Rus filosof və politoloq Aleksandr Duqin azərbaycanlıları təhqir edib.
O, Rusiyada yaşayan miqrantlardan bəzilərini cəmiyyət üçün “ən çox toksik qrup” adlandırıb. Duqin xüsusilə azərbaycanlıları, tacikləri və özbəkləri bu siyahıya daxil edib. Filosofun sözlərinə görə, hansısa bir miqrant rus vətəndaşlarına qarşı aqressiya göstərirsə, o, artıq cinayətkar sayılmalıdır.
Duqinin bu sözləri birmənalı qarşılanmayıb. Üstəlik, Azərbaycanla Rusiya arasındakı münasibətlərin gərgin olduğu bir zamanda belə açıqlama vermək vəziyyəti daha da gərginləşdirməyə xidmət edir.
AĞ Partiyanın başqanı Tural Abbaslı “Cebheinfo.az”-a açıqlamasında bildirib ki, Aleksandr Duqin özünü filosof adlandırır və hətta Rusiya Prezidenti Vladimir Putinin mənəvi yol göstərəni sayılır:
“Lakin çox səviyyəsiz, primitiv və ibtidai icma quruluşuna aid olan fikirlər bildirir. O, azərbaycanlılar, taciklər və özbəklər deyərək daha çox müsəlmanları nəzərdə tutur. Niyəsə erməniləri, belarusları və ya ukraynalıları ora qatmır. Hansı ki, Rusiyanın müharibəsi məhz Ukrayna ilədir. Hətta Duqin deyir ki, kim rusların yanında Ukraynaya qarşı vuruşsa, o, əsl rusdur. Onun fikirləri milliyətçilik də deyil. Sadəcə olaraq dini zəmində aparılan faşistlikdir”.
Siyasətçi vurğulayıb ki, Duqinə kimi kimin torpağından qovmaq istədiklərini xatırlatmaq lazımdır:
“Əslində, Rusiya adlı ölkə mövcud olmayıb. Rusiya müsəlman dünyasının öz arasındakı çəkişmələri sayəsində aralıqda meydana çıxan bir dövlətdir. Yəni tarixdə bu adda bir dövlətə rast gəlmək mümkün deyil. Ruslar dünənə qədər Toxtamış xana və onun nəslindən gələnlərə vergi ödəyərək özlərini knyaz elan edirdilər. Dünənki nökərlərimiz bu gün bizi bəyənmirlər”.
Tural Abbaslı Aleksandr Duqinə tarix oxumağı məsləhət görüb:
“Beləcə özlərinin haradan gəldiyini görər. Aşağıladığı azərbaycanlıların, taciklərin və özbəklərin hansı mədəniyyətə malik olduğunu öyrənsin. Boş-boş danışmaqla deyil. Köksüz bir millətdirlər. Heç slavyanlara aid olub-olmadıqları belə bilinmir. Ona görə də Duqin boş-boş danışmasın. Azırbaycanlıların və ümumiyyətlə, türk millətinin Duqinin təsdiqinə ehtiyacı yoxdur”.
