Ermənistanın Azərbaycanla sərhəddə yerləşən Tavuş vilayətinin Dilican şəhərində güclü yanğınlar davam edir. Erməni deputat Qarnik Danielyan mövcud qüvvələrin kifayət etmədiyini, əlavə köməyə ehtiyac olduğunu bildirib.
Bundan sonra sosial şəbəkənin erməni seqmentində yanğının söndürülməsi üçün Azərbaycandan yardım istənilməsi təklif olunub. Şəbəkə istifadəçiləri qeyd ediblər ki, bu məqsədlə Azərbaycan Fövqəladə Hallar Nazirliyinə müraciət etmək mümkündür. Səbəb kimi isə yanğının sərhədə, xüsusən Qazax rayonuna yaxın ərazidə başlaması göstərilib.
Bildirilib ki, İrəvan kömək istəyəcəyi təqdirdə Azərbaycan buna müsbət cavab verəcək.
Əldə etdiyimiz məlumata görə, belə hallarda məsələ dövlət başçıları səviyyəsində həll olunur. Yəni rəsmi Bakının müvafiq istiqamətdə yardım göstərməsi üçün Ermənistan rəhbərliyi Azərbaycana müraciət etməlidir. Yalnız bundan sonra sözügedən müraciət dəyərləndirilə və zərurət olarsa, müvafiq addımlar atıla bilər.
Araşdırmaçı- jurnalist Asəf Quliyev Sherg.az-a açıqlamasında deyib ki, istənilən təbii fəlakət zamanı, qarşı tərəf rəsmi müraciət etdikdə, Azərbaycan humanitar yardım göstərmək gücünə və iradəsinə malikdir. O, vurğulayıb ki, Azərbaycanın humanitar yanaşması bəşəri dəyərlərə əsaslanır və bu, Ermənistana da tətbiq oluna bilər:
“İstənilən təbii fəlakət zamanı, istənilən ölkə Azərbaycana müraciət edəcəyi təqdirdə Azərbaycanın cavabı birmənalı olar: “Azərbaycan istənilən humanitar fəlakət rayonuna xilasedicilər göndərmək gücünə və iradəsinə malik bir ölkədir. Bu mənada Azərbaycan Ermənistana da belə bir yardım edə bilər. Humanitar məsələlərdə Azərbaycan hər zaman bəşəri dəyərləri yüksək tutan bir dövlət olub. Amma bunun üçün qarşı tərəfin müraciəti mütləq şərtdir. Bəli, təhlükənin Azərbaycan sərhədlərini aşıb Azərbaycan vətəndaşları üçün də narahatlıq yarada biləcəyi ehtimalı olarsa, bu zaman rəsmi Bakı müraciəti gözləmədən də müəyyən addımlar ata bilər. Məndə olan son məlumata görə, fövqəladə müdaxilə üçün elə bir əsas yoxdur. Artıq yanğın nəzarət altına alınıb. Sülh prosesinin indiki həssas məqamında humanitar məqsədli jestlər prosesə müsbət təsir edəcək faktor ola bilər. Amma bir daha təkrar edirəm ki, hazırda buna ehtiyac duyulmur və Ermənistanın müvafiq strukturları yanğını nəzarət altına ala bilib”.
