“Ermənilərin Qarabağa (Azərbaycanın bölgəsi - red.) qayıdışı real deyil”. Bunu Ermənistan Baş naziri Nikol Paşinyan AŞPA-da çıxışı zamanı deyib. O qeyd edib ki, insanlar onların Qarabağa qayıtmasının nə dərəcədə real olduğunu soruşurlar: "Düzünü desəm, bunun real olduğunu düşünmürəm. Həmçinin bu məsələni sülh prosesi üçün təhlükəli hesab edirəm". Paşinyan əlavə edib ki, Qarabağdan gələnlər Ermənistanda qalmalıdırlar, artıq onların mənzillərlə təmin edilməsi proqramına başlanılıb.
Maraqlıdır ki, hətta Ermənistan hökumətinin belə artıq qapatdığı səhifəni kimlərsə, hansısa məqsədlərlə açmağa çalışır.
"Alyans" Strateji Araşdırmalar Mərkəzinin rəhbəri Abutalıb Səmədov deyib ki, Nikol Paşinyanın təxribatçı suala bu cür cavabı göstərir ki, Paşinyan Ermənistanın ən realist siyasətçisidir. Ekspert bildirib ki, Paşinyanın bütün addımları Ermənistan dövlətinin maraqlarına xidmət edir:
"Paşinyan bölgədə sülhün, sabitliyin olmasında maraqlıdır. Bu səbəbdən Paşinyanın 2026-cı ildə keçiriləcək parlament seçkisində qələbəsi vacibdir. Ancaq həm Ermənistan daxilində, xaricdə anti-Paşinyan qüvvələri kifayət qədər güclüdür. Onların fəaliyyət istiqamətlərindən biri müxtəlif tribunalarda Qarabağdan könüllü getmiş ermənilərin yenidən kollektiv şəkildə Azərbaycana qayıtması məsələsini qaldırmaqdır. Çünki bu məsələ Paşinyanın zəif yerlərindən biri hesab olunur. Ermənilərin böyük əksəriyyəti inanır ki, Qarabağdan ermənilərin getməsinin əsas günahkarı Paşinyandır. Baş nazirin rəqibləri bu məsələni daim gündəmdə saxlamağa çalışır. Xüsusən, erməni lobbisi məsələnin gündəmdən düşməsinə imkan vermir".
Analitik qeyd edib ki, Qarabağdakı erməniləri separatçılığa sövq edənlərin başında Levon Ter-Petrosyan, R.Koçaryan, S.Sarkisyan dayanırdı:
"Onlar fəal şəkildə separatçılıq hərəkatında iştirak edir, ona rəhbərlik edirdilər. "Daşnaksütyun" partiyası kifayət qədər aktiv idi. Fransadakı erməni lobbisi fəallıq göstərirdi. Təbii ki, əsasən də Rusiya Qarabağa ermənilərin yenidən kollektiv qayıdışında maraqlıdır. Ona görə də mütəmadi bu məsələdən danışır, Paşinyana suallar ünvanlayırlar. Seçki öncəsi Ermənistandakı müxalifətin əsas şüarlarından biri də məhz budur. Qarşıda ciddi mübarizə gözlənilir. Paşinyan isə ermənilərin Qarabağa qayıdışını real hesab etmir, üstəlik, bunu sülh üçün təhlükəli sayır. Bunun səmimi olduğunu düşünürəm və hesab edirəm ki, ermənilərin əksəriyyəti də Paşinyan kimi düşünür".
