paylayan qurğu da əvvəlki yerindən çıxarılaraq qonşunun girişinin pilləkən hissəsinə yerləşdirilib. Bir sakinin pəncərəsi bağlanır. Digər sakinlərin gediş-gəlişinə maneə yaranır.

Ümumi istifadə sahəsinə müdaxilə edilir. Və bütün bunların fonunda ən sadə sual cavabsız qalır, bunu kim edib və hansı əsasla edib? Bütün bunlara kim icazə verib? Əgər icazə verilməyibsə, günün günorta çağı Bakının mərkəzində, insanların yaşadığı çoxmərtəbəli binanın qarşısında belə bir qurğunun quraşdırılmasına hansı dövlət qurumu və necə göz yumub? Çünki burada söhbət sadəcə dəmir konstruksiyadan getmir. Burada söhbət vətəndaşın mülkiyyət və istifadə hüququna, yaşayış şəraitinə, ümumi istifadədə olan ərazilərdən istifadə imkanına və təhlükəsiz hərəkət hüququna mümkün müdaxilədən gedir. Sakinlərin əsas narazılığı da məhz budur.

Onlar bu işi həyata keçirən şəxslərdən ciddi şəkildə narazıdırlar. Amma məsələni daha böyük problemə çevirən həmin özbaşınalığın qarşısını almalı olan qurumların susmasıdır. Çünki hüquqi dövlətdə vətəndaşın hüququnun müdafiəsi onun “güclü tanışı”nın olub-olmamasından asılı olmamalıdır.Azərbaycanda dövlət siyasəti insanlara xidmətdən, onların hüquqlarını qorumaqdan keçir. Hansısa yerli məmur bu siyasəti zədələyirsə, dolayısı ilə dövlətə qarşı çıxmış olur.

Qanun kiminsə dəmir konstruksiya quraşdırmaq imkanı varsa, bu, ona başqasının pəncərəsini bağlamaq hüququ vermir. Kiminsə müəyyən qurğu yerləşdirmək imkanı varsa, bu, digər sakinlərin giriş-çıxışını çətinləşdirmək səlahiyyəti demək deyil. Şəxsi maraq ümumi istifadədə olan sahənin və başqa vətəndaşın hüququnun üstünə çıxa bilməz.

Ən maraqlı məqam budur ki, hadisə ucqar ərazidə, gözdən uzaq bir yerdə baş verməyib. Söhbət Bakının mərkəzindən, yeni metrostansiyasının qarşısından gedir. Belə bir ərazidə əlavə konstruksiyanın quraşdırılması, ümumi sahəyə müdaxilə və qaz qurğusunun yerinin dəyişdirilməsi kimi məsələlərin aidiyyəti qurumların diqqətindən kənarda qalması ciddi suallar yaradır. Əgər bütün bunlar qanuni əsaslarla həyata keçirilibsə, aidiyyəti qurumlar bunu sənədlərlə açıqlamalıdır.

Əgər qanunsuz aparılıbsa, onda daha sadə sual meydana çıxır. Niyə indiyədək müdaxilə edilməyib? Dövlət qurumunun əsas vəzifəsi yalnız vətəndaş müraciət etdikdən sonra reaksiya vermək olmamalıdır. Dövlət nəzarəti həm də özbaşınalığın baş verməsinə imkan verməməkdir. Əks halda vətəndaş əvvəlcə hüququnun pozulmasını gözləyir, sonra aylarla qapı-qapı düşür, ərizə yazır, cavab gözləyir. Sonda hüququ pozulan adam özünü müdafiə etmək üçün yenə özü mübarizə aparmalı olur.

Sakinlərin Modern.az-a bildiriblər ki, bu vəziyyətlə bağlı Allaha şikayət etməyi düşünürlər. Çünki yerdə onları dinləyən yoxdur.

3 Sentyabr 2026, 17:20

***

Hörmətli Nəsimi rayonunun rəhbərliyi,

Mən İmadəddin Nəsimiyəm. Bu dəfə şeir yazmıram, bir pəncərədən söz açıram. O pəncərənin qarşısına dəmir çəkilib.
Bəlkə də məktubuma inanmayacaqsınız. Axı əsrlər əvvəl dünyadan köçmüş bir şair bu gün bir rayon rəhbərliyinə necə məktub yaza bilər?

Amma mənim sözlərim hələ də yaşayırsa, deməli, mən də bir az yaşayıram. Sizin rayon da mənim adımı daşıyır. Deməli, sizə məktub yazmaq haqqındayam.

Mən haqqı deyən sözün adamı olmuşam. Haqqı deməyin insanın dərisindən baha başa gəldiyi vaxtlarda yaşamışam. Dərimi soydular, amma sözümü soya bilmədilər.

İndi isə oxuyuram ki, adımı daşıyan rayonda bir vətəndaşın pəncərəsinin qarşısı dəmir konstruksiya ilə bağlanıb, digər sakinlərin giriş-çıxışı məhdudlaşıb. Qaz qurğusunun yeri dəyişdirilərək qonşu girişinin pilləkən hissəsinə keçirilib.

Mən bu xəbərlə tanış olanda konstruksiyaya diqqət eləmədim, insana baxdım. Dəmirin nə günahı var, o dəmir metal olaraq qalır. Onu insanın haqqının üstünə qoyanda problem başlayır. Bir pəncərənin qarşısında dəmir qoyanda bütün mənzərəni dəyişir. İnsanın dünyasını alt-üst edir. Siz pəncərəyə evin divarındakı boşluq kimi baxmayın. Pəncərə insanın dünyaya baxdığı, nəfəs aldığı məkandır.

İndi siz düşünün, bir insan səhər pəncərəsini açır və qarşısında göyü yox, dəmiri görür. Qapısından çıxır, yolunun daraldığını görür. Gördüklərindən aidiyyəti qurumlara müraciət edir.

Cavab gözləyir, gözləyir və bir gün məmur qapısından ümidini kəsib göyə baxır. Allaha şikayət etmək qərarına gəlir. Məni bu məsələ çox düşündürdü. Vətəndaşın Allaha şikayət etməsi yox, məmurun qapısında əlacsız qalması ağırdır. İnsan məmura ona görə müraciət edir ki, haqqının yerdə qorunacağına inansın. Yerdə cavab tapmırsa, göyə üz tutur.

Siz buna bir vətəndaşın taleyi kimi yanaşmayın, torpaqlarını işğaldan azad etmiş qalib dövlətin inamını sınağa çəkirsiniz.

Siz mənim şeirlərimi oxumamısınızmı? Mən həmişə insanın ucalığından yazmışam. Mən demişəm ki, “Məndə sığar iki cahan, mən bu cahana sığmazam...”

Bu misraların əsrlər sonra başqa bir sual kimi qarşınıza çıxacağını düşünməzdim, iki cahanı özündə sığdıran insana niyə öz evinin pəncərəsi çox görülməlidir. Niyə birinin insan kimi yaşaya bilməsi digərinin maraqlarına qurban verilməlidir?

Adımı daşıyan rayonda belə sualların yaranması mənə ağır gəlir. Siz Nəsimi adına lövhə kimi baxmayın. O adın içində bir tarix, bir insan var. O adda insan kiçildilməməlidir.

Sizdən çox şey istəmirəm, bir anlıq vəzifənizi kənara qoyun. Özünüzü həmin mənzildə yaşayan insanın yerində hiss edin. Pəncərənizin qarşısında dayanın, dəmirə baxın.

Sonra özünüzdən soruşun ki, bu dəmir mənim pəncərəmin qarşısında olsaydı, bunu ədalətli hesab edərdimmi? Cavabınız “xeyr”dirsə, məsələ həllini tapdı. Ədalət çox vaxt özünü başqasının yerinə qoya bilməkdə başlayır.

Sizə daha bir söz də deyim, bir insanın pəncərəsini bağlamaq da, bir qərarı imzalamaq da asan görünə bilər. Amma bir insanın içində yaranan “mənim səsim heç kimə çatmır” hissini bərpa etmək çox çətindir. Dəmir sökülər, divar tikilər, yol açılar. Vətəndaşın qalib dövlətinə inamında yaranan çatın təmiri illər çəkə bilər. Belə etməyin...

Mən İmadəddin Nəsimiyəm. Adımı daşıyan rayona etiraz edirəm. İstəyirəm ki, mənim adımı daşıyan rayonda heç kim haqqını axtararkən özünü yad hiss etməsin. Burada pəncərələr dəmirə yox, ədalətə açılsın. Əks halda adımın sizin rayondan geri alınmasını tələb edəcəm.

Hörmətlə,
İmadəddin Nəsimi

Bu gün, 11:45