Ölkədə mövcud milli birlik və siyasi həmrəylik mühitinin yaratdığı yeni reallıqlar, dialoq cəmiyyətin inkişafını sürətləndirir.

Prezident İlham Əliyevin tapşırığı ilə başladılan və Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsi tərəfindən həyata keçirilən proses bu gün də uğurla davam edir.

Lakin bəzən Azərbaycan cəmiyyətinin illərlə gözlədiyi, arzuladığı bu siyasi birlik və həmrəylik modelini öz adına çıxmaq və yaxud ona kölgə salmaq istəyənlər də tapılır. Müsavat Partiyasının Məclis sədri Arif Hacılı çıxışlarının birində bildirib ki, bu prosesin başlanmasında xüsusi rol oynayıblar. Əslində, real mənzərə başqadır.

İstər Vətən müharibəsi, istər ondan əvvəlki, istərsə də sonrakı dövrdə prosesin uğurlu nəticəsinin yeganə səbəbi Prezident İlham Əliyevin bu məsələdə qəti mövqeyi idi. Prosesi pozmağa çalışanlar olsa da, ölkədə fəaliyyət göstərən siyasi partiyaların böyük çoxluğu prosesə qoşuldu.

Əli Kərimlinin rəhbərlik etdiyi AXCP özünü prosesdən tamamilə təcrid etdi. Müsavat Partiyası isə siyasi dialoq mühitinin uğurunu gördükdən sonra prosesə müəyyən mənada loyal münasibət bəslədi. Bu gün siyasi birlik və vətəndaş həmrəyliyindən danışarkən həqiqəti söyləmək daha doğru olar.

Arif Hacılının fikirlərinə münasibət bildirən Böyük Azərbaycan Partiyasının sədri, deputat Elşad Musayev "Cebheinfo.az"-a açıqlamasında deyib ki, siyasi partiyalar arasında dialoq mühitinin yaranmasında Müsavat Partiyasının hansısa rolu olmayıb:

"Əslində, mən hansısa partiya funksionerinin və ya sədrinin sözlərinə fikir bildirməyi sevmirəm. Lakin belə prinsipial məsələlərə rəy bildirmək lazımdır. 44 günlük müharibə dövründə də, öncəsində və sonrasında da Müsavat Partiyasının həmrəylikdə heç bir rolu olmayıb.

Milli birlik və həmrəyliklə bağlı addımı Müsavat və ya hansısa müxalifət partiyası deyil, Prezident İlham Əliyev atıb. Dövlət başçısının təşəbbüsü ilə Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsi tərəfindən dialoq mühiti formalaşdırılıb.

Bu, birbaşa cənab Prezidentin göstərişi əsasında həyata keçirilib. Sözügedən şöbənin müdiri Ədalət Vəliyev siyasi partiya rəhbərləri ilə görüşəndə açıq şəkildə bildirdi ki, ölkədə yeni dialoq mühitinin formalaşdırılması və siyasi partiyalarla münasibətlərin yeni zəmində qurulması ilə bağlı qarşıya məqsəd qoyulub. 44 günlük Vətən müharibəsi dövründə bu məsələlər bir qədər də genişləndi".

Partiya sədri diqqətə çatdırıb ki, əslində, Müsavat Partiyası başladılan prosesi pozmağa çalışıb:

"Müsavat Partiyası və Azərbaycan Xalq Cəbhəsi Partiyası (AXCP) prosesdə "tormozlayıcı" rol oynamağa çalışıb. Bu partiyaların siyasi dialoq və həmrəylik mühitinin formalaşmasında hansısa rolu yoxdur. Ümumiyyətlə, onlar bəyanatlara belə imza atmayıblar. Arif Hacılının dedikləri tamamilə böhtandır və hansısa əsası yoxdur.

Digər partiyalar isə həmrəylik və əməkdaşlıq yolunda hakimiyyətlə birgə addım atmaqla bağlı ortaya konkret mövqe qoydular. Siyasi partiyaların hakimiyyətlə birlikdə keçirilən "Zoom" toplantısında partiya sədrləri çıxış etdilər.

Mən o toplantıda öz mövqeyimi ortaya qoydum. Əgər varsa Arif Hacılı və onun kimilər də zamanında etdikləri çıxışları ortaya qoysunlar. Görək onlar hansı təşəbbüslə çıxış ediblər. Biz bütün hallarda bu prosesi uğurla aparan Prezident İlham Əliyevin rolunu alqışlayırıq. Prosesin əsas lokomotivi birbaşa dövlət başçımızdır. Proses də siyasi partiyaların güclənməsinə xidmət edir".

Elşad Musayev vurğulayıb ki, Arif Hacılı bu məsələ barədə danışmasa yaxşıdır:

"Yalandan təşəbbüsü üzərlərinə götürməyin mənası yoxdur. Məsuliyyət götürən idilərsə, elə 30 il bundan qabaq edərdilər. Sadəcə olaraq, gündəmdə qalmaq üçün belə bəyanatlar səsləndirirlər. Əslində, Müsavat Partiyasının birlik və həmrəylik yaratmaq üçün gücü, potensialı yoxdur.

Əksinə, Azərbaycan müxalifətinin dağılmasında ən böyük rolu oynayan AXCP-Müsavat cütlüyüdür. Vətən müharibəsində də, ondan sonra da yalnız pozuculuq fəaliyyəti ilə məşğul olublar. Onlar Azərbaycanın əleyhinə olan qüvvələrin keçirdiyi bütün tədbirlərdə iştirak edirlər".