Xəbər verdiyimiz kimi, 2026-cı il iyunun 5-də CNN transmilli media şirkəti “İsrail İran müharibəsi zamanı region üzrə gizli şəbəkənin bir hissəsi olaraq Azərbaycana qoşun göndərdi" başlıqlı məqalə yayımlayıb. Məqalədə iddia olunur ki, guya İran-İsrail müharibəsi zamanı ölkəmizdə İsrail hərbçiləri yerləşdirilib, onlardan qonşu dövlətə qarşı əməliyyatlarda istifadə etmək planlaşdırılıb.

Moderator.az-a açıqlama verən görkəmli media eksperti, professor Cahangir Məmmədli CNN-nin heç bir fakta söykənməyən məlum iddiasını ölkəmizə qarşı aparılan yalan kampaniyasının tərkib hissəsi kimi dəyərləndirib:

“Bəlli bir dönəm var idi ki, CNN özünün demokratik, dəqiq inforasiya verən qurum kimi göstərmişdi. Bəziləri də ona inanmağa başlamışdı. Sonra isə bu qurum özü-özünü biabır elədi. CNN saxta xəbər yaymağa, sonra da üzr istəməyə başladı. Ruslarda belə bir məsəl var: “Donuz kimi hərəkət edib, bəy kimi üzr istəyir”. Hazırda CNN-nin fəaliyyəti bu məsəli xatırladır.

Avropanın bir neçə ölkəsi var ki, Azərbaycanın hazırkı inkişafını, dünyadakı bugünkü yerini qısqanclıqla qarşılayır. Buna görə də ölkəmizə qarşı saxta xəbərlərdən istifadə edir.

Azərbaycan Respublikasının Prezidenti dəfərlərlə bəyan edib ki, ölkəmizdə heç bir dövlət qoşun yerləşdirə, torpaqlarımızdan hər hansı bir ölkəyə qarşı istifadə edə bilməz. Prezidentimizin sözü imzasıdır və bütün dünya bu həqiqətə şahiddir.

Mən jurnalistlərimizin müəllimi və ağsaqqalı kimi xahiş edirəm ki, media nümayəndələrimiz bu xəbərlərə ciddi yanaşsınlar. Ölkəmizə qarşı atılan böhtanlara qarşı o qədər sərt mübarizə aparsınlar ki, onlar bir də belə qələt eləməsinlər.

Jurnalistlərimiz dövlətimizin, Prezidentimizin yanındadır və hər zaman da yanında olacaq”.