6 iyun şənbə günü səhər Rusiyanın Sankt-Peterburq şəhərinə yenidən kütləvi dron zərbələri endirilib. Güclü partlayışlar şəhərin hər yerində əks-səda verib və sakinlər dronların birbaşa binalarının üzərindən uçmasından şikayətləniblər.
Moderator.az xəbər verir ki, bu barədə "TSN" məlumat yayıb.
Şəhər qubernatoru Aleksandr Beqlov həmin səhər Sankt-Peterburqun genişmiqyaslı dron hücumuna məruz qalmasından şikayətlənib. O, hava hücumundan müdafiə sistemlərinin işi barədə məlumat verib.
Beqlov həmçinin şəhər sakinlərini evdə qalmağa çağırıb və mobil internet xidmətində mümkün fasilələr barədə xəbərdarlıq edib.
"Operativ Qərargahın tövsiyələrinə uyğun olaraq, Sankt-Peterburq sakinlərindən evdə qalmalarını və çölə çıxmamalarını xahiş edirəm", - deyə o vurğulayıb.
Bu arada, şənbə səhəri qəhvə ilə başlamayan Sankt-Peterburq sakinləri şəhər üzərində uçan dronları lentə alıblar, partlayışlardan titrəyiblər və yaranmış gərgin durumdan, o cümlədən mərkəzi küçələrin bağlanmasından panikaya düşərək şikayət ediblər.
Rusiyanın "ASTRA" telegram-kanalı "OSINT" təhlilinə istinadən bildirib ki, ölkənin sualtı silahlar hazırlayan əsas müəssisə olan "Dəniz İstilik Mühəndisliyi" Tədqiqat İnstitutuna da hücum ehtimalı var.
Qeyd edilir ki, gecə Leninqrad vilayətinin hakimiyyəti "havada PUA" xəbərdarlığı verib. Eyni zamanda, insanlara mobil internet sürətinin mümkün azalması barədə xəbərdarlıq edilib.
Səhər saatlarında regionun qubernatoru Aleksandr Drozdenko da kütləvi pilotsuz təyyarə hücumu barədə məlumat verib. Onun sözlərinə görə, hava hücumundan müdafiə qüvvələri guya 140-dan çox hədəfi vurub.
Xatırladılır ki, gecə saatlarında Sankt-Peterburqdan uzaqda yerləşən Kronştadtda da partlayışlar baş verib. Yanğınlar başlayıb və hazırda bir neçə yerdə yanğın görünür.
Hücum nəticəsində Kronştadt Hərbi Dəniz Qüvvələrinin Kadet Hərbi Korpusunun üzərində tüstü görünüb. Hücumun rəsmi təsdiqi hələlik yoxdur. Daha əvvəl şahidlər şəhər üzərində qara tüstünün fotolarını dərc ediblər.
