“Rusiya son zamanlar hanısa formada Zəngəzur dəhlizinə qoşulmaq istəyir. Lakin artıq onların bu prosesdə iştirakına ehtiyac yoxdur”.

Bu sözləri Azad Vətən Partiyasının (AzVP) sədri Akif Nağı “Cebheinfo.az”-a açıqlamasında deyib. O bildirib ki, artıq Rusiyanın Zəngəzur dəhlizinə qoşulmaq imkanları da mövcud deyil:

“Azərbaycan, Ermənistan və Rusiya liderləri arasında 10 noyabr 2020-ci ildə üçtərəfli Bəyanat imzalanmışdı. Orada sadəcə yolun təhlükəsizliyinə nəzarətin Rusiya tərəfindən həyata keçirilməsi nəzərədə tutulmuşdu.

Lakin ruslara yolda hansısa sistem qurmaq və ya kimlərisə yoxlamaq kimi səlahiyyət verilməmişdi. İndi isə 10 noyabr Bəyanatı qüvvəsini itirdikdən sonra Zəngəzur dəhlizinin təhlükəsizliyini ABŞ-nin iştirakı ilə Azərbaycan və Ermənistan özü təmin edəcək.

Deməli, Rusiyanın orada iştirakına ehtiyac yoxdur. Onu da nəzərə almaq lazımdır ki, 10 noyabr Bəyanatı üçtərəfli bir razılaşma idi. Parlamentdə də ratifikasiya olunmadığı üçün Kreml o sənədin üzərində dayana bilməz”.

Siyasətçi vurğulayıb ki, rəsmi Moskvanın Zəngəzur dəhlizi ilə bağlı hansısa iddia irəli sürmək üçün hüquqi bazası yoxdur:

“Bundan başqa, Rusiyanın Zəngəzur dəhlizinin keçdiyi əraziyə də hansısa dəxli yoxdur. Bu səbəbdən də Kreml hansısa formada Zəngəzur dəhlizi ilə bağlı tələb irəli sürə bilməz. Əslində, son illərdə Rusiya kifayət qədər gücdən düşüb. Bu gün kimsə Moskva ilə hesablaşmır. Həmçinin, dünyanın istənilən yerindəki münaqişələrlə bağlı Kremlin təsir imkanları sıfıra bərabərdir”.

Partiya sədri qeyd edib ki, Rusiya təsir imkanı olmayan dövlətə çevrilib:

“Özləri də bunu başa düşürlər. Bu səbəbdən də Rusiyanın Zəngəzur dəhlizində iştirak perspektivi yoxdur. Hətta Kreml Ermənistandakı proseslərə də müdaxilə edə bilmir. Üstəlik, böyük dövlətlər tərəfindən də Zəngəzur dəhlizi qəbul olunub və dəstəklənir.

Çin, Yaponiya və Qazaxıstan da bu layihədə maraqlıdır. Prezident İlham Əliyevin Qazaxıstana səfəri zamanı “Orta dəhliz”lə xüsusi təqdimat oldu. Bu isə dünyaya, birinci növbədə Rusiyaya mesaj idi. Çünki “Orta dəhliz”in bir hissəsi olan Zəngəzur dəhlizinin də taleyini Azərbaycan özü həll edir. Bura kiminsə müdaxilə etməsinə ehtiyac yoxdur”.