Ermənistanın Baş naziri Nikol Paşinyan ölkəsinin silah tədarükü imkanlarının genişləndiyini açıqlayıb. Onun sözlərinə görə, əvvəllər Ermənistan üçün silah bazarları həm coğrafi, həm də maliyyə baxımından məhdud idi. Lakin artıq bu məhdudiyyətlər aradan qaldırılıb və heç bir ölkə Ermənistanla hərbi-texniki əməkdaşlıqdan çəkinmir, çünki bu silahların qeyri-legitim məqsədlər üçün istifadə olunacağından narahatlıq yoxdur.

Bəs Ermənistanın silah bazarlarını böyütməsi region üçün təhlükə hesab oluna bilər?

Mövzu ilə bağlı Redaktor.az-a danışan təhlükəsizlik orqanlarının veteranı, ehtiyatda olan polkovnik Elşad İsayev bildirdi ki, həqiqətən son illərdə, xüsusən də İkinci Qarabağ müharibəsi dövründə Ermənistan üçün belə problemlər vardı.

Onun sözlərinə görə, bəzi dövlətlər ərazilərindən silah daşınmasına icazə vermirdilər:

"Ümumiyyətlə, Ermənistanın çox vacib maliyyə problemləri vardı. Amma indi zaman dəyişib, təbii ki, dövlətlərarası münasibətlər dəyişib. Belə bir məqamda Ermənistan da digər ölkələrlə hərbi texniki sahədə əməkdaşlıq edir. Bir sözlə silah bazarlarını genişləndirməyə çalışır. Bu, təbii bir prosesdir. Təbii ki, hər bir ölkə bu istiqamətdə çalışır ki, özünə güclü bir ordu yarada bilsin. Ancaq güman etmirəm ki, Ermənistanın silahlanması region üçün ciddi problemlər yarada bilsin. Çünki Ermənistanın rəhbərliyi yaxşı başa düşür ki, istənilən formada silahlanma ilə Azərbaycanla münasibətdə üstünlük qazana bilməz".

Polkovnik vurğuladı ki, bu gün Azərbaycan ordusu ən müasir silahlarla, texnikalarla təmin olunub:

"Ali Baş Komandanın göstərişi ilə Azərbaycan ordusu üçün ən müasir silahlar alınır. Azərbaycan ordusu faktiki olaraq günü-gündən güclənir. Bu gün Azərbaycan ordusu regionun ən güclü ordusudur. Eyni zamanda Azərbaycanın iqtisadi imkanları ilə Ermənistanın iqtisadi imkanlarını da müqayisə etmək düzgün olmaz. Çünki müasir silahlar sadəcə bağışlanmır, bu silahlar alınmalıdır. Bu sahədə böyük bir maliyyə imkanları olmalıdır. Bu silahlardan eyni zamanda istifadə etmək üçün güclü mütəxəssislər hazırlanmalıdır. Güman etmirəm ki, Ermənstanın silah bazarındakı hərəkəti gələcəkdə regionda böyük bir problemlər yarada bilsin. Bu, mümkün deyil".