Aktyor Taleh Yüzbəyovun dondurma reklamı birmənalı qarşılanmayıb. Onun qadınları dondurma ilə müqayisə etməsi müzakirələrə səbəb olub. Nəticədə meydana gələn narazılıq nəticəsində dondurma mağazası reklamı silib və izləyicilərdən üzr istəyib. Lakin aktyor videonun reklamsız halını yenidən paylaşıb. Ailə, Qadın və Uşaq Problemləri üzrə Dövlət Komitəsi də sözügedən reklamın müasir cəmiyyətin mənəvi dəyərlərinə və insan ləyaqətinə hörmət prinsipinə zidd olduğunu bildirib.
Sosial şəbəkələrdə isə Taleh Yüzbəyovla bağlı linç kampaniyası gedir. Onu, ailəsini, hətta azyaşlı övladını təhqir etməkdən çəkinmirlər. Aktyor özü bu məsələ ilə bağlı video-müraciət yayıb. T.Yüzbəyov müraciətdə özünü, ailəsini söyənləri qınayır, onları normal mübarizə aparmağa səsləyir.
Globalinfo.az-a danışan sosioloq Yusif Nəbiyev deyib ki, sözügedən reklam çarxının təkcə cəmiyyətdə geniş müzakirə olunması öz-özlüyündə problem sayılmazdı:
“Düşünə bilərdik ki, reklam çarxında kobud səhvlər var və cəmiyyət bunu birmənalı şəkildə rədd edir. Müasir cəmiyyətlərdə belə hallara kifayət qədər tez-tez rast gəlinir. Lakin burada narahatlıq doğuran məqamlar var. Statistika elmi ilə tanış olan mütəxəssislər, eləcə də biz – sosioloqların yaxından tanış olduğumuz və statistika çıxarmağa çalışarkən hər zaman istifadə etdiyimiz Koxran düsturu var. Bu düstura əsaslansaq, deyə bilərəm ki, 10 milyonluq bir əhalinin həqiqi fikrini 3 faizlik bir xəta payı ilə (hansı ki, kifayət qədər dəqiq nəticədir) öyrənə bilmək üçün bizə təxminən 1000-1200 nəfərin iştirak etdiyi bir səsvermə və ya anket sorğusu kifayətdir. Hazırda isə əlimizdə 1800-dən çox insanın iştirak etdiyi bir “Instagram” səsverməsi mövcuddur. Sorğuda Taleh Yüzbəyovun üzr istəməli və ya istəməməli olduğu soruşulub. 81 faiz iştirakçı “ehtiyac yoxdur” cavabını, 19 faiz iştirakçı isə “üzr istəməlidir” cavabını seçib. Nəzərə alsaq ki, iştirakçı sayı kifayət qədər çoxdur, əminliklə deyə bilərik ki, bu təqribi 80-20 nisbəti bütün cəmiyyətimizin düşüncə tərzini əks etdirir. Məsələnin problemli yönü də məhz burada üzə çıxır”.
Sosioloq bildirib ki, cəmiyyətin əzici çoxluğuna görə o reklam çarxında hər hansı bir etiraz ediləsi məqam yoxdur:
“Lakin belə böyük ajiotajın yaranması və hətta şirkətin geri addım atmağa məcbur olub, reklam çarxını öz sosial şəbəkə hesabından silməsi göstərir ki, cəmiyyətdə sayca azlıqda olan kütlənin etiraz gücü və diqtəedici təsiri daha böyükdür. Bu isə cəmiyyətdə ciddi qütbləşmə və qarşıdurma yarada biləcək hallardır. Xoşbəxtlikdən, mövzu o qədər də önəmli bir mövzu deyildi. Reklamda alleqoriya yolu ilə təbiilik və sünilik müqayisəsi aparılıb. Qadın və dondurma arasında müqayisə aparılmayıb. Alleqoriyanın nə olduğunu araşdıran yoldaşlar rahatlıqla anlaya bilərlər ki, burada qadınlara yönəlmiş bir təhqir və ya diskriminasiya olmayıb. Videoçarxın paylaşılmasından sonra Taleh bəyin ailəsinə, hətta azyaşlı övladına qarşı yönəlmiş təhqir və təhdidlər isə göstərir ki, etirazların özəyində dayanan və əsas motor rolunu oynayan radikallaşmış fərdlərin amalları və dərdləri heç də qadın və ailə toxunulmazlığı olmayıb. Ən azından belə olsaydı 12 yaşlı qız uşağına təhqirlər yönəldilməzdi. Çünki o da qadındır. O da azad fərddir”.
Yusif Nəbiyev deyib ki, şirkət tərəfindən reklamın ana məqsədinin qadınları alçaltmaq olmadığı qeyd olunub:
“Nəzərə alsaq ki, o şirkətin əsas müştəri bazası elə məhz qadınlardır, o halda şirkətdə qadınları alçaltmaq niyyətinin olmasına dair ehtimal bir az da azalmış olur. Amma hər bir halda düşünürəm ki, həm reklam çarxları hazırlanarkən, həm də hazırlanmış reklam çarxları tənqid olunarkən, ziddiyyətli məqamlar yaradacaq ifadə və mesajlardan çəkinmək lazımdır. Hansı şirniyyat dükanından alışveriş etməyimizdən asılı olmayaraq, eyni ölkəni, eyni sosial sistemi paylaşırıq və sülh içində yaşamağı bacarmalıyıq”.
