Azərbaycanda yaşlı qadının Kərbəlaya ziyarət üçün topladığı vəsaiti kənd yollarının asfaltlanmasına sərf etməsi sosial şəbəkələrdə geniş müzakirələrə səbəb olub.

Sosial şəbəkə istifadəçiləri bu məsələni iki cür qiymətləndiriblər. Bəziləri qadının kənd yollarının yaxşılaşdırılmasına töhfəsini savab kimi dəyərləndirib, bu addımı həm dini, həm də ictimai baxımdan müsbət hesab edib. Digər tərəfdən, bir qrup insan isə Kərbəlaya ziyarət məqsədilə toplanan vəsaitin birbaşa dini məqsədə yönəldilmədiyini bildirərək, bu addımı dini savabla eyniləşdirməyin mümkün olmadığını vurğulayıb.

Dini ziyarət üçün nəzərdə tutulmuş pulların ictimai fayda üçün xərclənməsi dini savabla eyniləşdirilə bilərmi?

Mövzu ilə bağlı “Cebheinfo.az”-a açıqlama verən ilahiyyatçı Tural İrfan bildirib ki, qadın yolu düzəltməklə bəlkə də yüz Kərbəla ziyarətinin savabını qazanıb:

“Kərbəla ziyarəti əslində vacib yox müstəhəb, lakin fəziləti böyük olan ziyarətlərdəndir. Ancaq şübhəsiz ki, bir şəxs Kərbəla ziyarəti üçün topladığı pulu digər xeyriyyə işlərinə sərf edibsə, bu, daha çox savab işdir. Dinin mahiyyəti xeyirxahlıqdır. İmamlar özlərinə pərəstiş edilməsini yasaqlayıblar. Cəmiyyət üçün faydalı işlər görməyi, ictimai xidmətləri böyük qiymətləndiriblər. Bu qadın yolu düzəltməklə bəlkə də yüz Kərbəla ziyarətinin savabını qazanıb. Əgər qonşuda, qohumda ehtiyaclı adamlar varsa, yaxud yolsuzluq, susuzluq problemi olarsa, onu aradan qaldırmaq imkanı olanlar üçün vacibdir”.

O qeyd edib ki, ziyarətlər isə vacib deyil, müstəhəbdir:

“Vacib əməl isə müstəhəbdən öncə icra edilməlidir. Kərbəla ziyarəti üçün topladığı pula yolu təmir etdirən bu qadın əslində riyakar, şöhrətbaz və saxta dindarlara tərbiyə verib, yol göstərib. Lakin elə imkanlı adamlar var ki, onlar həm Kərbəlaya gedə, həm də yolları düzəldib bulaqlar çəkdirə bilərlər. Ziyarət savabdır, ancaq belə xeyirli işlər ondan da savabdır və davamlı savab qazandıran əməllərdir”.